ខេត្ដកំពង់ធំ៖ លោកប៉ែន វណ្ណារិទ្ធ ប្រធាន មន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំបានប្រាប់ឲ្យដឹងថានាថ្ងៃទី ២៧ ខែកក្កដា ឆ្នាំ២០២១ នេះថា ការលួចកាប់បំផ្លាញព្រៃលិចទឹកមានកំហុសធ្ងន់ណាស់សម្រាប់ជនទាំងឡាយណាដែលបានប្រព្រឹត្ត ហើយជាប់ពន្ធនាគារជរយះពី ២ឆ្នាំ រហូតដល់៥ឆ្នាំ ដូច្នេះសូមបងប្អូនប្រជាពលរដ្ឋដូចជាជនមួយចំនួនបញ្ឈប់សកម្មភាពនេះជាបន្ទាន់ ។
លោកប្រធានបានបន្តទៀតថា រាល់ថ្ងៃនេះមន្ត្រីជំនាញយើងកំពុងបន្ត ទប់ស្កាត់ជាបន្តបន្ទាប់ ធ្វើយ៉ាងណាក្តីនៅតែមានជនខិលខូចជាលួចធ្វើសកម្មភាពឈូសបំផ្លាញ បង្ក្រាបកន្លែងមួយ នៅកន្លែងមួយ តែយ៉ាងណាយើងនៅតែបន្តទប់ស្កាត់ បង្ក្រាបជនទាំងនោះ យកមកផ្តន្ទាទោតាមផ្លូវច្បាប់ធរមាន។
លោកប្រធានបានបន្ថែមទៀតថា មួយយើងបានដឹងថាព្រៃលិចទឹក គឺជាដែនជំរករបស់សត្វព្រៃ សត្វត្រីចម្រុះ ចុះបើយើងនៅតែ បន្តនូវភាពឈូសឆាយដីព្រៃលិចទឹក នោះតើថ្ងៃអនាគត អាចមកដល់ដែនជម្រកសត្វព្រៃ សត្វត្រីចម្រុះដែរឬទេ ។ ដូច្នេះហើយសូមបងប្អូន ឬជនខិលខូចមួយចំនួនមេត្តាបញ្ឈប់សកម្មភាពនេះជាបន្ទាន់ បើយើងឃាត់បង្ក្រាបទៀតនឹងចាត់ការតាមនីតិវិធីច្បាប់ ។
សូមបញ្ជាក់ថា កាលពីថ្ងៃទី ២៦ ខែកក្កដា ឆ្នាំ២០២១ ជំនាញរដ្ឋបាលជលផលខេត្តកំពង់ធំ បង្ក្រាបត្រាក់ទ័រ១គ្រឿង ឈួសឆាយ ដីព្រៃលិចទឹកនៅចំណុចសហគមន៍បឹងប្រសាន្ត ស្ថិតនៅក្នុងឃុំម្សាក្រង ស្រុកស្ទោង ខេត្តកំពង់ធំ ត្រូវបានរងការឈួសឆាយ ជាព្រៃរនាមសម្រាប់ត្រីពងកូនបន្តពូជ ។
បើតាមប្រភពពីប្រជាពលរដ្ឋបានអោយដឹងថា គឺមានឈ្មោះហួនសហគមន៍ នៅទីនោះជាអ្នកកាងបទល្មើសអោយគ្រឿងចក្រត្រាក់ទ័រ របស់ឈ្មោះអ៉ីម ឃីម រស់នៅក្នុងឃុំម្សាក្រងខាងលើនេះ អោយធ្វើសកម្មភាពឈួសឆាយជារៀងរាល់ឆ្នាំនៅក្នុងសហគមន៍បឹងប្រសាន្ត។
ប្រភពបានបន្តទៀតថាឈ្មោះអុីម ឃីម នេះគ្រឿងចក្រត្រាក់ទ័រ របស់គាត់បានសហការគ្នាជាមួយសហគមន៍បឹងប្រសាន្ត ផ្ទៃដីព្រៃលិចទឹកដែលរងការឈួសឆាយ គឺទំហ៊ុំជិត ២០ហិកតាឯណ្ណោះ ពលរដ្ឋបានចោទសួរថាបើសហគមន៍បានសហការគ្នាបំផ្លាញសហគមន៍ខ្លួនឯងចឹងតើថ្នាក់ដឹកនាំខាងលើលោកគិតយ៉ាងម៉េចទៅវិញ៕
