ខេត្ដស្វាយរៀង៖នៅថ្ងៃទី២៧ ខែវិច្ឆិកា ឆ្នាំ២០២០ឯកឧត្ដម តូច ប៉ូលីវ៉ា អភិបាលរងខេត្ត តំណាងឯកឧត្ដមអភិបាលខេត្តស្វាយរៀង អញ្ជើញដឹកនាំកិច្ចប្រជុំផ្សព្វផ្សាយផែនការការពារសន្តិសុខ សុវត្ថិភាព និងសណ្ដាប់ធ្នាប់របៀបរៀបរយសម្រាប់ដំណើរការប្រឡងសញ្ញាបត្រមធ្យមសិក្សាទុតិយភូមិ ថ្ងៃទី២១ ធ្នូ ២០២០ នៅសាលប្រជុំស្នងការដ្ឋាននគរបាលខេត្ត។
កិច្ចប្រជុំនេះមានការចូលរួមពីលោកឧត្ដមសេនីយ៍ វរៈសេនីយ៍ ស្នងការរងនគរបាលខេត្ត មេបញ្ជាការរងកងរាជអាវុធហត្ថខេត្ត លោកវរៈសេនីយ៍ អនុសេនីយ៍នាយ នាយរងការិយាល័យ នាយផ្នែក លោកអភិបាលក្រុងស្វាយរៀង អភិបាលរងស្រុកស្វាយជ្រំ លោកប្រធានមន្ទីរ អនុប្រធានមន្ទីរ អង្គភាពពាក់ព័ន្ធ លោកនាយកទីចាត់ការសាលាខេត្ត លោកអធិការនគរបាលក្រុងស្វាយរៀង និងស្រុកស្វាយជ្រំ លោកប្រធានមន្ទីរពេទ្យបង្អែកស្វាយរៀង តំណាងទីចាត់អន្តរវិស័យសាលាខេត្ត លោក លោកស្រីនាយក នាយិកាវិទ្យាល័យ ហ៊ុនសែន ស្វាយជ្រំ វិទ្យាល័យស្វាយរៀង ខាងជើង និងខាងត្បូង សាលាគរុកោសល្យ និងវិក្រឹត្យការខេត្ត និងសាលាបឋមសិក្សាកន្ទុយវ៉ៃ សាលាបឋមសិក្សា ២ធ្នូនិងសាលាបឋមសិក្សាព្រះសីហនុ សរុបវត្តមានអ្នកចូលរួម ៥៥នាក់ ស្រី ៣នាក់។
ជាមួយគ្នានេះដែរ ឯកឧត្ដមអភិបាលរងបានសំណូមពរ និងដាក់ទិសដៅដូចខាងក្រោម៖
១.ស្នើឲ្យមន្ទីរសុខាភិបាល ត្រូវរៀបចំអ្នកត្រួតពិនិត្យកម្ដៅ បាញ់អាល់កុល ចែកម៉ាស ដល់បេក្ខជន និងរៀបចំក្រុមគ្រូពេទ្យសង្គ្រោះបន្ទាន់ និងរថយន្តសង្គ្រោះ សម្រាប់ដាក់នៅកន្លែងទីតាំងមណ្ឌលប្រឡង ទាំងថ្ងៃពិនិត្យឈ្មោះ និងថ្ងៃប្រឡង ក្នុងនោះត្រូវមានស្រោមដៃសម្រាប់ក្រុមគ្រូពេទ្យប្រើប្រាស់ លើសពីនេះមន្ទីរសុខាភិបាល រៀបចំមន្ត្រីចុះបាញ់ថ្នាំសម្លាប់មេរោគ អោយបានមុនពេលប្រឡង
២.ស្នើឲ្យមន្ទីរអយក ត្រូវរៀបចំក្ដារខៀនសម្រាប់បិទឈ្មោះបេក្ខជន នៅតាមមណ្ឌលប្រឡងឲ្យបានយ៉ាងតិចចំនួន ៣ក្នុង១មណ្ឌល និងត្រូវរៀបចំក្រុមការងារត្រួតពិនិត្យកម្ដៅ បាញ់អាល់កុល និងចែកម៉ាស់ផងដែរសម្រាប់បេក្ខជន ដែលត្រូវមកមើលឈ្មោះប្រឡងតាមបន្ទប់ប្រឡង នៅក្នុងមណ្ឌលទាំង៧។ និងត្រៀមស្រោមដៃសម្រាប់អនុរក្ស អប្បមាទ គណៈកម្មការមេប្រយោគ ដែលនៅត្រួតពិនិត្យនៅខាងមុខមណ្ឌល នៅខាងក្នុងបន្ទប់ និងគណៈកម្មការប្រមូលឯកសារ តាមបន្ទប់
៣. សូមខាងស្នងការនគរបាលខេត្ត និងបញ្ជាការដ្ឋានកងរាជអាវុធហត្ថខេត្ត រៀបចំកម្លាំងការពារសន្តិសុខ សុវត្ថិភាព និងរក្សាសន្តិសុខ របៀបរៀបរយតាមមណ្ឌលប្រឡងទាំង៦ ក្នុងស្រុកស្វាយជ្រំ និងក្រុងស្វាយរៀង
៤.ស្នើឲ្យកម្លាំងស្នងការនគរបាលដ្ឋាន និងកងរាជអាវុធហត្ថ ជួយរៀបចំសណ្ដាប់ធ្នាប់ តាមដងផ្លូវ លើផ្លូវ ក៏ដូចជាសុវត្ថិភាពក្នុងមណ្ឌលប្រឡងទាំង៧ រួមមាន៖រៀបចំកម្លាំងនគរបាលចរាចរណ៍ ស្លាកសញ្ញាបន្ថយល្បឿន សាជី នៅខាងមុខមណ្ឌលប្រឡង ជាសម្គាល់ ដើម្បីការពាររៀបចំសុវត្ថិភាពក្នុងការធ្វើដំណើរ រថយន្តតូច ធំ ម៉ូតូ ដែលធ្វើដំណើរឆ្លងកាត់ មានការប្រុងប្រយ័ត្នខ្ពស់ ក៏ដូចជាការធ្វើដំណើររបស់បេក្ខជន មានសភាពងាយស្រួលផងដែរ។
៥.ចំពោះប្រធានការពារសន្តិសុខតាមមណ្ឌលនិមួយៗត្រូវទទួលខុសត្រូវនៅតាមមណ្ឌលដែលខ្លួនទទួលខុសត្រូវ ព្រមទាំងមានវត្ត មានប្រចាំការ ចំនួន ២ថ្ងៃ នៃថ្ងៃប្រឡងមធ្យមសិក្សាទុតិយភូមិ ចាប់ពីដំណើរការប្រឡង រហូតដល់ពេលបញ្ចប់ វេចខ្ចប់វិញ្ញាសាដឹកត្រឡប់មកខេត្ត
៥.គណៈអភិបាលក្រុង ស្រុកទាំង២ ត្រូវរៀបចំវាយតម្លៃកំណត់តម្លៃផ្ញើជាមួយអ្នកផ្ញើម៉ូតូ និងរកកន្លែងសមស្រមផ្ញើរម៉ូតូ នៅតាមមណ្ឌលនិមួយៗដែលនៅជិត
៦.គណៈអភិបាលស្រុក ក្រុងទាំង២ ត្រូវរៀបចំសហការជាមួយកងកម្លាំងដើម្បីណែនាំ និងជួយទប់ស្កាត់ឪពុក ម្ដាយ អាណាព្យាបាលសិស្ស កុំឲ្យមានការប្រមូលម្ដុំនៅខាងមុខមណ្ឌលប្រឡង និងឈរនៅខាងមុខរបងមណ្ឌលប្រឡង ជាដាច់ខាតដើម្បីចូលរួមការពារ ទប់ស្កាត់ ការរីលរាលដាលនៃជំងឺកូវីដ១៩ ផងដែរ៕
