ភ្នំពេញ៖បុរសម្នាក់បានបែកក្បាលស្លាប់នៅនឹងកន្លែងកើតហេតុយ៉ាងអាណោចអាធម្មខណៈកំពុងជិះម៉ូតូត្រូវរថយន្តមួយគ្រឿងមិនចាំម៉ាកបុកពីក្រោយរួចកិនពេញទំហឹង រួចព្យាយាមបើករត់បាត់។
ហេតុការណ៍នេះកើតឡើងកាលពីវេលាម៉ោង០៣និង ១០ នាទីទៀតភ្លឺ ឈានចូលថ្ងៃទី០៧ ខែមករាឆ្នាំ ២០២១ ស្ថិតនៅតាមបណ្ដោយជាតិលេខ៣ ភូមិព្រៃព្រីងងខាងត្បូង១ ជិតនិងកងពលតូចលេខ៧០ ក្នុងសង្កាត់ចោមចៅទី២ ខណ្ឌពោធិ៍សែនជ័យរាជធានីភ្នំពេញ។
នៅក្នុងខ្លួនសពជនរងគ្រោះ សមត្ថកិច្ចឆេកឆេឃើញសញ្ញាណប័ណ្ណ មានឈ្មោះ ខឿន ខាវ ភេទប្រុស អាយុ២២ឆ្នាំ មានស្រុកកំណើត ភូមិព្រៃខ្មៅ ឃុំកន្សោមអក ស្រុកកំពង់ត្របែក ខេត្តព្រៃវែង។
តាមប្រភពព័ត៌មានពីកន្លែងកើតហេតុបានឲ្យដឹងថាមុនកើតហេតុគឺជនរងគ្រោះជិះម៉ូតូម្នាក់ឯងម៉ាកហុងដាឌ្រីមសង់ស៊េរីឆ្នាំ ២០២១ ពណ៌ខ្មៅពាក់ស្លាកលេខភ្នំពេញ1IE-1696ធ្វើដំណើរបណ្ដោយផ្លូវជាតិលេខ៣ ទិសដៅពីត្បូងទៅជើង លុះមកដល់ចំណុចកើតហេតុខាងលើផ្លូវងងឹងផង ក៏មានរថយន្តក្រឡុកស៊ីម៉ង់ត៍មួយគ្រឿងមិនចាំស្លាកលេខធ្វើដំណើរស្របមកពីក្រោយបុកម៉ូតូបណ្ដាលឲ្យដួលរួចកិនជនរងគ្រោះពីលើបែកក្បាលស្លាប់យ៉ាងអាណោចអាធម្មនៅនឹងកន្លែងកើតហេតុ។
ភ្លាមនោះរថយន្តបង្កមិនបានឈប់នោះទេ បានព្យាយាមបើករត់ចេញពីកន្លែងកើតហេតុបាត់ស្រមោល។
ក្រោយកើតហេតុសមត្ថកិច្ចមូលដ្ឋានបានចុះមកដល់បានទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយកម៉ូតូទៅរក្សាទុកបណ្ដោះអាសន្ន។
ដោយឡែកសពជនរងគ្រោះសមត្ថកិច្ចធ្វើកំណត់ហេតុរួចទំនាក់ទំនងរកសាច់ញាតិមកទទួលយកទៅធ្វើបុណ្យតាមប្រពៃណី៕
