ភ្នំពេញ ៖ យុវជន២នាក់បានស្លាប់ និងម្នាក់ទៀតរងរបួសធ្ងន់ បន្ទាប់ពីជិះម៉ូតូទៅបុករថយន្តពីក្រោយ ដែលកំពុងចតស្ងៀមលើដងផ្លូវបង្កឱ្យមានការភ្ញាក់ផ្អើល ។
ហេតុការណ៍នេះបានកេីតឡេីងកាលពីវេលា ម៉ោង២និង៣០នាទី យប់រំលងអធ្រាត្រ ឈានចូលថ្ងៃសុក្រ ទី២០ ខែវិច្ឆិកា ឆ្នាំ២០២០ ផ្លូវបេតុង ភូមិចោមចៅ១ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
ដោយជនរងគ្រោះដែលស្លាប់ទី១ មានឈ្មោះ ហោល ថេង អាយុ២១ឆ្នាំ ធ្វើការនៅសិប្បកម្មទឹកកក មានស្រុកកំណើតនៅ កំពង់ត្រាចខេត្តកំពត ទី២មានឈ្មោះ ផេងអាយុ២២ឆ្នាំ មានស្រុកកំណើត នៅខេត្តកំពង់ស្ពឺ ទី៣អ្នករងរបួសមានឈ្មោះ រ៉ូ អាយុ២២ឆ្នាំ មុខរបរដូចគ្នាទាំង៣ ។ អ្នកទាំង៣ ជិះម៉ូតូម៉ាកឌ្រីមសង់ ពណ៌ខ្មៅ ស៊េរីឆ្នាំ២០០៧ ពាក់ស្លាកលេខ តាកែវ1C-3687 ចំណែកខាងរថយន្តប្រភេទសណ្តោងរុឺម៉ក ក្បាលពណ៌ស ពាក់ស្លាកលេខកំពង់ស្ពឺ 3A-1534 ខាងក្រោយពណ៌ស លាយក្រហម ពាក់ស្លាក លេខព្រះសីហនុ4A-3896 ។
សាក្សីត្រូវជាមិត្តភក្តិក្រុមរងគ្រោះនិយាយថា ពួកគាត់បានជួបជុំគ្នា ផឹកស៊ីស្រាក្រឡុក នៅផ្លូវចោមចៅអតីតផ្លូវវ៉េងស្រេង ពេលរួចរាល់ក៏ បានខ្ចីម៉ូតូមិត្តភក្កិ ដឹកគ្នាទៅកន្លែងស្នាក់នៅ ដោយសារតែភាពស្រវឹង ហើយបើកលឿនពេក គួបផ្សំផ្លូវងងឹត និងរថយន្តចតលើដងផ្លូវផង ក៏បានទៅបុករថយន្តខាងលើ ចំពីក្រោយពេញទំហឹងតែម្ដង បណ្ដាលស្លាប់២នាក់ របួសធ្ងន់ម្នាក់ ( អង្គុយខាងក្រោយ) ។
ពេលកើតហេតុភ្លាមៗ រថយន្តខាងលើ បានបើកចេញពីចំណុចកើតហេតុ ប្រហែល១០០ម៉ែត្រ ហើយតៃុងបានបន្ត ដេក ហើយធ្វើពុតជាមិនដឹង ប៉ុន្តែបានសន្តិសុខម្នាក់ ឃើញហេតុការណ៍ផ្ទាល់ ក៏ប្រាប់ប៉ូលិស នាំខ្លួនតៃកុងឡាន ព្រោះការចតឈប់បែបនេះ វាខុសច្បាប់ចរាចរ ។ ម៉ូតូនិងរថយន្តត្រូវសមត្ថកិច្ច យកទៅរក្សាទុក រង់ចាំដោះស្រាយគ្នានៅពេលក្រោយ ៕
