ខេត្ដបាត់ដំបង ៖ មនុស្សប្រុសស្រី ចំនួន១១នាក់ ត្រូវបានប៉ូលិសខេត្តបាត់ដំបង ឃាត់ខ្លួននាំយកទៅកាន់ស្នងការ ដើម្បីសាកសួរ ពាក់ព័ន្ធករណីប្រតិបត្តិការបង្ក្រាបល្បែងស៊ីសង តាមប្រព័ន្ធអ៊ីនធឺណេត។
មន្ត្រីនគរបាលខេត្ត បានឲ្យដឹងថា ការបង្ក្រាបនេះធ្វើនៅរសៀលថ្ងៃទី១៣ ខែធ្នូម្សិលមិញ ដោយធ្វើចំនួន២ទីតាំង នៅក្នុងក្រុមទី៨ ភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង។ ក្នុងនោះ ក៏បានដកហូតនូវសម្ភារឧបករណ៍មួយចំនួនធំផងដែរ។
មន្ត្រីនគរបាលបានបញ្ជាក់ថា ទីតាំងដែលបានបើកប្រកបមុខរបរអ៊ីនធឺណេត Internet ដែលមានច្បាប់អនុញ្ញាតត្រឹមត្រូវ តែមានលួចលាក់បង្កប់នូវសកម្មភាពល្បែងស៊ីសង ដោយខុសច្បាប់នោះ សមត្ថកិច្ចនឹងចាត់វិធានការបង្រ្កាប និងបញ្ជូនទៅតុលាការផ្តន្ទាទោសតាមផ្លូវច្បាប់។ ដូច្នេះ ម្ចាស់ទីតាំងដែលកំពុងប្រកបមុខរបរនេះ សូមកុំប្រព្រឹត្តសកម្មភាពល្មើសច្បាប់ឱ្យសោះ៕
