ភ្នំពេញ៖ នារីម្នាក់បើករថយន្តឡិចស៊ីស RX300 មួយគ្រឿងរេចង្កូតទៅបុកខឿនផ្លូវរួចបន្តទៅបុកស៊ុមថ្មបាំងដើមឈើបណ្ដាលបាក់បែក ឯរថយន្តបែកកង់និងខូចខាតផ្នែកខាងមុខយ៉ាងដំណំទៅមុខលែងរួច។ហេតុការណ៍នេះកើតឡើងកាលពីវេលាម៉ោង១ និង ២០នាទីយប់រំលងអាធ្រាត្រឈានចូលថ្ងៃទី ១៧ ខែកុម្ភៈឆ្នាំ ២០២១ស្ថិតនៅតាមបណ្ដោយផ្លូវព្រះស៊ីសុវត្ថិខាងជើងសណ្ឋាគារកាំបូឌីយ៉ាណា ក្នុងសង្កាត់ចតុមុខខណ្ឌដូនពេញ រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឲ្យដឹងថាមុនកើតហេតុគេឃើញរថយន្ត ឡិចសុីស RX330 មួយគ្រឿងពណ៌សពាក់ស្លាកលេខភ្នំពេញ2AT-4644បើកបរដោយនារីម្នាក់ធ្វើដំណើរតាមបណ្ដោយផ្លូវព្រះស៊ីសុវត្ថិ ទិសដៅពីត្បូងទៅជើងលុះមកដល់ចំណុចកើតហេតុខាងលើបានរេចង្កូតមកខាងស្ដាំដៃជ្រុលទៅបុកខឿនផ្លូវរួចបន្តទៅបុកស៊ុមថ្មបាំងដើមឈើនិងដើមឈើបណ្ដាលឲ្យរងការបាក់បែកថ្មមួយចំនួន ចំណែករថយន្តបង្កបែកកង់ខាងមុខខាងស្ដាំនឹងរងការខូចខាតយ៉ាងដំណំទៅមុខលែងរួច។បន្ទាប់មកទៅកុងបានចុះពីលើរថយន្តគេចខ្លួនចេញពីកន្លែងកើតហេតុបាត់។
ក្រោយកើតហេតុសមត្ថកិច្ចមូលដ្ឋានបានចុះដល់បានទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំធ្វើការដោះស្រាយគ្នាទៅតាមផ្លូវច្បាប់៕
