ខេត្តបន្ទាយមានជ័យ៖ ក្រោយពីទទួលព័ត៌មានមកថា មានជនពិបាកម្នាក់ ឈ្មោះ ភ័ក្រ សុង ហៅ គួក អាយុ២២ ឆ្នាំ រស់នៅភូមិ ព្រៃគប់ សង្កាត់ ផ្សារកណ្តាល ក្រុង ប៉ោយប៉ែត ខេត្តបន្ទាយមានជ័យ ដែលកំពុងមានជីវភាព ខ្វះខាត និង រទេះជិះ របស់គាត់ មានសភាពចាស់ និង ខូចកង់ ពិបាក ជិះ ឬធ្វើដំណើរ លោក នួន នីគីដា បានធ្វើការផ្សព្វផ្សាយបន្ត បន្ទាប់មកមានសប្បុរសនៅក្នុងក្រុងប៉ោយប៉ែត បានជួយឧបត្ថម្ភ រទេះថ្មីជូនលោក ភ័ក្រ សុង តាមរយៈលោក នួន នីគីដា ។តាមប្រភពពីប្រជា ពលរដ្ឋ បានឲ្យដឹងថា លោក ភ័ក្រ សុង ត្រូវពិការជើងបែបនេះដោយសារតែ ឆក់ ខ្សែភ្លើង និង គ្រោះថ្នាក់ចរាចរណ៍។ ដោយបច្ចុប្បន្ននេះលោក ភ័ក្រ សុង រស់នៅតែលតោលម្នាក់ឯង រីឯឪពុកម្តាយ បានចំណាកស្រុក ទៅធ្វើការ នៅឯប្រទេសថៃ។
បន្ទាប់ពីលោក នួន នីគីដា បានទទួលរទេះពីសប្បុរសជន នៅរសៀលថ្ងៃទី ០៤ ខែធ្នូ ឆ្នាំ២០២០ លោក បានដឹកនាំក្រុមការងារ ទៅជួបជាមួយអាជ្ញាធរភូមិព្រៃគប់ គឺលោក ឈិត រ៉ម មានតួនាទីជាអនុប្រធានភូមិ ដើម្បីនាំទៅផ្ទះលោក ភ័ក្រ សុង ហៅ( គួក ) ជូនរទេះថ្មីដល់គាត់ ។ ក្នុងនោះដោយឃើញបុរសជាជនពិការមានជីវភាពលំបាកលោក នួន នីគីដា បានបរិច្ចាគថវិការផ្ទាល់ខ្លួនចំនួន ១០០០០០៛ (មួយសែនរៀល) បន្ថែមទៀត ដើម្បីទុកដោះបញ្ហាជីវភាពប្រចាំថ្ងៃផងដែរ។
ក្រោយពីទទួលបានរទេះថ្មីលោក ភ័ក្រ សុង មានរំភើបនិងសប្បាយចិត្តក្រៃលេង ព្រមទាំងអរគុណលោក នួន នីគីដា និង សប្បុរសជនដែលបានជួយឧបត្ថម្ភរទេះឲ្យជួបតែសេចក្តីសុខ ព្រមទងជោគជ័យគ្រប់ភារៈកិច្ចផងដែរ៕ដោយ៖លោកចាន់ពុធ
