ខេត្តរតនគិរី ៖ឯកឧត្តមមានប្រសាសន៍នៅក្នុងវេទិកាផ្សព្វផ្សាយ និង ពិគ្រោះយោបល់របស់ក្រុមប្រឹក្សាខេត្ត លើកទី២ អាណត្តិទី៣ ឆ្នាំ ២០២០
ដែលរៀបចំធ្វើឡើងកាលពីព្រឹកថ្ងៃទី១៦ ខែវិច្ឆិកា ឆ្នាំ២០២០នៅស្រុកអូរជុំ ឯកឧត្តម ថង សាវុន អភិបាលខេត្តរតនគិរី បានជំរុញដល់អាជ្ញាធរមូលដ្ឋានគ្រប់លំដាប់ថ្នាក់យកចិត្តទុកដាក់ក្នុងការអនុវត្តគោលនយោបាយភូមិឃុំមានសុវត្ថិភាព ជាពិសេសត្រូវតែពន្លឿនក្នុងការដោះស្រាយបញ្ហាជូនប្រជាពលរដ្ឋដែលកំពុងជួបប្រទះដូចជា៖ ការផ្តល់សេវាសាធារណៈ ការធ្វើអត្តសញ្ញាណប័ណ្ណ ,ការងារអត្រានុកូលដ្ឋាន ការរៀបចំសណ្តាប់ធ្នាប់សាធារណ: និងសំណង់ បរិស្ថានអនាម័យ , និងទំនាស់ដីធ្លី អោយបានឆាប់រហ័ស និង ត្រូវខិតខំយកចិត្តទុកដាក់ក្នុងការបម្រើសេវាសាធារណៈជូនបងប្អូនប្រជាពលរដ្ឋក្នុងមូលដ្ឋានរបស់ខ្លួនឱ្យបានល្អ ហើយធ្វើឱ្យលឿន និងមានតម្លាភាព ។
ឯកឧត្តម ថង សាវុន ក៏បានធ្វើការជម្រុញផងដែរដល់អាជ្ញាធរមូលដ្ឋានគ្រប់លំដាប់ថ្នាក់ ត្រូវបន្តចូលរួមអោយបានសកម្មក្នុងផ្សព្វផ្សាយការទប់ស្កាត់ការរីករាលដាលនៃជំងឺកូវីដ-១៩ តាមមូលដ្ឋានរបស់ខ្លួនឱ្យបានស៊ីជម្រៅដល់ស្រទាប់មហាជនទូទៅ។
ពិសេសត្រូវអនុវត្តន៍តាមការណែនាំរបស់ក្រសួងសុខាភិបាល ក្នុងការបង្ការទប់ស្កាត់ ការពារឆ្លងរីករាលដាលចូលមកក្នុងសហគមន៍។
ឯកឧត្តម ណាប់ ប៊ុនហេង ប្រធានក្រុមប្រឹក្សាខេត្តដែលបានអញ្ជើញជាអធិបតីភាពក្នុងវេទិកានេះ បានលើកឡើងថាវេទិកានេះរៀបចំឡើងក្នុងគោលបំណងដើម្បីឲ្យប្រជាពលរដ្ឋបានស្តាប់នូវរបាយការណ៍ស្តីពី សមិទ្ធផលដែលសម្រេចបាន និងផែនការសកម្មភាពសម្រាប់អនុវត្តនៅឆ្នាំបន្តបន្ទាប់ទៀតរបស់រដ្ឋបាលខេត្ត ផ្ដល់ឱកាសជូនប្រជាពលរដ្ឋ និង អ្នកពាក់ព័ន្ធទាំងអស់ បានបព្ចោញមតិរបស់ខ្លួន ពាក់ព័ន្ធនឹងក្ដីកង្វល់ សំណូមពរ និង តម្រូវការជាក់ស្ដែងក្នុងមូលដ្ឋាន ដើម្បីឲ្យអាជ្ញាធរដែនដី និង មន្ទីរពាក់ព័ន្ធ ធ្វើការដោះស្រាយ និងឆ្លើយតបរាល់តម្រូវការទាំងនោះ។
ជាពិសេសពង្រឹងការចូលរួមរបស់ប្រជាពលរដ្ឋ លើការអភិវឌ្ឍន៍នៅតាមមូលដ្ឋានឲកាន់តែល្អប្រសើរឡើង និង ដើម្បីឆ្លើយតបទៅនឹងគោលការណ៍នៃការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ។
ឯកឧត្តម ប្រធានក្រុមប្រឹក្សាបានស្នើដល់មន្ទីរអង្គភាពពាក់ព័ន្ធត្រូវធ្វើការឆ្លើយតប ទៅនឹង ក្តីកង្វល់ បញ្ហាប្រឈម ក៏ដូចជាសំណូមពរនានារបស់ប្រជាពលរដ្ឋដែលបានលើកឡើងក្នុងអង្គវេទិកាដើម្បីអោយប្រជាពលរដ្ឋមានជំនឿចិត្តមកលើការដឹកនាំរបស់អាជ្ញាធរគ្រប់លំដាប់ថ្នាក់ដែលជាអ្នកបម្រើពួកគាត់ប្រកបដោយភាពស្មោះត្រង់នឹងការទទួលខុសត្រូវ៕
