ភ្នំពេញ ៖ ជនសង្ស័យពីរនាក់តំណាងឲ្យក្រុមហ៊ុន E-zone express បានធ្វើការទូទាត់ថ្លៃប្រាក់ទិញប្រេងតាមរយៈមូលប្បទានប័ត្រ(សែក) ចំនួនពីរសន្លឹកដែលសរុបជាទឹកប្រាក់ជាង ១០ម៉ឺនដុល្លារ ត្រូវបានកម្លាំងនគរបាលការិយាល័យព្រហ្មទណ្ឌកំរិតធ្ងន់ នៃនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ បានធ្វើការឃាត់ខ្លួន យោងតាមពាក្យបណ្ដឹងរបស់ជនរងគ្រោះ ពាក់ព័ន្ធការទូទាត់ថ្លៃប្រេង ដោយចេញសែកស្អុយចំនួនពីរសន្លឹក សរុបជាទឹកប្រាក់ជាង ១០ម៉ឺនដុល្លារ និងបានបញ្ជូនខ្លួនទៅអយ្យការអមសាលាដំបូង រាជធានីភ្នំពេញ កាលពីរសៀលថ្ងៃទី០៤ ខែមិនាម្សិលមិញនេះ ដើម្បីចាត់ការតាមនីតិវិធី។
នគរបាល បានឲ្យដឹងថា ជនសង្ស័យ ទាំង២នាក់មានឈ្មោះ ទី១, ប៉ែន សុភាព ភេទប្រុស អាយុ៣៨ឆ្នាំ ជនជាតិខ្មែរ មុខរបរបុគ្គលិកក្រុមហ៊ុន និងទី២,ឈ្មោះ ស៊ាង ថៃ ភេទប្រុស អាយុ ៣៨ឆ្នាំ ជនជាតិខ្មែរមុខរបរបុគ្គលិកក្រុមហ៊ុន ពាក់ព័ន្ធករណីមិនបំពេញកាតព្វកិច្ចចំពោះឧបករណ៍ដែលអាចជួញដូរបាន ។
ប្រភពដដែលបន្ដថា ជនសង្ស័យទាំងពីរត្រូវបានកម្លាំងនគរបាលជំនាញឃាត់ខ្លួនកាលពីថ្ងៃទី០៣ ខែមិនា ឆ្នាំ២០២២ នៅម្ដុំសង្កាត់ទន្លេបាសាក់ ខណ្ឌចំការមន រាជធានីភ្នំពេញ តាមពាក្យបណ្ដឹងរបស់ជនរងគ្រោះ។
សូមបញ្ជាក់ថាកាលពីថ្ងៃទី ១៦និងថ្ងៃទី៣០ ខែធ្នូឆ្នាំ ២០២១ ពាក់ព័ន្ធជាមួយនឹងករណីចេញសែកស្អុយនេះ បុរសពីរនាក់ដែលជាជនសង្ស័យតំណាងឲ្យក្រុមហ៊ុន E-zone express បានធ្វើការទូទាត់ថ្លៃប្រាក់ទិញប្រេងតាមរយៈមូលប្បទានប័ត្រ(សែក) ចំនួនពីរសន្លឹកដែលសរុបជាទឹកប្រាក់ជាង ១០ម៉ឺនដុល្លារ ក្រោយពីបានចេញសែករួចមក ជនរងគ្រោះឃើញថា សែកទាំងពីរ មិនមានសាច់ប្រាក់ក្រោយមកជនរងគ្រោះ បានព្យាយាមចរចាដោះស្រាយបំណុលតែមិនបានលទ្ធផលសោះ ហើយបុគ្គលទាំងពីរនាក់មានចេតនាគេចវេសមិនបំពេញកាតព្វកិច្ចចំពោះឧបករណ៍ដែលបានជួញដូរ ធ្វើឲ្យប៉ះពាល់ផលប្រយោជន៍យ៉ាងធ្ងន់ធ្ងររបស់ក្រុមហ៊ុនជនរងគ្រោះ ។
បច្ចប្បន្ន ជនសង្ស័យទាំង២នាក់ កំពុងស្ថិតក្នុងដំណាក់កាលតំណាងអយ្យការបើកការស៊ើបសួរនៅឡើយរងចាំការចោទប្រកាន់ជាផ្លូវការ បញ្ជូនទៅចៅក្រមស៊ើបសួរដើម្បីបន្តនីតិវិធី៕
