ខេត្តស្វាយរៀង៖ នៅថ្ងៃអង្គារ ១កើត ខែភទ្របទ ឆ្នាំឆ្លូវ ត្រីស័ក ព.ស២៥៦៥ ត្រូវនឹងថ្ងៃទី០៧ ខែកញ្ញា ឆ្នាំ២០២១
ឯកឧត្តម តូច ប៉ូលីវ៉ា អភិបាលរងនៃគណៈអភិបាលខេត្តស្វាយរៀង តំណាង ឯកឧត្តម អភិបាលខេត្ត បានអញ្ជើញជាគណអធិបតីក្នុងពិធីសំណេះសំណាលជាមួយអង្គការសង្គមស៊ីវិល និងយុទ្ធនាការចុះបាញ់ថ្នាំសម្លាប់មេរោគកូវីដ-១៩ ជុំទី៣ របស់វេទិកាសម្ព័ន្ធសង្គមស៊ីវិល ដោយមានការអញ្ជើញចួលរួមពីឯកឧត្តម ស៊ឹម វុទ្ធា ឯកឧត្តម ជា ពៅ អគ្គលេខាធិការរងប្រធានក្រុមប្រឹក្សាភិបាល និងអង្គការសមាគមក្នុងខេត្តស្វាយរៀង ។
ថ្លែងក្នុងពិធីនេះ ឯកឧត្តមបានមានប្រសាសន៍ថាសង្គមស៊ីវិលក្នុងស្រុក និងបរទេសបានដើរតួនាទីយ៉ាងសំខាន់ក្នុងការផ្តល់និងគាំទ្រដល់សេវាសង្គមនៅតាមមូលដ្ឋានជនបទ និងសហគមន៍ដាច់ស្រយាល និងធ្វើសកម្មភាពនៅគ្រប់ក្រុង ស្រុក ក្នុងវិស័យសំខាន់ៗ ដែលពាក់ព័ន្ឋនឹងសេដ្ឋកិច្ចសង្គមនៅក្នុងប្រទេសកម្ពុជាក៏ដូចជាក្នុងខេត្តស្វាយរៀងផងដែរ ។
ឆ្លៀតក្នុងឱកាសនោះ ឯកឧត្តម ក៏បានពាំនាំការផ្តាំផ្ញើសួរសុខ ទុក្ខពីសំណាកឯកឧត្តមអភិបាលខេត្ត ជូនដល់ សមាជិក សមាជិកា អង្គពិធី ដែលបានចូលរួមឱ្យអនុវត្តឱ្យបានខ្ជាប់ខ្ជួននូវវិធានការការពារ ៣កុំ ៣ការពារ ។
បន្ទាប់មក ឯកឧត្តមអភិបាលរងខេត្ត បានទទួលសម្ភារប្រយុទ្ធប្រឆាំងជំងឺកូវីដ-១៩ ពីឯកឧត្តមអគ្គលេខាធិការរងប្រធានក្រុមប្រឹក្សាភិបាល សម្រាប់ប្រើប្រាស់ក្នុងសកម្មភាពប្រយុទ្ធប្រឆាំងជំងឺកូវីដ-១៩ក្នុងខេត្តស្វាយរៀង និងបានផ្តល់ជូនអំណោចរបស់រាជរដ្ឋាភិបាលតាមរយៈវេទិកាសម្ព័ន្ធសង្គមស៊ីវិលជូនដល់ សមាជិក សមាជិកា អង្គការសមាគម ដែរចូលរួមផងដែរ ៕
