ខេត្ដកំពង់ចាម៖ រដ្ឋបាលខេត្តកំពង់ចាម ប្រកាសពីការរកឃើញមនុស្សចំនួន៣៩នាក់ថ្មីបន្ថែមទៀត កើតជំងឺកូវីដ១៩ នៅស្រុកបាធាយ, ស្រុកកងមាស និងស្រុកស្រីសន្ធរ ដែលសុទ្ធតែចេញពីចង្កោមរោងចក្រទាំងអស់។
រដ្ឋបាលខេត្តកំពង់ចាម បញ្ជាក់ថា អ្នកវិជ្ជមានជំងឺកូវីដ១៩ ដែលទើបរកឃើញនេះ រស់នៅឃុំកងតាណឹង, ឃុំព្រែកកុយ, ឃុំស្ដៅ និងឃុំរកាអារ ស្រុកកងមាស, ឃុំប្រាំយ៉ាម, ឃុំមានជ័យ, ឃុំព្រែករំដេង និងឃុំព្រែកពោធិ៍ ស្រុកស្រីសន្ធរ, ឃុំសំបូរ, ឃុំតាំងក្រាំង និងឃុំជាលា ស្រុកបាធាយ។ ក្នុងនោះរស់នៅស្រុកកងមាស ចំនួន២៤នាក់, ស្រុកបាធាយ ចំនួន៦នាក់, ស្រុកស្រីសន្ធ ចំនួន៨នាក់ និងម្នាក់ទៀតកុមារីអាយុ៤ឆ្នាំ ឆ្លងពីម្ដាយធ្វើការនៅរោងចក្រ 7NG។
ជាមួយគ្នានេះ ក៏កំពុងបន្ដស្វែងរកទីតាំង និងអ្នកប៉ះពាល់ជាមួយអ្នកជំងឺកូវីដ១៩ និងអ្នកជំងឺខាងលើបន្ថែមទៀត និងសូមអំពាវនាវដល់អ្នកពាក់ព័្ធនឹងករណីនេះ សូមទៅពិនិត្យសុខភាពយកសំណាក នៅមន្ទីរពេទ្យបង្អែកដែលនៅជិតផ្ទះ ឬត្រូវរាយការណ៍ជូនអាជ្ញាធរមូលដ្ឋាន៕
