ខេត្តព្រះវិហារ ៖ ប្រជាពលរដ្ឋខ្មែរ២នាក់ ត្រូវបានកងកម្លាំងប្រដាប់អាវុធ នៃអង្គភាពកង ពលតូចអន្តរាគមន៍លេខ៨ ធ្វើការឃាត់ខ្លួនខណៈពេលដែលពួកគាត់លួចឆ្លងដែនចេញពីទឹកដីថៃ ចូលមកកម្ពុជាវិញដោយខុសច្បាប់ កាលពីវេលាម៉ោងប្រមាណជាង៩ ព្រឹកថ្ងៃអាទិត្យ ទី៣០ ខែឧសភា ឆ្នាំ២០២១ ក្នុងភូមិសាស្ត្រចាក់ច្រែង នៃទិសទី១ ប្រាសាទ ព្រះវិហារ។
បើយោងតាមរបាយការណ៍របស់នាយការិយា ល័យនៃកងពលតូចអន្តរាគមន៍លេខ៨ លោកវរសេនីយ៍ទោ ផង អឿន បានឲ្យដឹងថា កាលពីថ្ងៃទី១០ ខែឧសភា ឆ្នាំ២០២១ ពលរដ្ឋខ្មែរទាំងពីរនាក់នេះ បានលួចឆ្លងដែនដោយខុសច្បាប់ចូលទៅទឹកដីថៃ បំណងរកការងារធ្វើតាមច្រកព្រំដែនជាំស្រងាំ រហូតមកដល់ថ្ងៃទី៣០ ខែឧសភា ឆ្នាំ២០២១នេះ ក៏សម្រេចចិត្តលួចឆ្លងដែនត្រឡប់ចូលមកកម្ពុជាវិញ។ ប៉ុន្តែត្រូវបានកម្លាំងសមត្ថកិច្ចឃាត់ខ្លួន ខណៈពេលកំពុងដើរល្បាតតាមភូមិសាស្ត្រចាក់ច្រែង នៃទិសទី១ ប្រាសាទព្រះវិហារ តាមខ្សែបន្ទាត់ព្រំដែន កម្ពុជា.ថៃ។
លោកវរសេនីយ៍ទោ ផង អឿន នាយការិយាល័ យទី២ នៃកងពលតូចអន្តរាគមន៍លេខ៨ ក៏បានឲ្យដឹងដែរថា ចំពោះពលករខ្មែរ ដែលលួចឆ្លងដែនពីទឹកដីថៃ ចូលមកកម្ពុជាវិញនោះ ទី១ មានឈ្មោះ ចយ អាន ភេទប្រុស អាយុ 25ឆ្នាំ រស់នៅភូមិមន្ទិល ឃុំ យាង ស្រុកជាំក្សាន្ត ខេត្តព្រះវិហារ។
ទី២ មានឈ្មោះ ទ្បុង ប៉ាន់ ភេទប្រុស អាយុ 30ឆ្នាំ រស់នៅភូមិរវៀង ឃុំខ្វាវ ស្រុកជីក្រែង ខេត្តសៀមរាប។
បច្ចុប្បន្នពលករខ្មែរទាំងពីរនាក់ ត្រូវបានមន្ត្រីសុខាភិបាលដឹកបញ្ជូនយកទៅធ្វើចត្តាឡីស័កនៅមណ្ឌលចត្តាឡីស័កកម្រិត១ ស្រុកជាំក្សាន្ត ខេត្តព្រះវិហារ ក្រោយពីសាកសួរព័ត៌មានចប់៕សួនលីណា
