ខេត្តបន្ទាយមានជ័យ៖ យោងតាមពាក្យបណ្ដឹងរបស់ជនរងគ្រោះឈ្មោះ មូល ខៀវ ភេទស្រី អាយុ៦៨ឆ្នាំ បច្ចុប្បន្ន រស់នៅភូមិ.សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ ស្ដីពីករណី ហិង្សាបំផ្លាញទ្រព្យសម្បត្តិក្នុងគ្រួសារ ដែលប្រព្រឹត្តកាលពីវេលាម៉ោង០៩និង០០នាទី ថ្ងៃទី២៨ ខែឧសភា ឆ្នាំ២០២១ ដែលបង្កឡើងដោយកូនប្រុសរបស់គាត់ឈ្មោះ សុវណ្ណ ថា អាយុ២៩ឆ្នាំ នៅចំណុចខាងជើងរោងចក្រសានកូ ស្ថិតក្នុងភូមិ.សង្កាត់ ផ្សារកណ្ដាល ក្រុងប៉ោយប៉ែត ខេត្តបន្ទាយាមានជ័យ ។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានឱ្យដឹងថា ក្រោយពីទទួលបានពាក្យបណ្ដឹងភ្លាម លោកបានចាត់តាំងកម្លាំងជំនាញចុះដល់កន្លែងកើតហេតុហើយធ្វើការឃាត់ខ្លួនឈ្មោះ សុវណ្ណ ថា មកសួរនាំអំពីរឿងហេតុដែលកើតឡើង ។
ក្រោយពីសាកសួររួចជនសង្ស័យ បានឆ្លើយសារភាពថា រូបខ្លួនធ្លាប់ជាប់ពន្ធនាគារចំនួន០២លើកមកហើយ គឺករណីចែកចាយគ្រឿងញៀន និងករណីលួចរថយន្ត។ ក្រោយចេញពីពន្ធនាគាររូបខ្លួនបានប្រើប្រាស់គ្រឿងញៀនជារៀងរាល់ថ្ងៃ ហើយបង្កការអុកឡុកដល់ក្រុមគ្រួសាររហូត ពេលរូបខ្លួនខឹងនឹងម្ដាយ ខ្លួនតែងតែបោកបំផ្លាញទ្រព្យសម្បត្តិនៅក្នុងផ្ទះខ្ទេចខ្ទីអស់ ជាក់ស្ដែងនៅព្រឹកថ្ងៃទី២៨ ខែឧសភា នេះ រូបខ្លួនបានខឹងនឹងម្ដាយមិនយកបាយឱ្យខ្លួនស៊ី ទើបខ្លួនបោកកំទេចឆ្នាំងបាយអស់មួយចំនួន ។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានឱ្យដឹងទៀងថា ដោយផ្អែកលើពាក្យបណ្ដឹងរបស់ជនរងគ្រោះ និងផ្អែកលើការស្ដាប់ចម្លើយរបស់ជនសង្ស័យ គឺមានភាពស៊ីសង្វាក់យ៉ាងជាក់លាក់នៃបទល្មើសខាងលើ ទើបកម្លាំងជំនាញព្រហ្មទណ្ឌមូលដ្ឋានកងរាជអាវុធហត្ថក្រុងប៉ោយប៉ែត កសាងសំណុំរឿងបញ្ជូនមកបញ្ជាការដ្ឋានកងរាជអាវុធហត្ថខេត្ត បន្ទាយមានជ័យ ចាត់ការបន្ត ។
លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវ និងបង្ក្រាបបទល្មើសបានឱ្យដឹងថា ការឃាត់ខ្លួនជនសង្ស័យខាងលើនេះ ក៏ទទួលបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត បន្ទាយមានជ័យ ផងដែរ បច្ចុប្បន្ន ជនសង្ស័យត្រូវបានកម្លាំងការិយាល័យព្រហ្មទណ្ឌកងរាជអាវុធហត្ថខេត្ត បញ្ជូនទៅសាលាដំបូងខេត្ត បន្ទាយមានជ័យ ចាត់ការតាមនីតិវិធីហើយនៅរសៀលថ្ងៃសៅរ៍ ទី២៩ ខែឧសភា ឆ្នាំ២០២១នេះ៕ ដោយ៖លោកចាន់ពុធ
