ខេត្ដកំពង់ចាម៖អភិបាលខេត្តកំពង់ចាម និងជាប្រធានសាខាកាកបាទក្រហមខេត្ត ឯកឧត្តម អ៊ុន ចាន់ដា នៅថ្ងៃទី ១៧ ខែវិច្ឆិកាឆ្នាំ២០២០ នេះ បានចាត់អោយ លោកជំទាវ ប៉ាង ដានី អនុប្រធានអចិន្ត្រៃយ៍សាខា អមដំណើរដោយ លោកនាយកប្រតិបត្តិសាខា លោក ទុន ណេត ប្រធានកិត្តិយសអនុសាខាស្រុក សប្បុរសជន និង អ្នកស្ម័គ្រចិត្តភូមិ បានអញ្ជើញចុះសួរសុខទុក្ខ និង នាំយក អំណោយមនុស្សធម៌ ទៅផ្តល់ជូនពលរដ្ឋ ២ គ្រួសារ ដែលរងគ្រោះដោយអគ្គីភ័យ រស់នៅភូមិត្រពាំងឈូក ឃុំមេសរជ្រៃ ស្រុកស្ទឹងត្រង់ ។
ស្ថិតក្នុងពេលជំនួបជាមួយនិងប្រជាពលរដ្ឋ រងគ្រោះដោយអគ្គីភ័យនោះ លោកជំទាវ ប៉ាង ដានី បានចូលរួមសម្តែងការសោកស្តាយ ចំពោះឧប្បត្តិហេតុ មិននឹកស្មានដល់នេះ ដែលបានបំផ្លាញលំនៅដ្ឋាន និងទ្រព្យសម្បត្តិ ដែលខំសន្សំច្រើនឆ្នាំកន្លងមក អស់គ្មានសល់ ។
ទន្ទឹមនឹងនោះដែរ លោកជំទាវ បានពាំនាំនូវប្រសាសន៍ផ្តាំផ្ញើសួរសុខទុក្ខ ដោយក្តីអាណិតអាសូរបំផុត ពីសំណាក់ ឯកឧត្តម អ៊ុន ចាន់ដា ប្រធានគណៈកម្មាធិការសាខា និង ឯកឧត្តម ហ៊ុន ណេង ប្រធានកិត្តិយសសាខា ពិសេស សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចជាកាល សម្តេចតែងតែបារម្ភ អំពីសុខទុក្ខរបស់បង ប្អូនប្រជាពលរដ្ឋនៅគ្រប់ទីកន្លែង រួមទាំងជនរងគ្រោះ ជនងាយរងគ្រោះ ដោយមិនប្រកាន់វណ្ណៈ ជាតិសាសន៍ ឬនិន្នាការនយោបាយអ្វីឡើយ ហើយតែងបានចាត់តំណាង នាំយកជំនួយសង្គ្រោះបន្ទាន់ ជួយសម្រាលទុក្ខលំបាក ជូនជនរងគ្រោះ ទាន់ពេលវេលា តាមទិសស្លោក ” កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា ដោយមិនទុកនរណាម្នាក់ចោល ” ។
ជាមួយគ្នានោះដែរ លោកជំទាវ អនុប្រធានអចិន្ត្រៃយ៍សាខា បានអំពាវនាវដល់បងប្អូន ប្រជាពលរដ្ឋទាំងអស់ ត្រូវតែមានការប្រុងប្រយ័ត្នខ្ពស់ ពីគ្រោះអគ្គីភ័យ ដែលអាចកើតមានគ្រប់ពេល ប្រសិនបើ មានការធ្វេសប្រហែស។ពិសេស ពេលចេញពីផ្ទះ ត្រូវបិទកុងតាក់ភ្លើងអគ្គិសនី ពន្លត់ ភ្លើងចង្ក្រាន ពន្លត់ទៀនធូប រួមទាំង ការបិទបើកហ្គាស ក៏ត្រូវប្រយ័ត្នប្រយែង ដើម្បីការពារកុំអោយកើតមានមហន្តរាយផ្សេង ៗ ។
ម្យ៉ាងទៀត ការ ត ភ្ជាប់ចរន្តអគ្គិសនី ក៏ត្រូវពិនិត្យរៀបចំ អោយបានត្រឹមត្រូវ តាមបទដ្ឋានបច្ចេកទេស ផងដែរ ។
ផ្នែកសុខភាព លោកជំទាវ បានក្រើនរំលឹកបងប្អូនប្រជាពលរដ្ឋទាំងអស់ ពិសេស ទារក កុមារ និងមនុស្សវ័យចាស់ ដែលមានហានិភ័យខ្ពស់ សូមលើកកំពស់ការថែទាំសុខភាព ឱ្យបានល្អ រស់នៅត្រូវប្រកាន់ខ្ជាប់អនាម័យស្អាត ៣យ៉ាង ក្នុងស្ថានភាពអាកាសធាតុត្រជាក់នៃរដូវរងា នេះ គឺត្រូវបង្កើនការការពារខ្លួនជាប្រចាំ ដោយត្រូវអនុវត្តអោយបានខ្ជាប់ខ្ជួនតាមសារអប់រំ របស់ក្រសួងសុខាភិបាល ជាអាទិ៍ ការលាងសំអាតដៃញឹកញាប់, ការប្រើក្រម៉ា ការពាក់ម៉ាស់ ពេលចាំបាច់ , ការរក្សានូវគម្លាតសុវត្ថិភាពសង្គម និងសុវត្ថិភាពបុគ្គល ដើម្បី ជៀសអោយផុតពីការឆ្លងនៃជម្ងឺកូវីដ ១៩ ដ៏កាចសាហាវ នេះ ។
សូមបញ្ជាក់ថា អំណោយមនុស្សធម៌ ដែលផ្តល់ជូន ក្នុង ១គ្រួសារ រួមមាន ៖ អង្ករ ៥០ គក្រ, មីយើង ១កេស, ត្រីខ ១យួរ , ទឹកត្រី ១យួរ ,ទឹកស៊ីអ៊ីវ ១យួរ, ឃីត (មុង ភួយ សារុង ក្រម៉ា ) ១កញ្ចប់, តង់ ១, អាវយឺត ៨, សម្ភារដំណេក និង សម្ភារ ផ្ទះបាយ ១ សម្រាប់ ព្រមទាំងថវិកាចំនួន ១លាន រៀល ។
ដោយឡែក អនុសាខាស្រុក ក៏បានផ្តល់ជូន ៖ អង្ករ ៥០គក្រ, មី ១កេស, ទឹកត្រី ១យួរ, ទឹកស៊ីអ៊ីវ ១យួរ, ឃីត ១, សម្ភារផ្ទះបាយ ១សម្រាប់ និងថវិកា ចំនួន ១០ ម៉ឺនរៀល ថែមទៀត ។
ភ្ជាប់ជាមួយអំណោយខាងលើ លោកជំទាវ ខុង ស៊ុនអេង, លោកជំទាវ កុល ធារិន និងលោកជំទាវ ស្រី គឹមឆយ ក៏បាននាំយកអំណោយ ឯកឧត្តម ហ៊ុន ណេង ផ្តល់ជូនបន្ថែម ដល់គ្រួសាររងគ្រោះ ផងដែរ ដែល ក្នុង ១គ្រួសារ ទទួល បាន ៖ អង្ករ ២៥គក្រ, មី ១កេស, ទឹកត្រី ១យួរ, ទឹកស៊ីអ៊ីវ ១យួរ , ត្រីខ ១០ កំប៉ុង , ប្រេងឆា ២លីត្រ, ទឹកសុទ្ធ ១កេស, អំបិល ១គក្រ,ស្ករស ១គក្រ, សាប៊ូម្សៅ ២ថង់, សាប៊ូដុំ ១ប្រអប់,ក្រម៉ា ១, មុង ១ , និងថវិកាចំនួន ៥០ ម៉ឺនរៀលផងដែរ ៕ដោយ៖ នួន សត្យា
