ភ្នំពេញ ៖ កាលពីរសៀលថ្ងៃទី១៥ កញ្ញា ២០២១ ពលរដ្ឋបានផ្ញើវីដេអូ ទិដ្ឋភាព ទាំងស្រុង ពីបណ្តោយផ្លូវលេខ២៣០ និងផ្លូវជុំវិញ ផ្សារនាគមាស ស្ថិតក្នុងសង្កាត់ផ្សារដើមគរ ខណ្ឌទួលគោក រាជធានីភ្នំពេញ ត្រូវបានគេយកធ្វើអាជីវកម្ម ជាកន្លែងលក់ដូរ បោះដុំផ្លែឈើ បន្លែ និងធ្វើជាចំណតរថយន្ត ដោយបានបិទចរាចរណ៍ស្ទើរតែទាំងស្រុង ធ្វើឱ្យអោយអ្នកដំណើរ ឆ្លងកាត់ មិនសប្បាយចិត្ត និងមានការត្អួញត្អែខ្លាំង ជុំវិញបញ្ហាខាងលើនេះ។
ពលដដែលបន្តថា ក្រៅពីកកស្ទះចរាចរណ៍នៅលើដងផ្លូវ ក៏មានគំនរសំរាម កាកសំណល់បន្លែ និងផ្លែឈើស្អុយ រលួយ លើចិញ្ចើមផ្លូវ។
ប្រជាពលរដ្ឋម្នាក់ទៀត សុំមិនបញ្ចេញឈ្មោះ ថានៅវេលាព្រឹក និងល្ងាច កំណាត់ផ្លូវជុំវិញផ្សារនាគមាស មានកកស្ទះខ្លាំង ដោយ សារតែរថយន្ត រ៉ឺម៉កមកឈប់ទំលាក់ និងដឹកផ្លែឈើបន្លែ យ៉ាងអានាធិបតេយ្យនៅលើដងផ្លូវ។ ការយកដងផ្លូវធ្វើអាជីវកម្មបែបនេះមកពី អាជ្ញាធរខណ្ឌទួលគោក មិនបានអើពើ ចេះតែបណ្តែតបណ្តោយឱ្យថៅកែ និងក្រុមសន្តិសុខ ផ្សារ ធ្វើតាមចិត្ត ។
ទោះបីជាយ៉ាងណា មន្ត្រីសាលាខណ្ឌទួលគោកម្នាក់ បានឱ្យដឹងថា កន្លងមកសាលាខណ្ឌទួលគោក បានយកចិត្តទុកដាក់ ខិតខំចុះរៀបចំសណ្តាប់ធ្នាប់ និងចុះវាស់វែងកំណត់ចិញ្ចើមផ្លូវកំណត់ឱ្យលក់ដូរ ព្រមទាំងធ្វើសេចក្តីជួនដំណឹងជាបន្តបន្ទាប់ ដល់ផ្សារ តែថៅកែផ្សារមិនបានយកចិត្តទុកដាក់ចូលរួមសហការឡើយ ។ នៅពេលដែលអាជ្ញាធ រចុះរៀបចំបានតែមួយភ្លេត គឺចេញមកវិញដដែល ។
សូមជម្រាបថា កាល លោក ឯក ឃុនដឿន នៅជាអភិបាលខណ្ឌទួលគោក ហាក់បរាជ័យ លើការរៀបចំ សណ្តាប់ធ្នាប់ របៀបរយ ក្នុងមូលដ្ឋាន ជាពិសេស ជុំវិញផ្សារនាគមាស នេះតែម្តង។
ពលរដ្ឋសង្ឃឹមថា ក្នុងអាណត្តិ លោក ជា ពិសី កាន់ជា អភិបាលខណ្ឌទួលគោ អាចយកជ័យជំនះ លើការរៀបចំសណ្តាប់ធ្នាប់ របៀបរយ ក្នុងមូលដ្ឋាន ដើម្បីលើកំពស់ សោភ័ណភាព រាជធានីភ្នំពេញ និងជួយកាត់បន្ថយការកកស្ទះចរាចរណ៍ ផងដែរ៕
