ខេត្ដកំពង់ចាម៖ លោក សំ ពិសិដ្ឋ ប្រធានក្រុមការងារសាខាសមាគមសិស្ស និស្សិត បញ្ញវន្តក្មេងវត្តខេត្តកំពង់ចាម នៅរសៀលថ្ងៃទី០១ ខែមីនា ឆ្នាំ២០២១ បានដឹកនាំក្រុមការងារសាខា និងក្រុមការងារអនុសាខាសមាគម ស្រុកកោះសូទិន អញ្ជើញចុះសួរសុខទុក្ខឧបាសក ឈួន បឿន អាយុ៨០ ជាសមាជិកអនុសាខាសមាគមស្រុកកោះសូទិន រស់នៅភូមិវាល ឃុំពាមប្រធ្នោះ ស្រុកកោះសូទិន ខេត្តកំពង់ចាម ដែលកំពុងសម្រាកព្យាបាលជំងឺនៅមន្ទីរពេទ្យខេត្ត ដោយសាររអិលជើងដួល ខណៈរូបគាត់កំពុងមានជំងឺលើសឈាម។
ក្នុងឱកាសនោះផងដែរ លោក សំំ ពិសិដ្ឋ ក្នុងនាមក្រុមការងារសាខា និងអនុសាខាសមាគម បាននាំយកនូវថវិកា និងគ្រឿងឧបភោគ ដែលជាមូលនិធិរបស់ ឯកឧត្ដម ហ៊ុន ម៉ានិត ប្រធានគណៈអចិន្ត្រៃយ៍ សមាគមសិស្ស និស្សិត បញ្ញវន្តក្មេងវត្ត និងឯកឧត្ដម អ៊ុន ចាន់ដា អភិបាលនៃគណៈអភិបាលខេត្តកំពង់ចាម សរុបចំនួន ៦៨២.០០០រៀល អង្ករ០១ ការ៉ុង ទឹកបរិសុទ្ធ ០១កេះ និងទឹកដោះគោឆៅ ០២យួរ។
ឆ្លៀតក្នុងឱកាសនោះលោកប្រធានក្រុមការងារក៏បានពាំនាំនូវការសាកសួរសុខទុក្ខពីសំណាក់ឯកឧត្តម ហ៊ុន ម៉ានិត និងឯកឧត្តម អ៊ុន ចាន់ដា ដែលជានិច្ចកាលថ្នាក់ដឹកនាំយើងតែងតែគិតគូរយកចិត្តទុកដាក់អំពីសុខទុក្ខរបស់ប្រជាពលរដ្ឋគ្រប់មជ្ឈដ្ឋាន ដោយមិនមានការរើសអើង។
លោកប្រធានក្រុមការងារក៏បានស្នើដល់ឧបាសក ឈួន បឿន សូមឱ្យសម្រាកព្យាបាលជំងឺ និងការហូបចុកឲ្យបានគ្រប់គ្រាន់ ជាពិសេសសូមស្ដាប់តាមការណែនាំរបស់ក្រុមគ្រូពេទ្យ ដើម្បីឱ្យសុខភាពវិវត្តទៅរកភាពល្អប្រសើរឡើងវិញ ដើម្បីចូលរួមលើការងារមនុស្សធម៌របស់សមាគម រួមជាមួយរាជរដ្ឋាភិបាលកម្ពុជា ក៏ដូចជាអាជ្ញាធរខេត្តកំពង់ចាម ដែលមានឯកឧត្តម អ៊ុន ចាន់ដា ជាអភិបាលនៃគណៈអភិបាលខេត្ត៕
