ភ្នំពេញ ៖ លោក ម៉ូវ ម៉ានិត អភិបាលនៃគណៈអភិបាលខណ្ឌសែនសុខ អញ្ជើញពិនិត្យទីតាំងមណ្ឌលចាក់វ៉ាក់សាំងជូនដល់កុមារ និងយុវវ័យដែលមានអាយុចាប់ពី១២ឆ្នាំ ដល់ក្រោម១៨ឆ្នាំនាព្រឹកថ្ងៃទីទី០៧ ខែសីហា ឆ្នាំ២០២១ នៅមណ្ឌលសុខភាពទឹកថ្លា និងបានផ្តល់កិច្ចសម្ភាសន៍ដល់អ្នកសារព័ត៌មានថា៖ ក្រោមការដឹកនាំប្រកបដោយគតិបណ្ឌិត និងគិតគូរពីសុខភាពប្រជាពលរដ្ឋទូរទៅ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាចក្រកម្ពុជា តាមរយៈ គណៈកម្មការចំពោះកិច្ចចាក់វ៉ាក់សាំងកូវីដ-១៩ រដ្ឋបាលរាជធានីភ្នំពេញ បានប្រើយុទ្ធនាការស្រោចវ៉ាក់បន្ទាន់ដល់ប្រជាពលរដ្ឋដើម្បីការពារជំងឺឆ្លងនេះអោយទាន់ពេលវេលា។
លោកអភិបាលខណ្ឌបានបញ្ជាក់ថា សម្រាប់ខណ្ឌសែនសុខនេះមិនមែនជាលើកទីមួយទេ ដែលធ្វើយុទ្ធនាការចាក់វ៉ាក់សាំងបង្ការជំងឺកូវីដ-១៩ បន្ទាប់ពីចាក់ជូនមន្ត្រីរាជការ កងកំលាំងមកគឺធ្វើការចាក់ជូនមនុស្សចាស់អាយុ៦០ឆ្នាំឡើងទូរទាំងខណ្ឌ និងយុទ្ធនាការចាក់ជូនប្រជាពលរដ្ឋដែលមានអាយុចាប់ពី១៨ឆ្នាំឡើងដែលទើបតែបញ្ចប់ទៅកាលពីខែមុន ហើយនៅពេលនេះដែរដោយមានការយកចិត្តទុកដាក់ពីសម្តេចតេជោលោកបានខិតខំរកវ៉ាក់សាំងមកចាក់ជូនកុមារ និងយុវវ័យដែលមានអាយុចាប់ពី១២ឆ្នាំ ដល់ក្រោម១៨ឆ្នាំ សម្រាប់ខណ្ឌសែនសុខក្នុងយុទ្ធនាការនេះយើងមានមណ្ឌលចាក់វ៉ាក់សាំងចំនួន៥ ដែលបានធ្វើការបែងចែកប្រជាពលរដ្ឋចាក់តាមសង្កាត់គឺ៖ ទី១.មន្ទីរពេទ្យបង្អែកមិត្តភាពកម្ពុជា-ចិនសែនសុខ ទី២-មណ្ឌលសុខភាពឃ្មួញ ទី៣-មណ្ឌលសុខភាពក្រាំងធ្នង់ ទី៤-មណ្ឌលសុខភាពភ្នំពេញថ្មី ទី៥-មណ្ឌលសុខភាពទឹកថ្លា។
ក្នុងនាមរដ្ឋបាលខណ្ឌសែនសុខ សូមអំពាវនាវដល់មាតាបិតា ដែលមានកូនអាយុចាប់ពី១២ឆ្នាំ ដល់ក្រោម១៨ឆ្នាំ រស់នៅក្នុងមូលដ្ឋានខណ្ឌ អញ្ជើញមកចាក់អោយបានគ្រប់ៗគ្នា និងត្រូវចូលអនុវត្តវិធានការសុខាភិបាលជាប្រចាំ ដើម្បីទប់ស្កាត់ការឆ្លងរីករាលដាលជំងឺកូវីដ-១៩ នៅសហគមន៍របស់យើង៕
