ភ្នំពេញ៖ អំណោយជាគ្រឿងឧបភោគ បរិភោគ មាន ៖ អង្ករ ចំនួន ៥០០បាវ ,ទឹកសុទ្ធ ចំនួន ៥០០កេស ,ត្រីខ ចំនួន ២៥០កេស ,ទឹកត្រី ចំនួន ៥០០យួរ ,ទឹកស៊ីអ៊ីវ ចំនួន ៥០០យួរ និងថវិការ ចំនួន ៥ពាន់ដុល្លារជាអំណោយសប្បុរសធ៌ម របស់ ឯកឧត្ត ស សុខា រដ្ឋលេខា ធិការក្រសួងអប់រំ យុវជន និងកីឡា និងលោកជំទាវ កែ សួនសុភី ត្រូវបានលោក សែម គន្ធា តំណាងដ៏ខ្ពង់ខ្ពស់ ឯកឧត្តម និងលោកជំទាវ នាំយកមកប្រគល់ជូន លោក ហែម ដារិទ្ធិ អភិបាលខណ្ឌពោធិ៍សែនជ័យ នារសៀលថ្ងៃទី២៦ ខែមេសា ឆ្នាំ២០២១ នៅស្នាក់ការភូមិព្រៃទា សង្កាត់ ចោមចៅទី៣ ខណ្ឌពោធិ៍សែនជ័យ ។
លោក សែម គន្ធា មានប្រសាសន៍ផ្តាំផ្ញើ ពីសំណាក់ ឯកឧត្ត ស សុខា និងលោកជំទាវ សួរសុខទុក្ខចំពោះបងប្អូនប្រជាពលរដ្ឋ ក្នុងខណ្ឌពោធិ៍សែនជ័យទាំងមូល ដែលកំពុងទទួលរងឥទ្ធិពល នៃការីករាលដាលជម្ងឺកូវីដ-១៩ ដោយព្រឹទ្ធិការ ២០កុម្ភៈ ដ៏គួរឱ្យព្រួយបារម្ភនេះ ដោយសារតែមូលដ្ឋានខណ្ឌពោធិ៍សែនជ័យ ជាបណ្តុំនៃរោងចក្រ សហគ្រាស មានកម្មករ កម្មការិនីច្រើន បានធ្វើឱ្យតំបន់នេះ មានការប្រឈមខ្ពស់ចំពោះការរីករាលដាលជម្ងឺកូវីដ-១៩ ។
ក្នុងពេលដែលរាជរដ្ឋាភិបាល កំពុងមានការបិទខ្ទប់ភូមិសាស្រ្តរាជធានីភ្នំពេញ និងក្រុងតាខ្មៅ ពិតជាធ្វើឱ្យកម្មករ កម្មការិនី និងប្រជាពលរដ្ឋក្រីក្រជាច្រើនគ្រួសារ ជួយនូវការលំបាកក្នុងជីវភាពប្រចាំថ្ងៃយ៉ាងពិតប្រាកដ ។
ហេតុនេះហើយ បានជា ឯកឧត្តម និងលោកជំទាវ បានចែករំលែកអំណោយផ្ទាល់ខ្លួន ជួយជាស្បៀងអាហារ មកខណ្ឌពោធិ៍សែនជ័យ ដើម្បីបានជាការរួមចំណែក ជួយបងប្អូនប្រជាពលរដ្ឋ ដែលខ្វះខាតជីវភាព បានទាន់ពេលវេលា ហើយអំណោយទាំងនេះ ក៍ជាការជួយរំលែក បន្ទុករបស់រាជរដ្ឋាភិបាលបានមួយចំណែកតូចដែរ ។
តំណាងឱ្យប្រជាពលរដ្ឋ ខណ្ឌពោធិ៍សែនជ័យ លោក ហែម ដារិទ្ធិ អភិបាលខណ្ឌ បានថ្លែងអំណរគុណយ៉ាងជ្រាលជ្រៅ ដល់ ឯកឧត្តម ស សុខ និងលោកជំទាវ ដែលជានិច្ចកាល តែងមានមនោសញ្ចេតនាផ្សារផ្ជាប់ជាមួយ ប្រជាពលរដ្ឋខណ្ឌពោធិ៍សែនជ័យជាបន្តបន្ទាប់ ពិសេសវិស័យមនុស្សធ៌ម ជួយជនរងគ្រោះ ។
លោកអភិបាលខណ្ឌបញ្ជាក់ថា ក្នុងខណ្ឌពោធិ៍សែនជ័យ មានប្រជាពលរដ្ឋ អចិន្រ្តៃយ៍ ប្រមាណ២០ម៉ឺននាក់ និងអ្នកស្នាក់នៅ ជាកម្មករ កម្មការិនី ជិត២០ម៉ឺននាក់ សរុប ជាង៤០ម៉ឺននាក់ ក្នុងចំនួននេះ ខណ្ឌពោធិ៍សែនជ័យ នឹងត្រូវការជំនួន ជាស្បៀងអាហារ ប្រមាណជាង២០ម៉ឺនកញ្ចប់ ដើម្បីផ្គត់ផ្គង់ប្រជាពលរដ្ឋដែលខ្វះខាត ដែលបច្ចុប្បន្ននេះ ខណ្ឌទើបចែកស្បៀងជូនប្រជាពលរដ្ឋបាន ជាង ៤ម៉ឺនគ្រួសារតែប៉ុណ្ណោះ ដែកភាគច្រើនជាកម្មករ រោងចក្រ ចំណែកគ្រួសារអចិន្រ្តៃយ៍ មិនទាន់មានលទ្ធភាព ចែកស្បៀងជូនពួកកាត់នៅឡើយទេ ៕
