ខេត្តកណ្តាល៖ នៅពេលថ្មីៗនេះមហាជននាំគ្នារិះគន់យ៉ាងខ្លាំង ដែលមានឃើញក្រុមឈ្មួញកំពុងធ្វើសកម្មភាពដូចជាមិនខ្វល់ពីច្បាប់នោះឡើយក្នុងការបូមខ្សាច់ចាក់លុបដីចំណីទន្លេបានដោយរលូនមិនរំខានដល់អាជ្ញាធរបន្តិចសោះឡើយ។
ករណីចាក់លុបចំណីទន្លេនេះដែរគឺមានទីតាំងស្ថិតនៅភូមិពោធិ៍ធំ ឃុំសារិការកែវ ស្រុកល្វាឯម ខេត្តកណ្តាល។
យោងតាមសេចក្តីរាយការណ៍ពីពលរដ្ឋដែលបាននៅក្បែរទីតាំងនោះបាននាំគ្នាប្រាប់ឲ្យដឹងថា មានក្រុមឈ្មួញកំពុងធ្វើសកម្មភាពក្នុងការបូមខ្សាច់ជាច្រើនខែមកហើយនោះនៅពុំទាន់មានឃើញខាងអាជ្ញាធរឬមន្ត្រីជំនាញពាក់ព័ន្ធណាហ៊ានចុះត្រួតពិនិត្យដើម្បីធ្វើការទប់ស្កាត់ហាមឃាត់នោះឡើយ ។
សូមបញ្ជាក់ថាការបូមខ្សាច់លុបដីចំណីទន្លេនៅទីកន្លែងនេះស្ទើរតែពាក់កណ្តាលទន្លេទៅហើយនេះមិនមែននៅក្នុងបរិវេណចំណុចរបស់ក្រុមហ៊ុន ឃុន សៀ ដែលមានច្បាប់អនុបយោគពីរាជរដ្ឋាភិបាលត្រឹមត្រូវស្របច្បាប់នោះទេ។
ដោយច្បាប់របស់ក្រុមហ៊ុន ឃុន សៀ គឺមានផ្ទៃដី៧០ហិតា អនុបយោគពីរាជរដ្ឋាភិបាល៥០ឆ្នាំនៅក្នុងភូមិអរិយក្សត្រ ឃុំអរិយក្សត្រ ស្រុកល្វាឯម ខេត្តកណ្តាល។
ប្រភពច្បាស់ការណ៍ដែលអ្នកសារព័ត៌មានទទួលបានពីក្រុមឈ្មួញដែលកំពុងបូមខ្សាច់ចាក់លុបដីចំណីទន្លេនេះបានធ្វើការដោះស្រាយជាលុយទៅឲ្យអ្នកដែលមានកន្ទុយដីនៅជាប់ទន្លេ ដោយក្នុងកន្ទុយដីខ្លះបាន៣០០០ដុល្លារ ខ្លះ ៥០០០ដុល្លារ រីឯ ខ្លះទៀតបានតិចឬច្រើនតាមទំហំដីនីមួយៗដែលមាននៅទីនោះផងដែរ។
ជ៉ំុវិញករណីបូមខ្សាច់ចាក់លុបដីចំណីទន្លេនេះដែរត្រូវបានគេដឹងយ៉ាងច្បាស់ថាពុំទាន់មានច្បាប់ និង ស.ជ.ណ របស់រាជរដ្ឋាភិបាលនោះទេ បើមានត្រឹមត្រូវនោះគឺបិទបង្ហាញជាសាធារណៈឲ្យមហាជនបានដឹងថាខ្លួនមានឯកសារច្បាស់លាស់ដូចក្រុមហ៊ុន ឃុន សៀ ដែរ ហើយម្យ៉ាងទៀតទីតាំងខាងលើនេះមិនមែនមានដីដុះតាំងពីមុនមកទេ គឺវាកើតឡើងដោយសារតែធ្វើសកម្មភាពក្នុងការបូមខ្សាច់ចាក់លុបទាំងស្រុងតែម្តង។
យ៉ាងណាក៏ដោយបងប្អូនពលរដ្ឋនាំគ្នាសូមណុំពរមកដល់អាជ្ញាធរឬមន្ត្រីជំនាញដែលពាក់ព័ន្ធសូមមេត្តាមានចំណាត់ការចុះត្រួតពិនិត្យកន្លែងទីតាំងដែលមានក្រុមឈ្មួញកំពុងធ្វើសកម្មភាពក្នុងការបូមខ្សាច់ចាក់លុបដីចំណីទន្លេនៅខាងលើនេះផងទាន ហើយប្រជាពលរដ្ឋសង្ឃឹមយ៉ាងមោះមុតថាអាជ្ញាធរខេត្តកណ្ដាលនឹងអាចទប់ស្កាត់ចំពោះឈ្មួញខិលខូចដែលកំពុងរំលោភយកដីចំណីទន្លេធ្វើជាកម្មសិទ្ធិផ្ទាល់ខ្លួនផងដែរ។
ជុំវិញករណីខាងលើនេះអង្គភាពសារព័ត៌មានយេីងមិនអាចសុំការបំភ្លឺពីលោក កន សុខកាយ អភិបាលបាលស្រុកល្វាឯម បានទេដោយលោកប្រាប់ថា លោក ជាប់រវល់ប្រជុំ។
អង្គភាពសារព័ត៌មានយេីងនឹងរង់ចាំការបកស្រាយពីភាគីពាក់ពន្ធ័រៀងរាល់ម៉ោងធ្វើការ៕
