ខេត្ដកំពង់ចាម៖ ថវិកាឧបត្ថម្ភ ចំនួន ៣២៦.៧០៤.១០០រៀល (បីរយម្ភៃប្រាំមួយលានប្រាំពីរសែនបួនពាន់មួយរយរៀល) និងប្រាក់ដុល្លារ ៥.៩៩០ដុល្លារ ដែលបានមកពីការចូលរួមចំណែកពីថ្នាក់ដឹកនាំ មន្ត្រីរាជការ ព្រះសង្ឃ សប្បុរសជននានា ក្នុងខេត្តកំពង់ចាម ត្រូវបាន ឯកឧត្តម អ៊ុន ចាន់ដា អភិបាល ខេត្តកំពង់ចាម និងជាប្រធានគណៈកម្មការខេត្តប្រយុទ្ធប្រឆាំងនឹងជម្ងឺកូវីដ-១៩ និងសហការី នាំយកទៅប្រគល់ជូនរាជរដ្ឋាភិបាល កាលពីថ្ងៃទី២៧ ខែធ្នូ ឆ្នាំ២០២០ នេះ ដើម្បី រួមចំណែកទិញវ៉ាក់សាំងការពារវីរុសកូវីដ-១៩ ចាក់ជូនប្រជាពលរដ្ឋកម្ពុជា ក្នុងជំហានដំបូង ។
សូមបញ្ជាក់ថា ការចូលរួមបរិច្ចាគនេះ បានធ្វើឡើងបន្ទាប់ពីសម្តេចតេជោ ហ៊ុន សែន ប្រកាសពីការត្រៀមថវិកាទិញវ៉ាក់សាំងកូវីដ-១៩ មកចាក់ជូនប្រជាពលរដ្ឋ ដោយឥតគិតថ្លៃ ស្របពេលដែលជម្ងឺ ដ៏កាចសាហាវមួយនេះ បានឆ្លងរាលដាលចូលដល់សហគមន៍កម្ពុជានោះ ។
ផ្អែកតាមកាយវិការមនុស្សធម៌នេះ ជាពិសេស ក្នុងទឹកចិត្តខ្មែរ ជួយខ្មែរ ក្នុងគ្រាមានអាសន្ន ក៏ដូចជាវប្បធម៌ នៃការចែករំលែក គេសង្កេតឃើញថា ទាំងថ្នាក់ដឹកនាំ មន្ត្រីរាជការ គ្រប់ជាន់ថ្នាក់ ព្រះសង្ឃគ្រប់ថានានុក្រម បងប្អូនប្រជាពលរដ្ឋ សប្បុរសជននានា ក៏ដូចជា តំណាងអង្គការ សមាគមន៍ និងដៃគូអភិវឌ្ឍ បាននាំគ្នាបរិច្ចាក នូវធនធានថវិកាផ្ទាល់ខ្លួនតាមលទ្ធភាព យកមកប្រគល់ជូនរដ្ឋបាល ខេត្តកំពង់ចាម ជាបន្តបន្ទាប់ ដើម្បី ចូលរួមចំណែកជាមួយរដ្ឋាភិបាល ក្នុងទិញវ៉ាក់សាំងការពារវីរុសកូវីដ-១៩ សម្រាប់ចាក់ជូនប្រជាពលរដ្ឋកម្ពុជា ដោយឥតគិតថ្លៃ ។
សូមរំលឹកថា សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីល្ងាចថ្ងៃទី០៧ ខែធ្នូ ឆ្នាំ២០២០ កន្លងទៅ បានប្រកាសពីការត្រៀមបម្រុងថវិកា សម្រាប់ទិញវ៉ាក់សាំង យកមកចាក់ ជូនប្រជាជនដោយឥតគិតថ្លៃ ជាជំហានដំបូង ចំនួន ១លានដូស ដើម្បី ចាក់ជូនប្រជាពលរដ្ឋប្រមាណ ៥០ម៉ឺននាក់ ៕
