កូរ៉េខាងត្បូង៖ រដ្ឋាភិបាលកូរ៉េខាងត្បូង បានប្រកាសស្ថានភាព នៃគ្រោះមហន្តរាយធម្មជាតិ នៅពេលដែលអ្នកពន្លត់អគ្គីភ័យ បន្តប្រយុទ្ធនឹងភ្លើងឆេះព្រៃ នៅភាគឦសានប្រទេស។ យ៉ាងហោចណាស់ មានមនុស្សម្នាក់ត្រូវបានសម្លាប់ និងរាប់ពាន់នាក់ត្រូវ បានគេបង្ខំឱ្យជម្លៀស។
បុគ្គលិកសង្គ្រោះបន្ទាន់ជាង ១ពាន់នាក់ និងរថយន្តពន្លត់អគ្គីភ័យរាប់រយគ្រឿង ត្រូវបានគេដាក់ពង្រាយ ដើម្បីគ្រប់គ្រងអគ្គីភ័យដ៏សន្ទោសន្ធៅនោះ។
គួរបញ្ចាក់ថា អគ្គីភ័យបានចាប់ផ្តើមនៅខេត្តហ្គានវ៉ុន កាលពីថ្ងៃព្រហស្បតិ៍។ ក្រុមមន្ត្រីនិយាយថា អគ្គីភ័យដែលបណ្តាលមកពីខ្យល់បក់ខ្លាំង បានឆេះផ្ទះ១២៥ខ្នងនិងព្រៃឈើ២៥០ហិកតា នៅក្នុងតំបន់តាមបណ្តោយឆ្នេរសមុទ្រ។ ចំណែកនៅកន្លែងមួយចំនួន ភ្លើងឆេះបានថយចុះ ប៉ុន្តែតំបន់ផ្សេងទៀត នៅតែឆេះដដែល។
មនុស្សជាង៤ពាន់នាក់ បានចំណាយពេលជម្រក បណ្តោះអាសន្នពេញមួយយប់។ អ្នកខ្លះនិយាយថា ការជម្លៀសខ្លួនរបស់ពួកគេ ត្រូវបានពន្យារពេល ដោយចរាចរណ៍កកស្ទះ។
វាជាលើកដំបូងក្នុងរយៈពេល១៤ឆ្នាំកន្លងមកហើយ ដែលភ្លើងឆេះភ្នំ បាននាំឱ្យរដ្ឋាភិបាលប្រកាសស្ថានភាពអាសន្ន នៃគ្រោះមហន្តរាយធម្មជាតិ។ លោកប្រធានាធិបតី Moon Jae-in បានរៀបចំកិច្ចប្រជុំបន្ទាន់មួយ ហើយបានណែនាំឱ្យមន្រ្តីនានា ប្រើប្រាស់ធនធានទាំងអស់ ដែលអាចប្រើបាន ដើម្បីគ្រប់គ្រងស្ថានការណ៍ឲយបាន៕
