ខេត្តកំពង់ធំ ៖មានសេចក្ដីរាយការណ៍មកថា សកម្មភាពដឹកជញ្ជូនឈើដោយខុសច្បាប់ បានធ្វើសកម្មភាព យ៉ាងគគ្រឹកគគ្រេង តាមបណ្តោយផ្លូវលេខ៦២ ចេញពីខេត្តព្រះវិហារ ចូលមកដេប៉ូឈើ ស្របច្បាប់ តែឈើខុសច្បាប់ នៅក្នុងខេត្តកំពង់ធំ ជារៀងរាល់ថ្ងៃដោយពុំមានអាជ្ញាធរនឹងសមត្ថកិច្ចពាក់ពន្ធ័ណា ហ៊ានបង្ក្រាបឡើយ ។
មន្ដ្រីតូចតាចក្នុងខេត្ដកំពង់ធំលួចខ្សឹបប្រាប់អ្នកសារព័ត៌មានយើងថាក្រុមឈ្មួញឈើទាំងនេះដឹកជញ្ចូនបានដោយរលួនបែបនេះគឺដោយសារតែត្រូវបានឈ្មួញរត់ការគ្រប់ច្រកល្ហកអស់ហើយនៅក្នុងខេត្ដកំពង់ធំ។
ជាក់ស្តែង ជារៀងរាល់ថ្ងៃគេសង្កេតឃើញថា សកម្មភាពដឹកជញ្ជូនឈើខុសច្បាប់តាមរយៈរ៉ឺម៉កយក្ស ដែលមានប្រវែងជិត១៩ម៉ែត្រ ត្រូវបានគេស្គាល់ថារបស់ ឈ្មួញឈើ ឈ្មោះ ឃាង បានធ្វើសកម្មភាពដឹក ជញ្ជួន ដូចដង្ហែកឋិន ក្នុងមួយថ្ងៃ៥ទៅ ៧ជើង ។
ដោយសារតែឃើញមានសកម្មភាពដឹកជញ្ជូនឈើយ៉ាងគគ្រឹកគគ្រេងបែបនេះមហាជនបានសង្ស័យថា ទំនងជា អាជ្ញាធរនិងសមត្ថកិច្ចពាក់ត្រូវរ៉ូវជាមួយក្រុមឈ្មួញឈើទាំងអស់នេះហើយទេដឹងបានជាមិនមានវិធានការទប់ស្កាត់ ទើបបណ្ដែតបណ្ដោយឲ្យ លោក ឃាង ដឹកជញ្ជូនដោយសេរីតាមអំពើចិត្ដបែបនេះទៅវិញ។
លោក ឃាង ដែលជាឈ្មួញឈើដុះស្លែដ៍ល្បី បានដើរអួតអាង ស្រែកក្ដែងៗ ថា មេព្រៃ និងបរិស្ថាន ក្នុងខេត្តកំពង់ធំ មួយចំនួន ដែលមានស្នាក់ការតាមផ្លូវ៦២ សុទ្ធតែរស់ដោយសារ លោកចិញ្ចឹម ដែលជាថ្នូរនិងមិនចាប់រ៉ឺម៉ករបស់លោក ឃាង ដែលដឹកឈើចេញពី តំបន់ហាមឃាត់ ចូលមកដេប៉ូឈើ ឈ្មោះ លោក ស័រ ស្ថិតនៅភូមិថ្នល់បែកឃុំត្រពាំងឬស្សីស្រុកកំពង់ស្វាយខេត្តកំពង់ធំ។
ពាក់ព័ន្ធនិងករណីខាងលើនេះអង្គភាពសារព័ត៌មានយើងព្យាយាមទំនាក់ទំនងសុំការបំភ្លឺពីលោកប៊ុន សុធី នាយខណ្ទរដ្ឋបាលព្រៃឈើកំពង់ធំដោយទូរសព្ទខលចូលតែគ្មានអ្នកទទួល។
ចំណែកលោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខា ប្រមាញ់ និង នេសាទខេត្តកំពង់ធំ បានឲ្យសារព័ត៌មានយើងដឹងថា លោកនិងស្រាវជ្រាវចាត់ វិធានការបង្រ្កាបទប់ស្កាត់បទល្មើសព្រៃឈើដែលដឹកជញ្ជូនដោយខុសច្បាប់ និងស្រាវជ្រាវ ដេប៉ូឈើមួយចំនួន ដែលទិញឈើមកពីប្រភពមិនច្បាស់លាស់ រួមទាំងពង្រឹងតួនាទីភារកិច្ចរបស់សមត្ថកិច្ចជំនាញឲ្យចូលរួមការពារទប់ស្កាត់បទល្មើសព្រៃឈើ៕
