ភ្នំពេញ ៖ អគ្គិភ័យបានឆាបឆេះផ្ទះប្រជាពលរដ្ឋអស់ចំនួន ១៨ខ្នង ហេតុការណ៍គ្រោះអគ្គិភ័យនេះបានកើតឡើងនៅតាមបណ្ដោយផ្លូវជាតិលេខ៥ ភូមិ២ ក្រុម៤ សង្កាត់ច្រាំងចំរេះទី១ ខណ្ឌឫស្សីកែវ រាជធានីភ្នំពេញ។
លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានប្រាប់ឲ្យដឹង នៅព្រឹកថ្ងៃទី០៧ ខែឧសភា ឆ្នាំ២០២២នេះ ថា ចំពោះករណីអគ្គិភ័យខាងលើនេះ គឺបណ្ដាលឱ្យផ្ទះចំនួន ១៨ខ្នង ត្រូវឆាបឆេះអស់ទាំងស្រុង ផ្ទះដែលត្រូវអគ្គិភ័យឆាបឆេះទាំង ១៨ខ្នងនោះ គឺសាងសង់អំពីថ្មក្រោមឈើលើ។
លោកបានបញ្ជាក់បន្ថែមទៀតថា នៅក្នុងប្រតិបត្តិការពន្លត់អគ្គិភ័យខាងលើនេះ គឺកម្លាំងជំនាញបានប្រើប្រាស់រថយន្តពន្លត់អគ្គិភ័យចំនួន ៣០គ្រឿង ដោយក្នុងនោះរថយន្តការិយាល័យអគ្គីភ័យចំនួន ២១គ្រឿង ប្រើប្រាស់ទឹកអស់ ៤២ឡាន ស្មើនឹង ១៦៨ម៉ែត្រគូប, រថយន្តជំនួយអន្តរាគមន៍មកពីសាលាខណ្ឌឫស្សីកែវចំនួន ១គ្រឿង ប្រើប្រាស់ទឹកអស់ចំនួន ២ឡាន ស្មើនឹង ៨ម៉ែត្រគូប, រថយន្តក្រុមហ៊ុន OCIC ទីក្រុងជ្រោយចង្វារ ចំនួន ៧គ្រឿង ប្រើប្រាស់ទឹកអស់ចំនួន ៧ឡាន ស្មើនឹង ២៨ម៉ែត្រគូប និង រថយន្តក្រុមហ៊ុនស្រាបៀរកម្ពុជាចំនួន ១គ្រឿង ប្រើប្រាស់ទឹកអស់ ១ឡាន ស្មើនឹង ៤ម៉ែត្រគូប។
នៅក្នុងប្រតិបត្តិការនោះកម្លាំងជំនាញបានធ្វើការអន្តរាគមន៍បាញ់ពន្លត់ឲ្យរលត់ទាំងស្រុងនៅវេលាម៉ោង ១និង០០នាទីរំលងអធ្រាត្រ។ ចំពោះមូលហេតុ នៃការឆាបឆេះផ្ទះប្រជាពលរដ្ឋខាងលើនេះ កម្លាំងសមត្ថកិច្ចជំនាញកំពុងតែធ្វើការស្រាវជ្រាវ៕
