ខេត្ដកំពង់ធំ៖ ដោយអនុវត្តតាមការណែនាំរបស់ក្រសួងសុខាភិបាល និងសេចក្តីណែនាំរបស់អគ្គបញ្ជាការដ្ឋាន នៃកងយោធពលខេមរភូមិន្ទ និងសេចក្តីណែនាំរបស់បញ្ជាការដ្ឋានយោធភូមិភាគទី៤ នៃបញ្ជាការដ្ឋានកងទ័ពជើងគោក ក្នុងវិធានការការពារទប់ស្កាត់ ការឆ្លងរីករាលដាលជំងឺកូវីដ-១៩ ព្រឹត្តិការណ៍(សហគមន៍២៨វិច្ឆិកា) ឱ្យមានប្រសិទ្ធភាពខ្ពស់។ នៅព្រឹកថ្ងៃទី០១ ខែធ្នូ ឆ្នាំ២០២០ តំបន់ប្រតិបត្តិការសឹករងកំពង់ធំ បានចាត់តាំងក្រុមគ្រូពេទ្យ និងក្រុមបច្ចេកទេសពេទ្យ បានបាញ់ថ្នាំសម្លាប់មេរោគនៅតាមអាគារធ្វើការរបស់ថ្នាក់ដឹកនាំ មេបញ្ជាការ មេបញ្ជាការរង នាយសេនាធិការ សាលប្រជុំតូច-ធំ តាមការិយាល័យ ផ្នែក និងស្ថាប័នចំណុះក្នុងបរិវេណបញ្ជាការដ្ឋានតំបន់ប្រតិបត្តិការសឹករងកំពង់ធំ។
ជាមួយគ្នានោះផងដែរ បានចាត់តាំងក្រុមគ្រូពេទ្យផែ្នកសុខាភិបាល និងគិលានដ្ឋាន បានធ្វើការត្រួតពិនិត្យវាស់ស្ទង់កំដៅ បាញ់ទឹកអាកុល និង ទឹកជែលលាងសម្អាតដៃសម្លាប់មេរោគដល់ នាយទាហាន នាយទាហានរង និង ពលទាហាន ដែលមានភារកិច្ចមកបំពេញការងារនៅបញ្ជាការដ្ឋានតំបន់ប្រតិបត្តិការសឹករងកំពង់ធំ មុនពេលចូលមកកាន់កន្លែងធ្វើការតាមមុខជំនាញនីមួយៗ។
ក្នុងឱកាសនេះដែរ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានធ្វើការផ្សព្វផ្សាយ នូវសារសម្លេងណែនាំរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក៏ដូចជាសេចក្តីណែនាំលេខ ០០៧ សណន របស់អគ្គមេបញ្ជាការ នៃកងយោធពលខេមរភូមិន្ទ និងសេចក្តីណែនាំលេខ ៣០១ សណន របស់បញ្ជាការដ្ឋានយោធភូមិភាគទី៤ ស្ដីពីការបង្ការការពារ និងទប់ស្កាត់ការឆ្លងរីករាលដាល នៃជំងឺកូវីដ-១៩ ក្នុងដំណាក់កាលនៃព្រឹត្តិការណ៍(សហគមន៍២៨វិច្ឆិកា) និងបានចែកម៉ាស៤ ស្រទាប់ចំនួន ៥,000ម៉ាស និងទឹកអាកុលសម្រាប់លាងសម្អាតដៃសម្លាប់មេរោគចំនួន១០០ដប ជូនដល់ថ្នាក់ដឹកនាំ នាយការិយាល័យ ផ្នែក ស្ថាប័នចំណុះ ដើម្បីយកទៅផ្សព្វផ្សាយ និងចែកជូនយោធិនក្រោមឱវាទ ក៏ដូចជាក្រុមគ្រួសារ បានប្រើប្រាស់ក្នុងកិច្ចការពារ ទប់ស្កាត់ ការឆ្លងរីករាលដាលជំងឺកូវីដ-១៩ នេះ។
ឧត្តមសេនីយ៍ទោ សោម ស៊ុន បានធ្វើការសំណូមពរដល់ថ្នាក់ដឹកនាំគ្រប់លំដាប់ថ្នាក់ ត្រូវផ្សព្វផ្សាយដល់យោធិនឲ្យបានគ្រប់ៗគ្នា ដើម្បីធ្វើយ៉ាងណាទប់ស្កាត់កូនចៅក្នុងក្រុមគ្រួសាររបស់ខ្លួន ចៀសវាងចេញទៅក្រៅផ្ទះ ដោយត្រូវរងចាំមួយរយៈសិនបើគ្មានការចាំបាច់។ និងត្រូវអនុវត្តឲ្យបានខ្ជាប់ខ្ជួនតាមការណែនាំរបស់ក្រសួងសុខាភិបាល ដូចជា ពាក់ម៉ាស ,លាងសម្អាតដៃជាមួយសាប៊ូ ឬទឹកអាកុល នឹង រក្សាគម្លាតសុវត្ថិភាព។
យោធិនទាំងអស់ចំណុះឲ្យទីបញ្ជាការតំបន់ប្រតិបត្តិការសឹករងកំពង់ធំ បានប្ដេជ្ញាចិត្តយ៉ាងម៉ឺងម៉ាត់ ក្នុងការគោរពអនុវត្តបទបញ្ជារបស់សម្ដេចអគ្គមហាសេនាបតីតេជោ ហ៊ុន សែន ក៏ដូចជាសេចក្តីណែនាំរបស់ថ្នាក់លើគ្រប់លំដាប់ថ្នាក់ និងសេចក្តីណែនាំរបស់ក្រសួងសុខាភិបាល ដើម្បីចូលរួមក្នុងការទប់ស្កាត់ការឆ្លងរីករាលដាលជំងឺកូវីដ-១៩ ក្នុងដំណាក់ នៃព្រឹត្តិការណ៍(សហគមន៍២៨ វិច្ឆិកា)នេះឲ្យទទួលបានជោគជ័យ ៕
