ខេត្ដកំពង់ចាម ៖ សកម្មភាពជីកដីបឹងក្រចាប់និងដឹកអាចម៌ដីយកទៅលក់យ៉ាងគគ្លើនគ្រប់ទីកន្លែងដែលគេស្គាល់ថាជាក្រុមរថយន្ដដឹកអាចម៌ដីរបស់លោកហុង វណ្ណឌី កំពុងធ្វើសកម្ម ភាពដឹកអាចម៌ដី ចេញពីចំណុចបឹងក្រចាប់ ដែលមានទីតាំងស្ថិតនៅក្នុងភូមិស្វាយពោធិ៍ ឃុំស្វាយពោធិ៍ ស្រុកស្រីសន្ធរ ខេត្តកំពង់ចាម ដោយគ្មានញញើតនិងអាជ្ញាធរមានសមត្ថកិច្ចនៅក្នុងមូលដ្ឋានឡើយ ។
សកម្មភាពការជីកនិងដឹកអាចម៌ដីបឹងយកទៅលក់ របស់លោកហុង វណ្ណឌី ត្រូវបានគេសង្ស័យថា មិនមានអាជ្ញាប័ណ្ណត្រឹមត្រូវចេញពីក្រសួងរ៉ែនិងថាមពលនោះទេ។
យោងតាមលិខិតស្នើរសុំរបស់លោកហុង វណ្ណឌី ជួនឯកឧត្ដមអភិបាលខេត្ដកំពង់ចាមចុះថ្ងៃទី២៨ខែឧសភាឆ្នាំ២០២០ ដោយសន្យាថា៖ស្តារបឹងក្រចាប់ដែលមានទំហំផ្ទៃដីចំនួន៨៧ហិចតា ស្តារប្រឡាយប្រវែង ១០គីឡូម៉ែត្រ និងធ្វើផ្លូវលំមួយខ្សែមានចំនួន១០គីឡូម៉ែត្រ ។
ពលរដ្ឋបានលើឡើងថាការស្តារបឹងក្រចាប់នេះលោកហុង វណ្ណឌី មិនបានគោរពតាមការសន្យានៅក្នុងពាក្យស្នើរសុំនោះទេបែជាស្ដាដីបឹងដឹកយកទៅលក់យ៉ាងគគ្រឹកគគ្រេងយកលុយដាក់ខោប៉ៅរៀងៗខ្លួនទៅវិញ បើក្រលេកមើលខាងអាជ្ញាធរមានសមត្ថកិច្ចវិញមិនអើពើនោះទេហើយក៍គ្មានវិធានការទប់ស្កាត់នោះទេទំនងទុកឲ្យក្រុមរថយន្ដដឹងអាចម៌ដីបឹងក្រចាប់នេះលក់ទាល់តែអស់ទេដឹង ឬមួយអាជ្ញាធរមានសមត្ថកិច្ចត្រូវថ្នាំសណ្តំរបស់លោកហុង វណ្ណឌី អស់ហើយមើលទៅ ទើបបានជាបណ្តែតបណ្តោយអោយរថយន្តធន់ធំ របស់លោកហុង វណ្ណឌី ដឹកអាចម៌ដីយកទៅលក់បន្តកន្ទុយគ្នា ដូចរថយន្តដង្ហែបុណ្យកឋិនបែបនេះ។
ពាក់ព័ន្ធនិងការជីកនិងអាចម៌ដីបឹងក្រចាប់យកទៅលក់នេះដែរ លោកហុង វណ្ណឌី បានប្រាប់បានប្រាប់អ្នកសារព័ត៌មានយើងថា គាត់ពិតជាបានដឹកអាចម៌ដីយកទៅលក់មែន បើមិនអោយគាត់ដឹកអាចម៌ដីយកទៅលក់ទេ តើបានលុយមកពីណាដើម្បីទិញប្រេងចាក់គ្រឿងចក្រ ដើម្បីស្តារបឹងក្រចាប់ និងធ្វើផ្លូវលំមួយខ្សែរជូនពលរដ្ឋ។
ចំពោះលោក លី ចាន់ធី ប្រធានមន្ទីរ៉ែនិងថាមពលខេត្តកំពង់ចាម បានអោយដឹងថា ការងារនេះ មិនទាន់ស្នើសុំមកខាងជំនាញខាងលោកនៅឡើយទេ គឺគ្រាន់ជាការស្នើសុំគោលការណ៍រួមពីឯកឧត្តមអភិបាលនៃគណៈអភិបាលខេត្តកំពង់ចាម ឆ្លងតាមរយៈមន្ទីរធនធានទឹក និងមន្ទីរកសិកម្ម សិន ប្រសិនបើដឹកអាចម៍ដីស្ដារបឹងនេះធ្វើជាទំនប់ធារាសាស្រ្ត មិនដឹកដីលក់ទេ តាមច្បាប់ស្ដីការគ្រប់គ្រង និងអាជីវកម្មធនធានរ៉ែ មានចែងលើកលែងការស្នើសុំច្បាប់អាជីវកម្ម និងបង់សួយសាររ៉ែ។
បងប្អូនប្រជាពលរដ្ឋសំណូមពរដល់អាជ្ញាធរពាក់ព័ន្ធទាំងអស់មេត្តាជួយពិតនិត្យមើលក្រុមឡានដឹកដីធុនធំដឹកអាចម៌ដីបឹងក្រចាប់យកទៅលក់ទាំងនេះផងទាន បងប្អូនប្រពលរដ្ឋមានសង្ឃឹមជឿជាក់លើកឯកឧត្តម អ៑ុន ចាន់ដាអភិបាលនៃគណៈអភិបាលខេត្តកំពង់ចាមឯកឧត្ដមតែងតែដោះស្រាយរាល់បញ្ហាប្រឈមនានាជូនពលរដ្ឋកន្លងមក ពួកគាត់សង្ឈឹមយ៉ាងមុតមាំលើឯកឧត្តមអភិបាលខេត្តនិងមានវិធានការទប់ស្កាត់ក្រុមរថយន្ដដឹកអាចម៌ដីបឹងក្រចាប់យកទៅលក់របស់ហុង វណ្ណឌីនេះផងដើម្បីផលប្រយោជន៍រួម៕
