ខេត្ដកំពង់ចាម៖ កុំព្យូទ័រយួរដៃ និងម៉ាស៊ីនព្រីនធ័ ចំនួន១៤ឈុត ដែលជាអំណោយរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី-ហ៊ុនសែន ត្រូវបានផ្ដល់ជូនឃុំទាំង១១ និងវិទ្យាល័យទាំង៣ ក្នុងស្រុកកងមាស ខេត្តកំពង់ចាម តាមរយៈឯកឧត្តម ណុប រ័ត្ននិមល សមាជិកយុវជនគណបក្សប្រជាជនកម្ពុជាថ្នាក់កណ្តាល និងជាប្រធានក្រុមការងារយុវជនគណបក្សខុទ្ទកាល័យសម្តេចតេជោ ហ៊ុន សែន តំណាងនាយឧត្តមសេនីយ៏កិត្តិបណ្ឌិត ហ៊ីង ប៊ុនហៀង នាយករងខុទ្ទកាល័យសម្តេចតេជោ ហ៊ុន សែន និងជាប្រធានគណៈកម្មាធិការគណបក្សខុទ្ទកាល័យសម្តេចតេជោ ហ៊ុន សែន ។
ពិធីនេះត្រូវបានធ្វេីឡើងនាព្រឹកថ្ងៃទី២០ ខែកុម្ភៈ ឆ្នាំ២០២១ ដោយមានការអញ្ជើញចូលរួមពីឯកឧត្តម អ៊ុន ចាន់ដា សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សខេត្តកំពង់ចាម និងឯកឧត្តម ខ្លូត ផន អនុប្រធានប្រចាំការបក្សខេត្ត ព្រមទាំងសមាជិក សមាជិកា គណបក្សប្រជាជនកម្ពុជា ជាច្រើនរូបផងដែរ។
ក្នុងពិធីសំណេះសំណាលជាមួយយុវជនគណបក្សប្រជាជនកម្ពុជា ចំនួន៣២៤នាក់ នៅស្រុកកងមាសនោះ ឯកឧត្តម អ៊ុន ចាន់ដា បានរំលឹកថា ជំនាន់ប៉ុលពតគេសម្លាប់និស្សិតបញ្ញវន្តអ្នកចេះដឹងចោលស្ទេីរគ្មានសល់ ក្រោមការរំដោះជាតិមាតុភូមិ ឲ្យមានសុខសន្តិភាព ពីសំណាក់សម្តេចតេជោ ហ៊ុន សែន និងវីរបុរសស្នេហាជាតិពិតប្រាកដ របស់គណបក្សប្រជាជនកម្ពុជា បានផ្ដល់ឱកាសឲ្យយុវជនយេីង សិក្សារៀនសូត្រ កសាងធនធានមនុស្ស ដូច្នេះសូមឲ្យប្អូនៗ ជាយុវសិស្សត្រូវខិតខំរៀនសូត្រ ដេីម្បីបន្តវេនដឹកនាំការអភិវឌ្ឍន៍ប្រទេសជាតិយើង ឲ្យមានការរីកចម្រើនរុងរឿងទៅថ្ងៃអនាគត ។
ជាមួយគ្នានោះ ឯកឧត្តម អ៊ុន ចាន់ដា ក៏បានសំណូមពរសូមឲ្យយុវជនចងក្រងជាក្រុមឃោសនឹកផ្សព្វផ្សាយពីការអភិវឌ្ឍន៍រីកចម្រើន និងកម្មវិធី នយោបាយរបស់រាជរដ្ឋាភិបាល ក៏ជាសកម្មភាពដឹកនាំរស់រវើករបស់គណបក្សប្រជាជនកម្ពុជា។ ដោយឡែកមន្ត្រីការងារនៅថ្នាក់មូលដ្ឋាន ត្រូវរក្សាសាមគ្គីភាពផ្ទៃក្នុង និងចងក្រងជាផែនការសកម្មភាពយុទ្ធសាស្ត្រ ដេីម្បីស្នេីដល់ថ្នាក់ខេត្ត សុំផ្តល់ជាធនធានសម្រាប់ចុះបំពេញការងារ ផងដែរ ។
ឆ្លៀតក្នុងឱកាសនោះដែរ ឯកឧត្តម ណុប រ័ត្ននិមល បានរំលឹកអំពីប្រវត្តិនៃការឈឺចាប់ ដែលខ្មែររស់នៅក្នុងភ្នក់ភ្លើងសង្គ្រាម បន្ទាប់ពីស្តាប់តាមការញុះញង់របស់ក្រុមអមិត្តបរទេស ដែលនាំឲ្យកម្ពុជាធ្លាក់ក្នុងគ្រោះមហន្តរាយបែកបាក់ខ្ទេចខ្ទាំ ដោយសារគុណបំណាច់កុលបុត្រខ្មែរមួយរូបគឺ សម្ដេចតេជោ ហ៊ុន សែន ជាស្ថាបនិកសន្តិភាព និង វីវៈបុរសជាច្រើន បានបូជាសាច់ស្រស់ឈាមស្រស់ ដើម្បីប្តូរយកសន្តិភាពជូនជាតិ និងប្រជាជនយើង មកដល់សព្វថ្ងៃនេះ ហេីយឯកឧត្តម ក៏បានអំពាវនាវ សូមឲ្យយុវជនទាំងអស់ ចូលរួមការពារថែរក្សាសុខសន្តិភាពនេះ ឲ្យបានគង់វង្ស ដេីម្បីបន្តការអនុវត្តន៍សង្គមជាតិយើងឲ្យមានការរីកចម្រើនតទៅមុខផងដែរ ៕
