ខេត្តស្វាយរៀង ៖ ដោយមានទឹកចិត្តកតញ្ញូចំពោះអ្នកមានគុណដ៏ធំធេង ទើបកូនបង្កើត កូនប្រសារ និងចៅៗ បានមូលមតិគ្នាប្រារព្វធ្វើពិធីបុណ្យចំរើនអាយុវឌ្ឈនមង្គលជូនចំពោះលោកស្រី ហ៊ឹម ម៉ាលី ត្រូវជាម្តាយបង្កើត ម្តាយក្មេក និងជីដូនគម្រប់ខួប៦៥ ឈានចូល ៦៦ព្រះវស្សា និងសូមបួងសួងសុំឱ្យម្តាយ ម្តាយក្មេក លោកយាយ មានអាយុយ៉ឺនយូរជាងរយវស្សា ដើម្បីគង់ជាម្លប់ដល់កូន កូនប្រសារ និងចៅៗតរៀងទៅ។
កម្មវិធីបុណ្យចំរើនវឌ្ឍនមង្គលឫហៅថាបុណ្យកត្តញ្ញូជូនអ្នកមានណុណនេះ ធ្វើឡើងកាលពីថ្ងៃព្រហស្បតិ៍១កើត ខែមាឃ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៤ ខែមករា ឆ្នាំ២០២១ ស្ថិតនៅភូមិពោន ឃុំសង្កែ ស្រុករំដួល ខេត្តស្វាយរៀង។
ពិធីបុណ្យដ៏អធឹកអធម្មនេះ ធ្វើឡើងដើម្បីចំរើនអាយុវឌ្ឈនមង្គលជូនចំពោះមហាឧបាសិការ ហ៊ឹម ម៉ាលី ត្រូវជាម្តាយបង្កើតរបស់ឯកឧត្តម ហេង ឡាលី និងដើម្បីឧទ្ធិសកុសលផលបុណ្យជូនដល់បុព្វការីជនទាំងឡាយមាន តា បិតា ជីដូនជីតា ព្រមទាំងញាតិការទាំងប្រាំពីរសណ្តាន ដែលបានបែកកាយរំលាយ ក្ខ័ន្ធ ទៅកាន់លោកខាងមុខនោះផង និងម្យ៉ាងវិញទៀតគឺ ដើម្បីសន្សំកុសលផលបុណ្យសម្រាប់ខ្លួនឯង និងក្រុមគ្រួសារ ទៅអនាគតជាតិផងដែរ។ ហើយពីធីបុណ្យនេះក៏ធ្វើជារៀងរាល់ឆ្នាំផងដែរ។
អ្នកផ្តួចផ្តើមពិធីបុណ្យកត្តញ្ញូនេះឡើងរួមមានលោកស្រី ឈាង ស្រីឡៃ និង លោក បាន ម៉េងទូច ព្រមទាំងបុត្រ, លោក ឈាង ម៉ាឡា និងលោកស្រី អ៊ុយ ស្រីទូច ព្រមទាំងបុត្រ, លោក ហេង ឌី និងលោកស្រី ឆន ស្រីនាថ ព្រមទាំងបុត្រ និងឯកឧត្តម ហេង ឡាលីន និងលោកជំទាវ សេង សូវីរដ្ឋា ព្រមទាំងបុត្រ។
នៅក្នុងពិធីបុណ្យនោះ លោកស្រីមហាឧបាសិកា ហ៊ឹម ម៉ាលី និងកូនបង្កើត កូនប្រសារ ព្រមទាំងចៅៗ បានធ្វើអំណោយទានដល់បងប្អូនប្រជាពលរដ្ឋដែលមានជីវភាពខ្វះខាតនៅក្នុងមូលដ្ឋានចំនួន១០០គ្រួសារដែលមានជីវភាពខ្វះខាត ក្នុងម្នាក់ៗទទួលបាន ក្រម៉ា០១ សារ៉ុង០១ និងថវិកា២០,០០០រៀល ផងដែរ៕
