ភ្នំពេញ៖ ប្រភពពីប្រជាពលរដ្ឋ រាយការណ៍ប្រាប់ អ្នកសារព័ត៌មានយើង កាលពីថ្មីៗនេះថា មានទីតាំងបើកលេងល្បែងស៊ីសង ភ្នាល់ជល់មាន់ តាមប្រពន្ធ័ អនឡាញ កំពុងបើកដំណើរការ ទទួលភ្ញៀវយ៉ាងរលូន ហាក់មិនញញើត អាជ្ញាធរ និង សមត្ថកិច្ច ពាក់ព័ន្ធក្នុងមូលដ្ឋានទាល់តែសោះ ដែលមានទីតាំង តាមបណ្តោយផ្លូវ២១៧ ភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ។
ប្រភពដដែលបន្ដថា ទីតាំងខាងលើនេះ មិនមែនទើបបើកឲ្យដំណើរការតែល្បែងភ្នាល់ តាមអនឡនឡាញ តែមួយមុខនោះទេ ទីតាំងនេះ ក៏ជាកន្លែងដែលអំណោយផលដល់ ក្រុមក្មេងទំនើង ក្រុមបងតូចបងធំ ចូលលេងញឹកញាប់ផងដែរ។
ដោយឡែក ពលរដ្ឋរស់នៅក្បែរៗ កន្លែងនោះ បានប្រាប់ អ្នកសារព័ត៌មានយើងថា មួយថ្ងៃៗ មានមនុស្សចេញចូលមិនចេះដាច់មិន ថាយប់ ឬថ្ងៃ នោះទេ។
ប្រជាពលរដ្ឋ ដាក់ការសង្ស័យថា ទំនងជា ម្ចាស់ទីតាំង បានសែនព្រេន ជូនដល់ អាជ្ញាធរ និងសមត្ថកិច្ច ពាក់ពន្ធ័អស់ហើយទេដឹង? បានជាមិនបង្ក្រាប ហើយបណ្ដែតបណ្ដោយឲ្យក្រុមអ្នកញៀនល្បែងស៊ីសង ចូលលេង ឥតព្រួយបារម្ភបែបនេះ?
ពលរដ្ឋលើកឡើងថា ល្បែងស៊ីសងគ្រប់ប្រភេទ ជាឬសគល់ នៃបទល្មើស ចោរកម្ម លួច ឆក់ ប្លន់ និង អំពើហិង្សា ក្នុងគ្រួសារ ជាដើម ជាហេតុនាំឲ្យប្រជាពលរដ្ឋ មានការព្រួយបារម្ភ ភ័យខ្លាច និងភាពអសន្តិសុខ នៅក្នុងមូលដ្ឋាន ជាដើម។
សូមជម្រាបថា លោក ឃួង ស្រេង អភិបាលក្រុងភ្នំពេញ បានលើកឡើងថា ការងារអសកម្ម ត្រូវតែកាត់បន្ថយឲ្យអស់។ កងកម្លាំងមានសមត្ថកិច្វ ត្រូវតែបង្ក្រាបឲ្យអស់នូវល្បែងស៊ីសងគ្រប់ប្រភេទ និងគ្រឿងញៀន ពោល គឺរក្សាអោយបាននូវសន្តិសុខ ជូនប្រជាពលរដ្ឋ។
អភិបាលក្រុងភ្នំពេញ ថ្លែងបែបនេះ ក្នុងជំនួបសំណេះសំណាល ជាមួយប្រធានក្រុមប្រឹក្សាសង្កាត់ទាំង១១ នៃខណ្ឌដូនពេញ កាលពីរសៀលថ្ងៃទី៨ ខែកុម្ភៈ ឆ្នាំ២០២២ នៅទីស្នាក់ការគណបក្ស ប្រជាជនកម្ពុជាខណ្ឌដូនពេញ។
លោក ស ថេត ស្នងការនគរបាលរាជធានីភ្នំពេញ ក៍បានលើកឡើងថា ការបង្ក្រាបល្បែងស៊ីសង និងការ បង្ក្រាបទៅលើគ្រឿងញៀន ជាបញ្ហាដ៏ធំ ដែលអាជ្ញាធរ មានសមត្ថកិច្ច ត្រូវតែបង្ក្រាបឱ្យខាងតែបាន។ ឯកលោកស្នងការ បន្ដថា ល្បែងស៊ីសងជាដើមចម បង្កឱ្យមានអសន្តិសុខ នៅក្នុងសង្គម ហើយការងារនេះ ឃើញថា អភិបាលខណ្ឌ ក៏បានដឹកនាំដើម្បីបង្ក្រាបបានជាច្រើន ករណីផងដែរ ដើម្បីធ្វើយ៉ាងណាឱ្យល្បែងស៊ីសង មានការថមថយ នឹងឈានទៅដល់ការលុបបំបាត់ទាំងស្រុង។ លោកស្នងការរាជធានីភ្នំពេញ ថ្លែងបែបនេះ កាលពីព្រឹកថ្ងៃទី២៣ ខែធ្នូ ឆ្នាំ២០១៩ នៅសាលារាជធានីភ្នំពេញ។
គួររំលឹកផងដែរថា កន្លងមក សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួង មហាផ្ទៃ ធ្លាប់ដាក់បទបញ្ជាឲ្យមន្ត្រីនគរបាលពាក់ពន្ធ័ ក្រោមឱវ៉ាទ ទូទាំងប្រទេស ត្រូវតែបង្ក្រាបរាល់ល្បែងស៊ីសងខុសច្បាប់គ្រប់ប្រភេទ មិនត្រូវមានការយោគយល់ឡើយ ដើម្បីធានាឲ្យបាននូវសុខសុវត្ថិភាពជួនប្រជាពលរដ្ឋ ឲ្យស្របតាម គោលនយោបាយ ភូមិ ឃុំ មានសុវត្តិភាពទាំង ៧ចំណុច របស់រដ្ឋាភិបាល។
ទន្ទឹមនឹងប្រសាសន៍ណែនាំដ៍ខ្ពស់ខ្ពស់ ពីថ្នាក់ដឹកនាំ ញឹកញាប់ក្នុងកិច្ចប្រជុំនានា ជុំវិញការបង្ក្រាបល្បែងស៊ីសង និងការបង្ក្រាបគ្រឿងញៀន ក្នុងមូលដ្ឋាន ដើម្បីធានាឲ្យបាននូវសុខសុវត្ថិភាព ជួនប្រជាពលរដ្ឋ ឲ្យស្របតាម គោលនយោបាយ ភូមិ ឃុំ មានសុវត្តិភាពទាំង ៧ចំណុច របស់រដ្ឋាភិបាលនៅឡើយ។
នៅឯទឹកដីខណ្ឌដង្កោ ក្រោមការដឹកនាំរបស់ លោកស្រី គឹម ញឹ ប ជាអភិបាលខណ្ឌ លោក ជឹម ស៊ីថា ជាអធិការខណ្ឌ ឯណេះវិញ អាជ្ញាធរ និងសម្ថកិច្ច ហាក់មិនទាន់បង្រាបអោយចំគោលដៅ និង មានប្រសិទ្ធភាពនៅឡើយ។
ប្រជាពលរដ្ឋ នៅតែទទូចស្នើសុំដល់មន្ត្រីពាក់ព័ន្ធទាំងអស់ ជាពិសេស លោកស្រី គឹម ញឹ ប ជាអភិបាលខណ្ឌ និង លោក ជឹម ស៊ីថា ជាអធិការខណ្ឌ មេត្តាចុះត្រួតពិនិត្យស្រាវជ្រាវឈានដល់ បង្ក្រាបទីតាំង ហ្គេមអនឡាញ បង្កប់ល្បែងភ្នាល់ស៊ីសង ភ្នាល់ជល់មាន់ មួយកន្លែងនេះផង បើអាច សូមឃាត់ទាំងមនុស្ស ឬ ម្ចាស់ទីតាំង បញ្ជូនទៅ តុលាការ សម្រេចទោស អោយស្របតាម ប្រសាសន៍ លោក ឃួង ស្រេង អភិបាលរាជធានីភ្នំពេញផង។
ជុំវិញ ករណីខាងលើ អង្គភាពសារព័ត៌មានយើង នឹងផ្សាយជាបន្តបន្ទាប់ទៀត ប្រសិនបើមាន ការពន្យល់បកស្រាយពី អាជ្ញាធរ និង សមត្ថកិច្ច ឬ សាម៉ីភាគី ពាក់ព័ន្ធទាំងអស់៕
