ភ្នំពេញ ៖ ដោយមានការអាណិតអាសូរដល់បងប្អូនកម្មករកម្មការនីរោងចក្រចំនួន៤៣បន្ទប់ ដែលបានឡាយវីដេអូតាមរយៈបណ្ដាញសង្គម Facebook ថាពួកគាត់កំពុងជួបនូវការខ្វះខាតស្បៀងអាហារប្រចាំថ្ងៃ ខណៈរាជធានីភ្នំពេញកំពុងអនុវត្តវិធានរដ្ឋបាលបិទខ្ទប់ ដើម្បីកាត់ផ្ដាច់ការរីករាលនៃជំងឺកូវីដ-១៩ ក្នុងសហគមន៍ ។
បន្ទាប់ពីទទួលបានព័ត៌មាននេះភ្លាមៗ លោក រាជ សារ៉ាត់ នាយកក្រុមហ៊ុន រស្មីគោកធ្លក ឯ.ក បានបន្តគៀងគរគ្រឿងឧបគោគបរិគោគផ្សេងៗ ចុះទៅចែកជូនពួកគាត់ទាំងយប់នៅ ថ្ងៃទី២៤ ខែមេសា ឆ្នាំ២០២១ ស្ថិតនៅភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
អំណោយដ៏ថ្លៃថ្លាដែលបានចែកជូនដល់បងប្អូនកម្មករកម្មការនីរោងចក្រទាំង៤៣បន្ទប់ខាងលើ ដោយក្នុងមួយបន្ទប់ទទួលបាន ៖ មី, ត្រីខកំប៉ុង, ទឹកត្រី, ទឹកស៊ីអ៊ីវ, ពងទា និង ម៉ាស សំរាប់ ៤២បន្ទប់ ។ ដោយឡែកបន្ទប់មួយផ្សេងទៀតទទួលបាន ៖ អង្គរ១០គីឡូក្រាម, ឆ្នាំង, ស្លាបព្រា, ទឹកត្រី, ត្រីខកំប៉ុង, ទឹកស៊ីអ៊ីវ, ពងទា, ប្រេងឆា, មី និងទឹកបរិសុទ្ធ ។
បើតាមការបញ្ជាក់ពីបងប្អូនដែលនៅស្នាក់នៅបន្ទប់ជិតគ្នា បានឲ្យដឹងថា បន្ទប់ទី៤៣នេះ គឺមានការខ្វះខាតខ្លាំងជាងគេហើយមានម្នាក់គឺជាជនជាតិមកពីខេត្តមណ្ឌលគីរី ។
សប្បុរសជនដែលបានផ្តល់ជំនួយខាងលើ រួមមាន ៖ លោក អ៊ុំ បាក់ស ប្រធានក្រុមការងារមនុស្សធម៌អង្គភាពសារព័ត៌មាន រស្មីគោកធ្លក និង ភរិយា, លោក ចុងភៅ លឹម សេងហេង អនុប្រធានក្រុមការងារមនុស្សធម៌អង្គភាពសារព័ត៌មាន រស្មីគោកធ្លក និងភរិយា ,លោក មិន សីហា និព័ន្ធនាយករងអង្គភាពសារព័ត៌មាន(BPN NREWS ),លោកស្រី ប៊ិន ចាន់លី និងស្វាមី, លោក វ៉ាន់ ថេត និង ភរិយា, លោក អ៊ុំ សំណាង និងភរិយា, លោក មាស មករា និង ភរិយា, លោក សៀក ឡេង និង ភរិយា, លោក មាស ផានារា និងភរិយា , លោក វាន់ សុភាន់ និងភរិយា, លោក ប៉ែន ធឿន និងភរិយា, លោក ហេង ចំណាប់ និងភរិយា ,លោក ស្រី វី និងភរិយា និងក្រុមការងារអង្គភាពសារព័ត៌មាន រស្មីគោកធ្លក តាមរយៈលោក រាជ សារ៉ាត់ នាយកក្រុមហ៊ុន រស្មីគោកធ្លក ឯ.ក ។
លោក រាជ សារ៉ាត់ បានបញ្ជាក់ថាអំណោយទាំងអស់នេះពិតណាស់ វាមិនច្រើននោះទេ ប៉ុន្តែអាចជួយបងប្អូនដោះស្រាយបានមួយគ្រាតូចដែរ ហើយក៏ជាទឹកចិត្តដ៏ថ្លៃថ្លារបស់បងប្អូនសប្បុរសជនដែលមានចិត្តសប្បុរស បានចំណាយនូវទ្រព្យសម្បត្តិផ្ទាល់ខ្លួនដើម្បីចែករំលែកក្តីស្រឡាញ់ ហើយក៏ជាការចូលរួមចំណែកជាមួយរាជរដ្ឋាភិបាល ដើម្បីកាត់ផ្តាច់ការឆ្លងរីករាលដាលជំងឺកូវីដ-១៩ នៅក្នុងសហគមន៍ ផងដែរ ។
សូមបងប្អូន មេត្តាយោគយល់អធ្យាស្រ័យ មួយរយៈពេលខ្លី ហើយចូលរួមទប់ស្កាត់ការរីករាលដាលជំងឺកូវីដ-១៩ ដោយអនុវត្តឲ្យបានខ្ជាប់ខ្ជួនតាមការណែនាំរបស់ក្រសួងសុខាភិបាល និងគោលការណ៍ ៣ការពារ ៣កុំ ដែលបានដាក់ចេញដោយរាជរដ្ឋាភិបាល បើមិនមានភារកិច្ចចាំបាច់ សូមកុំចេញក្រៅផ្ទះ ។
ជាចុងក្រោយលោកនាយកក្រុមហ៊ុន រស្មីគោកធ្លក ឯ.ក. បានថ្លែងអំណរគុណដល់បងប្អូនសប្បុរសជនដែលជាអាជីវករលក់មាន់ទាំងអស់ខាងលើ និងសប្បុរសជនផ្សេងទៀត ដែលតែងតែផ្ដល់នូវអំណោយជាគ្រឿងឧបភោគបរិភោគ តាមរយៈអង្គភាពសារព័ត៌មានរស្មីគោកធ្លក ដើម្បបន្តចែកជូនដល់បងប្អូនដែលកំពុងជួបការខ្វះខាតជាក់ស្ដែង ក្នុងស្ថានភាពនេះ ។ សូមជូនពរដល់ម្ចាស់ជំនួយ និងក្រុមគ្រួសារសូមឲ្យមានសុខភាពល្អ សំណាងល្អ ជោគជ័យគ្រប់ភារៈកិច្ចការងារជាពិសេសសូមឲ្យចៀសផុតពីជំងឺកូវីដ-១៩ទាំងអស់គ្នា ៕
