ភ្នំពេញ ៖ លោក ហែម ដារិទ្ធិ អភិបាលនៃគណៈ អភិបាលខណ្ឌពោធិ៍សែនជ័យ បានអញ្ជើញជួបសំណេះសំណាលសួរសុខទុក្ខ និងនាំយកអំណោយសប្បុរសធម៌តាមរយៈរដ្ឋបាលខណ្ឌមក ចែកជូនប្រជាពលរដ្ឋ កម្មករ កម្មការិនី ដែលជួបជីវភាពខ្វះខាត ក្នុងកំឡុងពេលនៃការរីករាលដាលជំងឺកូវីដ-១៩ តាមបន្ទប់ជួលចំនួន ៤០០ គ្រួសារ មកពី២ភូមិក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ នៅព្រឹកថ្ងៃពុធ ៨កើត ខែជេស្ឋ ឆ្នាំឆ្លូវ ត្រីស័ក ព.ស ២៥៦៥ ត្រូវនិងថ្ងៃទី១៩ ខែឧសភា ឆ្នាំ២០២១។
នៅក្នុងពិធីនោះដែរក៏មានការអញ្ជើញចូលរួមពីឯកឧត្តម លោកជំទាវ ដែលជាតំណាងម្ចាស់អំណោយ លោក ហែម ដារិទ្ធិ អភិបាលនៃគណៈអភិបាល ខណ្ឌពោធិ៍សែនជ័យ លោក ព្រាប ម៉ាណែល អភិបាលរងខណ្ឌ លោក សឿង រតនា អនុប្រធានគណបក្ស ប្រជាជនកម្ពុជា សង្កាត់ចោមចៅទី១ លោកស្រី នូ សុភាព មេភូមិត្រពាំងថ្លឹងទី១ និងក្រុមការងារខណ្ឌ សង្កាត់ ភូមិជាច្រើនរូបទៀតផងដែរ។
នាឱកាសនោះ លោក ហែម ដារិទ្ធិ បានពាំនាំនូវការផ្ដាំផ្ញើសាកសួរសុខទុក្ខពីសម្តេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក៏ដូចជាឯកឧត្តម ឃួង ស្រេង អភិបាលនៃគណៈអភិបាល រាជធានីភ្នំពេញ ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ឬ និន្នាការនយោបាយណាមួយឡើយ ។
លោកអភិបាលខណ្ឌបានបន្តថា ថ្វីត្បិតតែអំណោយមនុស្សធម៌ដែលបាននាំយកមកចែកជូនបងប្អូននាពេលនេះ មានចំនួនតិចតួចក្ដី តែក៏អាចជួយសម្រាលទុក្ខលំបាករបស់បងប្អូនបានមួយកម្រិត ហើយក៏ជាការបង្ហាញនូវការយកចិត្តទុកដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ និងបងប្អូនសប្បុរសជនផងដែរ ។
បន្ទប់មក លោក អភិបាលខណ្ឌពោធិ៍សែនជ័យ ក៏បានអំពាវនាវសូមឱ្យបងប្អូនប្រជាពលរដ្ឋទាំងអស់ ត្រូវតែចេះការពារខ្លួនពីជំងឺរលាកសួតប្រភេទថ្មី (COVID-19) ដោយមេត្តាកុំមានការប្រមូលផ្ដុំជួបជុំជាក្រុម និង ត្រូវអនុវត្តតាមបទបញ្ជារបស់រាជរដ្ឋាភិបាលកម្ពុជា 《៣ករពារ ៣កុំ》 និងវិធាននានារបស់ក្រសួងសុខភិបាល ។ ហើយចាប់តាំងពីព្រឹត្តិការណ៍២០កុម្ភៈ បានផ្ទុះឡើង យើងទាំងអស់គ្នាមានការព្រួយបារម្ភជាខ្លាំង អំពីលទ្ធភាពនៃការរីរាលដាលជាបន្តបន្ទាប់នៅក្នុងសហគមន៍។ ជំងឺនេះកាចសាហាវណាស់ ហេតុនេះសូមបងប្អូនស៊ូទ្រាំលំបាក និង អត់ធ្មត់អនុត្តវិធានការសុខាភិបាលក្នុងរយៈពេលខ្លី ដើម្បីភាពសុខសាន្តរបស់សង្គមជាតិយើងតរៀងទៅ។ ប្រសិនបើគ្មានការចាំបាច់ទេ សូមកុំចេញពីផ្ទះ បើចេញពីផ្ទះត្រូវ ពាក់ម៉ាស់អោយជាប់ជាប្រចាំ ។
អំណោយមនុស្សធម៌របស់សប្បុរសជន ដែលបានផ្ដល់ជូនក្នុងមួយគ្រួសារ ទទួលបាន ៖ អង្ករ១០ គីឡូក្រាម ត្រីខកំប៉ុង១យួរ ទឹកស៉ីអ៉ីវ ១យួរ ម៉ាស់១ប្រអប់ និងអំបិល៤កញ្ចប់ ផងដែរ ៕
