ភ្នំពេញ៖ សមត្ថកិច្ចខណ្ឌពោធិ៍សែនជ័យបានឲ្យដឹងថា ករណីគាស់ឃ្លាំង(រោងចក្រ)នៅខណ្ឌពោធិ៍សែនជ័យ យកលុយប្រមាណជា៣០ម៉ឺនដុល្លារ ហើយមកសំងំលាក់ខ្លួននៅស្រុកបាភ្នំគឺជាមន្ត្រីយោធានៅស្រុកពាមជ័រ។
ប្រភពដដែលបានបន្តទៀតថានេះជាមុខសញ្ញាគាស់ឃ្លាំងរោងចក្រ នៅភ្នំពេញម្នាក់ ក្នុងចំណោមបក្សពួកច្រើននាក់ត្រូវបាននគរបាលខេត្តព្រៃវែង សហការជាមួយនគរបាលខណ្ឌពោធិ៍សែនជ័យស្រាវជ្រាវឈានដល់ការ ឃាត់ខ្លួន។
សមត្ថកិច្ចបានឲ្យដឹងទៀតថា ជនសង្ស័យរូបនេះឃាត់ខ្លួនបាននៅភូមិស្ដៅ ឃុំធាយ ស្រុកបាភ្នំ ខេត្តព្រៃវែង កាលពីល្ងាចថ្ងៃទី០៤ខែធ្នូ ឆ្នាំ២០២០។
ជនសង្ស័យឈ្មោះ អ៊ែល វិបុល ភេទប្រុស អាយុ ៤២ឆ្នាំមុខរបរ មិនពិតប្រាកដ មានស្រុកកំណើត នៅភូមិតាហុយ ឃុំ កំពង់ប្រាសាទ ស្រុកពាមជ័រ ខេត្តព្រៃវែង។
ក្រោយឃាត់ខ្លួនសមត្ថកិច្ចចាប់យកវត្ថុតាងរួមមាន៖
រថយន្តម៉ាក ហាយឡែនឌ័រ ពណ៌ ស ពាក់ស្លាកលេខ ភ្នំពេញ 2AY 8793 ចំនួន១គ្រឿង និងកាំភ្លើងខ្លី១ដើម ម៉ាក K54 បង់ចំនួន២បង់ គ្រាប់១៦គ្រាប់។
សមត្ថកិច្ចបានឲ្យដឹងថា៖ ជនសង្ស័យរួមនិងបក្ខពួកបានធ្វើសកម្មភាពលួចគាស់(ឃ្លាំងរោងចក្រហេងយ៉ុង) ស្ថិតនៅភូមិក្បាលដំរី២ សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ កាលពីយប់ទី២៦ខែវិច្ឆិការ ឆ្នាំ២០២០ ដោយយកទ្រព្យសម្បត្តិអស់ប្រមាណជាង៣០ម៉ឺនដុល្លារ។
បច្ចុប្បន្ន៖ ជនសង្ស័យរួមនិងវត្ថុតាងត្រូវបាននគរបាលព្រហ្មទណ្ឌខេត្តព្រៃវែង ប្រគល់ទៅឲ្យនគរបាលខណ្ឌពោធិ៍សែនជ័យ ដើម្បីបន្តនីតិវិធីនិងកសាងសំណុំរឿងបញ្ជូនទៅតុលាកា៕
