ខេត្ដស្វាយរៀង៖ ក្រុមការងារអនុសាខាកាកបាទក្រហមកម្ពុជាស្រុកស្វាយទាប និងមន្ត្រីពាក់ព័ន្ធបានអញ្ជើញចុះជួបសំណេះសំណាលសួរសុខទុក្ខ នាំយកអំណោយសាខាកាកបាទក្រហមកម្ពុជាខេត្ដស្វាយរៀង ផ្តល់ជូនប្រជាពលរដ្ឋរងគ្រោះដោយខ្យល់កន្ត្រាក់ចំនួន ២គ្រួសារ នៅឃុំស្វាយរំពារនឹងឃុំសំបូរ ស្រុកស្វាយទាប ខេត្ដស្វាយរៀង។
ហេតុការណ៍នេះបានកើតឡើង កាលពីម៉ោង ៣ និង៣០ នាទី រសៀល ថ្ងៃទី ១៩ ខែមេសា ឆ្នាំ ២០២១ បណ្តាល អោយផ្ទះប្រជាពលរដ្ឋ ចំនួន ២គ្រួសាររងការខូចខាត ។
ដោយគ្រួសារទី១.មានឈ្មោះ សេក តិ រស់នៅភូមិថ្មី ឃុំសំបូរ ស្រុកស្វាយទាប ខេត្ដស្វាយរៀង អំណោយទទួលបានមាន៖អង្ករ ៣០គីឡូក្រាម,អាកុល០,៥០លីត្រ ,ម៉ាស់១ដុំនិងថវិកា១២មុឺនរៀល។
គ្រួសារទី២.មានឈ្មោះ ឯក វុទ្ធី រស់នៅភូមិកក់ ឃុំ ស្វាយរំពា ស្រុកស្វាយទាប ខេត្ដស្វាយរៀង អំណោយទទួលបានរួមមាន៖អង្ករ៣០គីឡូក្រាម ,ទឹកត្រី៣ដប,ទឹកសុីអុីវ៣ដប,កាធុនជ័រ១,បំពង់ទឹកក្ដៅ១,កំសៀវតែ១,វែកបាយនិងសម្លរ១គួរ,ប្រេងឆា២ដប, អំបិល១ថង់,ស្កសរ១គីឡូក្រាម,ចានបាយនិងសម្លរ១គួរ និងថវិកាចំនួន ១៥មុឺនរៀល។
ក្នុងឱកាសនោះដែរ អនុសាខាកាកបាទក្រហមកម្ពុជាស្រុកស្វាយទាប ក៍ដូចជាសាខាកាកបាទក្រហមកម្ពុជាខេត្ដស្វាយរៀង បានចូលរួមសម្តែងការសោកស្តាយយ៉ាងខ្លាំង ជាមួយក្រុមគ្រួសាររងគ្រោះទាំងអស់ ចំពោះមហន្តរាយធម្មជាតិ ដែលបង្កអោយមានការខូចខាតលំនៅដ្ឋានរបស់បងប្អូនបែបនេះ ។
ក្រុមការងារកាកបាទក្រហមកម្ពុជាស្រុក ក៏បានពាំនាំប្រសាសន៍ផ្តាំផ្ញើសួរសុខទុក្ខ ពីសំណាក់ ប្រធានកិត្តិយសសាខា ពិសេស សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប ជនរងគ្រោះ ជនងាយរងគ្រោះ ដោយមិនរើសអើងឡើយ ហើយតែងបានចាត់តំណាងអោយចុះអន្តរាគមន៍ ផ្តល់ជំនួយសង្រ្គោះ ទាន់ពេលវេលា ស្របតាមពាក្យស្លោក ” ទីណាមានទុក្ខលំបាក ទីនោះមានកាកបាទក្រហមកម្ពុជា ” ។
ក្រុមការងារកាកបាទក្រហមកម្ពុជាស្រុក បានអំពាវនាវ ដល់ប្រជាពលរដ្ឋទាំងអស់ សូមបង្កើនការប្រុងប្រយ័ត្នអោយបានគ្រប់ៗគ្នា ក្នុងការចូលរួមទប់ស្កាត់ ការពារពីការឆ្លងនៃជំងឺកូវីដ១៩ ដោយត្រូវអនុវត្តវិធានការ ” ៣ការពារ ៣កុំ និង ចូលរួមអនុវត្តអោយបានខ្ជាប់ខ្ជួនតាមសារណែនាំនានារបស់ក្រសួងសុខាភិបាល ដើម្បីកាត់ផ្តាច់ខ្សែចម្លង កុំអោយជម្ងឺកូវីដ-១៩ ដែលជាឃាតកគ្មានស្រមោល ដ៏កាចសាហាវនេះ ឆ្លងចូលគ្រួសារ និងសហគមន៍ យើង ៕
