ខេត្ដស្វាយរៀង៖នាយឧត្តមសេនីយ៍សៅ សុខា អគ្គមេបញ្ជាការរងកងយុទ្ធពលខេមរៈភូមិន្ទនិងជាមេបញ្ជាការកងរាជអាវុធហត្ថលើផ្ទៃប្រទេសបានថ្លែងប្រាប់កងកម្លាំងទាំងអស់នៅក្នុងខេត្តស្វាយរៀងឲ្យពង្រឹងសន្តិសុខនៅតាមបន្ទាត់ព្រំដែន ឈរលើមូលដ្ឋាន សន្តិភាព មិត្តភាព សហប្រតិបត្តិការនិងការអនុវត្តច្បាប់ឲ្យបានត្រឹមត្រូវ ដើម្បីរក្សាបានសន្តិសុខជាតិកាន់តែល្អប្រសើរ។
ការថ្លែងរបស់នាយឧត្តមសេនីយ៍សៅ សុខាបែបនេះបានធ្វើឡើងនៅក្នុងពិធីសម្ពោធអាគារមូលដ្ឋានកងរាជអាវុធហត្ថក្រុងបាវិត ដែលចំណាយថវិកាអស់ប្រមាណជាង ៤០ មុឺនដុល្លារ នៅព្រឹកថ្ងៃទី ៨ ខែធ្នូឆ្នាំ ២០២១ ដែលមានការចូលរួមពីលោកម៉ែន វិបុល អភិបាលខេត្តស្វាយរៀងព្រមទាំងមានការចូលរួមពីកងកម្លាំងទាំងបីប្រភេទ មន្ត្រីរាជការជាច្រើននាក់ផងដែរ។
នាយឧត្តមសេនីយ៍សៅ សុខាបានថ្លែងកោតសរសើរដល់កងរាជអាវុធហត្ថខេត្តស្វាយរៀងដែលបានបំពេញភារកិច្ចនិងតួនាទីបានល្អប្រសើរឈរលើការសាមគ្គីភាព ឯកភាពផ្ទៃក្នុង និងការអនុវត្តច្បាប់យ៉ាងត្រឹមត្រូវជាពិសេសបានកសាងអាគារទីបញ្ជាការមូលដ្ឋាននៅតាមបណ្ដាស្រុក ក្រុង មានកន្លែងធ្វើការសមរម្យដែលបានផ្ដល់ទំនុកចិត្តដល់ប្រជាពលរដ្ឋក្នុងការពឹងពាក់ឱ្យសមត្ថកិច្ចកងរាជអាវុធហត្ថចុះអន្តរាគមន៍ពាក់ព័ន្ធទៅនឹងការបង្ក្រាបបទល្មើសផ្សេងៗផងដែរ។
លោកនាយឧត្តមសេនីយ៍បានបន្តថាគ្មានការលំបាកណាដែលយើងមិនអាចធ្វើបាននោះទេ ព្រោះពួកយើងបានឆ្លងកាត់ នូវបទពិសោធន៍និងការដឹកនាំបានល្អគ្រប់ថ្នាក់ ជាពិសេសយើងមានមគ្គុទេសក៍ដ៏ឆ្នើមគឺសម្ដេចអគ្គមហាសេនាបតីតេជោហ៊ុន សែននាយករដ្ឋមន្ត្រីនៃកម្ពុជាដែលបានស្វែងរកសន្តិភាពជូនជាតិមាតុភូមិនិងប្រែក្លាយប្រទេសកម្ពុជាពីចំណុចសូន្យឲ្យមានការអភិវឌ្ឍលើគ្រប់វិស័យ។
សូមបញ្ជាក់ថានៅក្នុងពិធីនេះដែរលោកនាយឧត្តមសេនីយ៍សៅ សុខាក៏បានឧបត្ថម្ភដល់កងកម្លាំងទាំងបីប្រភេទនិងសាលាសង្កាត់បាវិត ដោយមួយអង្គភាពទទួលបានថវិកា ៥ លានរៀលផងដែរ៕
