ខេត្ដស្វាយរៀង ៖ ព្រឹកថ្ងៃអាទិត្យ ៧រោច ខែចេត្រ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី០៤ ខែមេសា ឆ្នាំ ២០២១នេះ លោក សុច ពិសី អភិបាល នៃគណៈអភិបាលស្រុកកំពង់រោទិ៍បានដឹកនាំក្រុមការងារថ្នាក់ស្រុក រួមមានលោកនាយករដ្ឋបាលសាលាស្រុក ក្រុមប្រឹក្សាឃុំខ្សែត្រ មេភូមិឬស្សីអម មន្រ្តីមណ្ឌលសុខភាពខ្សែត្រ ប៉ុស្តិ៍នគរបាលរដ្ឋបាលឃុំខ្សែត្រ ដោយសហការជាមួយក្រុមគ្រូពេទ្យស្រុកប្រតិបត្តិស្វាយទាប (OD)បានមកយកសំណាកប្រជាពលរដ្ឋប៉ះពាល់ផ្ទាល់ ជាមួយអ្នកវិជ្ជមានកូវីដ-១៩សរុបចំនួន ៣៧នាក់ ស្រី១៦នាក់ មិនបានយកសំណាកចំនួន០៣នាក់ ស្រី០១នាក់ ពីព្រោះកុមារតូចពេក ជាក់ស្តែងអ្នកបានយកសំណាកចំនួន៣៤នាក់ ស្រី១៥នាក់ ។
ក្រុមការងារបានធ្វើការអប់រំណែនាំដល់ពួកគាត់ត្រូវធ្វើចត្តាឡីស័កនៅតាមផ្ទះរៀងៗខ្លួនហើយត្រូវធ្វើការពាក់ម៉ាស់ សម្អាតដៃនឹង សាប៊ូ ជែល អាកុល ហើយរង់ចាំលទ្ធផលយកសំណាកនៅពេលក្រោយទៀត ។
បន្ទាប់មកទៀតលោកអភិបាលស្រុក បានបន្តចុះពិនិត្យមើលទីតាំង និងដំណើរការនៃការចាក់វ៉ាក់សាំងបង្ការជំងឺកូវីដ១៩ ប្រភេទSinovac ដែលកំពុងដំណើការក្នុងមណ្ឌលសុខភាពញរ ស្ថិតនៅក្នុងភូមិស្វាយអាណាត ឃុំញរ ស្រុកកំពង់រោទិ៍ ជារួមឃើញថាមានលក្ខណៈល្អប្រសើរ ព្រមទាំងបានរៀបចំទៅតាមការណែនាំនៃនីតិវិធីសុខាភិបាល ការបម្រើសេវាល្អ រលូន ពុំមានការកកស្ទះទេ ។
រដ្ឋបាលស្រុកកំពង់រោទិ៍ សូមអំពាវនាវដល់បងប្អូនប្រជាពលរដ្ឋទាំងអស់ សូមអនុវត្តឲ្យបានម៉ឺងម៉ាត់តាមការណែនាំរបស់ប្រមុខរាជរដ្ឋាភិបាល ដោយប្រកាន់ភ្ជាប់”៣ការពារ ៣កុំ” របស់ក្រសួងសុខាភិបាល រដ្ឋបាលស្រុកកំពង់រោទិ៍ ក្នុងការប្រយុទ្ធប្រឆាំង នឹងជំងឺកូវីដ១៩ ដែលកំពុងរីករាលដាលជាសាកលលោក ដោយរក្សាគម្លាតសុវត្ថិភាព លាងសម្អាតដៃជាប្រចាំ ដើម្បីជៀសផុតពីការឆ្លងជំងឺដ៏កាចសាហាវមួយនេះ៕
