ខេត្ដបន្ទាយមានជ័យ ៖ មន្ត្រីសាខាកាំកុងត្រូលខេត្តបន្ទាយមានជ័យបានធ្វើការស្ទាក់ចាប់ម៉ូតូសណ្តោងរម៉កមួយគ្រឿងដែលសង្ស័យថាបានដឹកបង្កប់សាច់មាន់ខូចគុណភាពឆ្លងដែនមិនមានប៉ាស្ព័រត្រឹមត្រូវ។
ការស្ទាក់ចាប់របស់ក្រុមមន្ត្រីកាំកុងត្រូលធ្វើឡើងនៅព្រឹកថ្ងៃទី១១ខែវិច្ឆិកាឆ្នាំ២០២០លើកំណាត់ផ្លូវជាតិលេខ៥៨ ស្ថិតភូមិអូរនាង សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
មន្ត្រីជំនាញបានឲ្យដឹងថាក្រោយពីការឃាត់រម៉កសណ្តោងខាងលើ ក្រុមការងារបានឆែកឆេររកឃើញសាច់មាន់ជាច្រើនស្បោងដែលដាក់បង្កប់ក្នុងរម៉កស្មើនឹងទម្ងន់៣៥០គីឡូក្រាម។
សាច់មាន់ទាំងនេះមន្ត្រីជំនាញអះអាងថា ឈ្មួញនាំចូលតាមច្រករបៀងអូរបីជាន់ ស្ថិតឃុំអូរបីជាន់ ស្រុកអូរជ្រៅ ខេត្តបន្ទាយមានជ័យក្រោមការសម្របសម្រួលពីសមត្ថកិច្ចឈរជើងនិងអ្នកពាក់ពន្ធ័ទទួលផលប្រយោជន៍។
សាច់មាន់ខូចគុណភាពទាំងអស់នេះដែរទំនងជាត្រូវបានដឹកយកទៅចែកចាយនៅលើទីផ្សារក្នុងក្រុងប៉ោយប៉ែត ទីផ្សារមួយចំនួនទៀតក្នុងខេត្តបន្ទាយមានជ័យនឹងក្នុងរូបភាពសត្វកណ្តៀរដឹកតិចៗប្រមូលផ្តុំរួចជញ្ជូនចេញទៅលក់ចែកចាយតាមទីផ្សារទូទាំងបណ្តាខេត្តផ្សេងៗក្នុងប្រទេស។
មន្ត្រីជំនាញសាខាកាំកុងត្រូលបានបញ្ជាក់ឲ្យដឹងផងដែរថា សាច់មាន់ដែលបង្ក្រាបបាននេះ នឹងយកទៅដុតកម្ទេចចោល ចំណែកវត្ថុតាងជាមធ្យោបាយដឹកទំនិញ រួមទាំងម្ចាស់ត្រូវបានអនុវត្តន៍ទៅតាមច្បាប់ រីឯឈ្មួញនាំចូល សមត្ថកិច្ចសាខាកំពុងតែធ្វើការស្រាវជ្រាវ ដើម្បីឈានដល់ការចាប់ខ្លួនយកមកចាត់ការតាមផ្លូបច្បាប់ ។
ជុំវិញការចាប់សាច់មាន់ខូចគុណភាពដែលឆ្លងដែនគ្មានលិខិតអនុញ្ញាតិនេះដែរ មហាជនពិសេសអ្នករស់នៅក្បែរៗច្រកអូរបីជាន់បាននិយាយថា គេឃើញសមត្ថកិច្ចជាច្រើនស្ថាបន័មានកុងត្រូល គយរបស់សាខាខេត្ត គយការិយាល័យស្រាវជ្រាវ បង្ក្រាប តំបន់៥របស់នាយកដ្ឋានគយនិងរដ្ឋាករ កុងត្រូលរបស់សាខាកាំកុងត្រូល ប៉ូលីសសេដ្ឋកិច្ចខេត្ត និងកម្លាំងអាវុធហត្ថ ឈរជើងត្រៀបត្រានៅទីនោះ ប៉ុន្តែបទល្មើសឆ្លងដែនកើតមានជាហូរហែរ។
ក្នុងនោះសត្វគោ ក្របី ជ្រូក មាន់ទា នាំចូលដឹកតាមរថយន្តធំបំផ្លាញផ្លូវ ខូចស្ទើរគ្មានសល់ សមត្ថកិច្ចដេករ៉ាប់ក្បាលឡាន សង្ស័យទទួលបានប្រយោជន៍ទើបអត់ខ្វល់ពីដឹកបំផ្លាញនេះ។
មហាជនក៏បានបញ្ជាក់បន្ថែមដែរថា ទៅចាំទៅមើលអី ច្រកណាមានផលប្រយោជន៍ មានបទល្មើសឆ្លងកាត់ច្រើន ទីនោះសមត្ថកិច្ចគ្រប់ស្ថាប័នទៅផ្តុំគ្នាឈរជើង តែមិនមែនផ្តុំគ្នាបង្ក្រាបនោះ គឺផ្តុំគ្នាប្រមូលផលប្រយោជន៍ចែកគ្នាតាមលក្ខណៈទន្សោងគោព្រៃ៕
