ភ្នំពេញ)៖ ក្រុមកម្មករសំណងក្រីក្រជាច្រើននាក់ធ្វើការនៅក្នុងការដ្ឋានសំណង់ វូតលែន រ៉េស៊ីឌែន (Wood Land Ressidentces) ស្ថិតនៅចំណុចផ្លូវបេតុង ភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ សម្ដែងការហួសចិត្ត និងឈឺចាប់បំផុត ដែលលោកព្រះរាជអាជ្ញារង ស៊ិត វណ្ណៈ សម្រេចដោះលែងជនសង្ស័យ ជាថៅកែជនជាតិចិនតៃវ៉ាន់ម្នាក់។
ប្រភពពីតំណាងកម្មករបានឱ្យដឹងថា ជនសង្ស័យមានឈ្មោះ លីន គ័ងទីន (LIN-KUAN-TIAN) ភេទប្រុស អាយុ ៤១ឆ្នាំ ជនជាតិចិនតៃវ៉ាន់ មានទីលំនៅផ្ទះជួល សង្កាត់ព្រៃសរ ខណ្ឌដង្កោ រាជធានីភ្នំពេញ ជាថៅកែម៉ៅការក្នុងការដ្ឋានខាងលើ បានជួល ពួកគាត់ឱ្យធ្វើការទៅតាមជំនាញកាលពីអំឡុងខែមិថុនា ឆ្នាំ២០២០។
នៅពេលកម្មករធ្វើការងារ និងសាងសង់សំណងខាងលើរួចរាល់ស្រាប់តែ ឈ្មោះ លីន គ័ងទីន (LIN-KUAN-TIAN) គេចវេសមិនព្រមបើកប្រាក់ឈ្នួលសរុបប្រមាណជាង ៦០ម៉ឺនដុល្លារ ឱ្យកម្មករឡើយដោយយកលេសថា ម្ចាស់អគារមិនទាន់បើកប្រាក់ឱ្យខ្លួន។
លុះកម្មករទៅសួរម្ចាស់អគារទើបដឹងថា ឈ្មោះ លីន គ័ងទីន (LIN-KUAN-TIAN) បានបើកប្រាក់អស់ហើយ ប៉ុន្តែមិនព្រមយកទៅបើកឱ្យកម្មករ ទើបពួកគាត់សម្រេចនាំគ្នាដើររកឈ្មោះ លីន គ័ងទីន (LIN-KUAN-TIAN) រហូតបានជួបនៅថ្ងៃទី២៣ ខែកក្កដា ឆ្នាំ២០២១ និងនាំគ្នាឃាត់ខ្លួនជូនសមត្ថកិច្ចខណ្ណមានជ័យកសាងសំណុំរឿងបញ្ជូនទៅតុលាការចាត់ការតាមច្បាប់។
រឿងដែលហួសចិត្តបំផុតនោះ គឺនៅពេលដែលសមត្ថកិច្ចបញ្ជូនខ្លួនជនសង្ស័យឈ្មោះ លីន គ័ងទីន (LIN-KUAN-TIAN)ទៅដល់តុលាការ បែរជាលោក ស៊ិន វណ្ណៈ ព្រះរាជអាជ្ញារងអមសាលាដំបូងរាជធានីភ្នំពេញ សម្រេចដោះលែងឱ្យមានសេរីភាពវិញ ដោយពុំគិតអាណិតជីវិតកម្មករក្រីក្រដែលកំពុងជួបបញ្ហាជីវភាពក្នុងសម័យកូវីដនោះទេ។
ក្រុមកម្មករ ក៏បានដាក់ពាក្យប្ដឹងជនសង្ស័យលីន គ័ងទីន (LIN-KUAN-TIAN) ផងដែរកាលពីថ្ងៃទី២៦ ខែកក្កដា ឆ្នាំ២០២១ ដើម្បីទាមទារប្រាក់ដែលជនសង្ស័យឆបោកពួកគាត់ ប៉ុន្តែលោកព្រះរាជអាជ្ញារង ស៊ិន វណ្ណៈ ពុំបានយកទៅពិនិត្យ និងពិចារណានោះទេ ពោលគឺនៅថ្ងៃទី២៧ ខែកក្កដា ឆ្នាំ២០២១ លោកតំណាងអយ្យការរូបនេះ ក៏សម្រេចដោះលែងជនសង្ស័យឱ្យមានសេរីភាពវិញតែម្ដង។
តំណាងកម្មករសំណង់ខាងលើ សូមអំពាវនាវដល់ សម្តេចតេជោ ហ៊ុន សែន មេត្តាជួយអន្តរាគមន៍រកយុត្តិធម៌ឱ្យពួកគាត់ផង ព្រោះស្ថាប័នតុលាការ មិនបានអើពើចំពោះទុក្ខលំបាករបស់ពួកគាត់ជាកម្មករក្រីក្ររងគ្រោះនោះទេ។
ជាមួយគ្នានេះ ក្រុមកម្មករកំពុងពិចារណា ដាក់ពាក្យប្ដឹង លោកព្រះរាជអាជ្ញារង ស៊ិត វណ្ណៈ ទៅ ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ ដើម្បីឱ្យជួយពិនិត្យមើលចំណាត់ការ នៃសំណុំរឿងនេះផងដែរ៕
