ភ្នំពេញ ៖ ទីតាំងប្រមូល និងកត់ឆ្នោតវៀតណាមខុសច្បាប់ដ៏ធំ ស្ថិតនៅផ្ទះល្វែង ផ្លូវឌឿងហែម លេខ១៣៩ ខាងត្បូងស្តុបអូឬស្សីសង្កាត់អូរឬស្សី ៣ ខណ្ឌ៧ មករា រាជធានីភ្នំពេញ ត្រូវបានប្រជាពលរដ្ឋស្គាស់ថា ជារបស់ ឈ្មោះ កែវ ចំរើន ហៅព្រីង ដែលមាននាមសម្ងាត់ M99 ។ នេះជាទីតាំងមួយ ក្នុងចំណោមទីតាំងប្រហែល១០០កន្លែង និងកូនកញ្ច្រែងរាប់រយទៀត ។
ប្រភពពីសមត្ថកិច្ចចូលនិវត្តម្នាក់បានឱ្យដឹងថា នៅតាមទីតាំងកត់ឆ្នោតវៀតណាមខុសច្បាប់ ទូទាំងរាជធានីភ្នំពេញ ជាពិសេសនៅតាមតំបន់ទីប្រជុំជន ឬផ្សារជាដើម ដែលគេដាក់រហ័សនាម M99 គឺជារបស់ លោក កែវ ចំរើន ហៅព្រីង ដែលល្បីថាជាមន្រ្តីផង ។
ម្នាក់នេះ មានអំណាចណាស់ ពុំមាននរណា ហ៊ានបង្ក្រាបនោះទេ ។ អ្នកកត់ឆ្នោតនានា ឬកូនកញ្ច្រែង (អ្នកកត់ស៊ីប្រាក់ខែ) គ្រាន់តែប្រាប់ថា កូនចៅមេ ព្រីងM99 នោះសមត្ថកិច្ច នឹងដើរចេញវិញភ្លាម ។
ហើយអ្វីដែលសំខាន់ទៀតនោះកន្លងមកគេសង្កេតឃើញថា បទល្មើសចោរកម្មក៏កើតមាន នៅក្នុងមូលដ្ឋានខណ្ឌខណ្ឌ៧មករា ដូចជាចោរឆក់ ចោរលួច ចោរប្លន់ គាស់ផ្ទះយកទ្រព្យសម្បតិរបស់បងប្អូនប្រជាពលរដ្ឋជាដើម គឺអាចកើតចេញពីល្បែងស៊ីសងទាំងនេះឯង។
ពាក់ព័ន្ធនឹងករណីនេះដែរប្រជាពលរដ្ឋបានសុំណូមពរដល់អាជ្ញាធរពាក់ព័ន្ធទាំងអស់ជាពិសេស លោក អភិបាលនៃគណៈអភិបាលខណ្ឌ៧មករា និង លោក អធិការនគរបាលខណ្ឌ មេត្តាចុះពិនិត្យ និងបង្ក្រាបទីតាំងដែលបើកបង្កប់នូវល្បែងនេះផង ដើម្បីឲ្យស្របតាមគោលនយោបាយភូមិ សង្កាត់ មានសុវត្ថិភាពទាំង៩ ចំណុចរបស់រាជរដ្ឋាភិបាលដែលបានដាក់ចេញ។
សូមរំលឹកថា លោក ឃួង ស្រេង អភិបាលនៃគណៈរាជធានីភ្នំពេញ ធ្លាប់បានប្រជុំឲ្យអាជ្ញាធរ និងសមត្ថកិច្ចទាំង១៤ខណ្ឌ ត្រូវតែបង្ក្រាបឲ្យអស់រាល់ល្បែងស៊ីសងគ្រប់ប្រភេទនៅក្នុងទឹកដីរបស់ខ្លួន ។ កន្លងមកមានទីតាំងមួយចំនួនដែលបង្កប់ល្បែងស៊ីសង ក្នុងមូលដ្ឋាន ខណ្ឌ៧មករា គេសង្កេតឃើញអាជ្ញាធរពាក់ព័ន្ធតែងតែចុះបង្ក្រាប ប៉ុន្តែផ្ទុយទៅវិញនៅមានទីតាំង បើកលួចលាក់ល្បែងស៊ីសងខុសច្បាប់មួយចំនួនទៀតនៅក្នុងមូលដ្ឋានខណ្ឌ៧មករា។
ជាក់ស្ដែង ទីតាំងកត់ឆ្នោតវៀតណាមលោក កែវ ចំរើន ហៅព្រីង នៅខណ្ឌ៧មករា ជាច្រើនកន្លែង បើករកស៊ីយ៉ាងកាក់កប មិនទាន់ឃើញមានការបង្ក្រាបនោះទេ៕
