ខេត្ដកំពង់ចាម៖ (ខ្ញុំមិនមានការយោគយល់ និងលើកលែងជាដាច់ខាត ចំពោះ ករណីល្មើសមួយនេះ ផ្ទុយទៅវិញ ខ្ញុំនឹងចាត់វិធានការយ៉ាងតឹងរឹងបំផុត ចំពោះបុគ្គល ដែលមានសមត្ថកិច្ចណា លូកដៃចូលអន្តរាគមន៍ ក្នុងបទល្មើសគគ្រឿងញៀននេះ)។
ឯកឧត្ដម អ៊ុន ចាន់ដា អភិបាលខេត្ត និងជាប្រធានគណៈកម្មាធិការត្រួតពិនិត្យគ្រឿងញៀន ខេត្តកំពង់ចាម ថ្លែងយ៉ាងដូច្នេះ នៅក្នុងឱកាសប្រារព្ធទិវាអន្តរជាតិ ប្រយុទ្ធប្រឆាំងគ្រឿងញៀន ក្រោមប្រធានបទ ៖ «រួមគ្នាបង្ការទប់ស្កាត់ និងដោះស្រាយបញ្ហាគ្រឿងញៀន» ដែលបានរៀបចំ នៅស្រុកបាធាយ នាថ្ងៃទី៣០ ខែមិថុនា ឆ្នាំ២០២២ នេះ ។
ពិធីនោះ ក៏មានការអញ្ជើញចូលរួមពី ឯកឧត្ដម លោកជំទាវ ជាអភិបាលរងខេត្ត ថ្នាក់ដឹកនាំ មន្ទីរ អង្គភាព ស្ថាប័នក្នុងខេត្ត និងអាជ្ញាធរមូលដ្ឋាន ព្រមទាំង តំណាងប្រជាពលរដ្ឋ លោកគ្រូ អ្នកគ្រួ និងសិស្សានុសិស្ស យ៉ាងច្រើនកុះករ ផងដែរ ។
ឯកឧត្ដម អ៊ុន ចាន់ដា ប្រធានគណៈកម្មាធិការត្រួតពិនិត្យគ្រឿងញៀន ខេត្តកំពង់ចាម បានបញ្ជាក់ថា ការជួបជុំគ្នានៅទីនេះ ដើម្បី ប្រារព្ធទិវាអន្តរជាតិប្រយុទ្ធប្រឆាំងគ្រឿងញៀនខុសច្បាប់ ក្នុងគោលបំណង ដើម្បី លុបបំបាត់ឲ្យអស់ នូវរាល់ការជួញដូរ និងការប្រើប្រាស់គ្រឿងញៀន តាមគ្រប់រូបភាព និងធ្វើឱ្យសម្រេចនូវគោលដៅអនុវត្ត ផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ របស់រាជរដ្ឋាភិបាល ។
ដូច្នេះ ដើម្បី ឈានទៅសម្រេចបាននូវគោលដៅ អនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី ៧ ឆ្នាំ២០២២ ក៏ដូចជា ការកសាងនូវសហគមន៍ និងជីវភាពសង្គម គ្មានគ្រឿងញៀន យើងទាំងអស់គ្នា ត្រូវយកចិត្តទុកដាក់ លើខ្លឹមសារ ៥ចំណុច ដូចមាននៅក្នុងសាលិខិត របស់ម្ដេច ដែលយើងទាំងអស់គ្នាគប្បីត្រូវអនុវត្តឲ្យមានប្រសិទ្ធភាព ។
ជាមួយនោះ ក្នុងនាមអភិបាលខេត្ត ប្រធានគណបញ្ជាការឯកភាពរដ្ឋបាលខេត្ត និងជាប្រធានគណៈកម្មាធិការត្រួវពិនិត្យគ្រឿងញៀន ខេត្តកំពង់ចាម ឯកឧត្ដម អ៊ុន ចាន់ដា បានដាក់ចេញនូវវិធានការណ៍ មួយចំនួន ដែលក្នុងនោះ ៖ ១.សម្រាប់កងកម្លាំងប្រដាប់អាវុធគ្រប់ប្រភេទ រួមទាំងប្រជាការពារ ពិសេស ប៉ុស្តិ៍រដ្ឋបាលនគរបាល ត្រូវតាមដាន និងគ្រប់គ្រងឲ្យបានជាប់ នូវមុខសញ្ញាជួញដូរ និងប្រើប្រាស់គ្រឿងញៀនគ្រប់ប្រភេទ នៅក្នុងសហគមន៍ និងឈនទៅដល់ការបង្ក្រាបនៅនឹងកន្លែង ឲ្យបានទាន់ពេលវេលា ឬចាត់វិធានការណ៍បង្ក្រាបឲ្យខាងតែបាន តាមដីការបស់តុលាការ ។ ២.សម្រាប់អាជ្ញាធរ គ្រប់លំដាប់ថ្នាក់ ត្រូវចូលរួមឲ្យបានសកម្ម ជាមួយនឹងគោលនយោបាយភូមិ ឃុំ មានសុវត្ថិភាព ជាពិសេស សូមចូលរួមចលនាប្រជាពលរដ្ឋ ឲ្យចូលរួមក្នុងសកម្មភាពនេះ ឲ្យបានច្រើន ។
៣.សម្រាប់បងប្អូនប្រជាពលរដ្ឋ សូមយោគយល់ដល់សមត្ថកិច្ច ក្នុងការបំពេញនីតិវិធីបង្ក្រាបបទល្មើសគ្រប់ប្រភេទ ដោយចូលរួមសហការ ក្នុងនាមជាប្រជាពលរដ្ឋល្អ ។
ជាមួយគ្នានោះដែរ ឯកឧត្តមអភិបាលខេត្ត ក៏បានផ្ដាំផ្ញើបន្ថែមដល់ អ៊ំ ពូ មីង បងប្អូន ប្រជាពលរដ្ឋយើង សូមចូលរួមទាំងអស់គ្នា បន្តទៀត ដើម្បី ភូមិ ឃុំ យើងមានសុវត្ថិភាព នោះគឺការរួមចំណែកអនុវត្តគោនយោបាយទាំង ៧ចំណុច របស់រាជរដ្ឋាភិបាល ផងដែរ ។
មួយវិញទៀត នាបច្ចុប្បន្ននេះ ក៏មានគុណខិលខូចមួយចំនួន ជាមេខ្យល់ កំពុងប្រើល្បិចក៏ល្អទាញបងប្អូនយើង អោយលង់ខ្លួន ក្នុងឧបាយកលឆបោក តាមរយៈ ការលួងលោមឲ្យបងប្អូន ចេញទៅរកការងារធ្វើ នៅក្រៅប្រទេស ការរៀបអាពាហ៍ពិពាហ៍ ជាមួយជនបរទេស ដើម្បី បានចេញទៅរស់នៅក្រៅប្រទេស ។ ដែលទង្វើនេះ គឺជាអំពើជួញដូរមនុស្ស ហើយត្រូវបានហាមឃាត់ដោយច្បាប់ ។ ឯកឧត្ដមអភិបាលខេត្ត បានអំពាវនាវ ដល់បងប្អូន កូនក្មួយទាំងអស់ សូមប្រុងប្រយ័ត្ន ឲ្យបានខ្ពស់ ចំពោះ ល្បិចកលទាំងនេះ ។ ប៉ុន្តែ បើបងប្អូនមានបំណងចេញទៅធ្វើការ ខាងក្រៅប្រទេស ក្រោមរូបភាពណាក៏ដោយ សូមដាក់ជាប់ខ្លួនជានិច្ច នូវលិខិតឆ្លងដែន អត្តសញ្ញាណប័ណ្ណ លេខទូរស័ព្ទស្ថានទូតខ្មែរ នៅប្រទេសនោះ និងលេខទូរស័ព្ទឪពុកម្ដាយ បងប្អូន ក្រុមគ្រួសារ ឬលេខទូរស័ព្ទអាជ្ញាធរភូមិ ឃុំរបស់ខ្លួន ។
សូមបងប្អូន កូនក្មួយ ចងចាំថា មានតែក្រសួងការងារ និងបណ្ដុះបណ្ដាលវិជ្ជាជីវៈ តែមួយប៉ុណ្ណោះ ដែលអាចជួយរកការងារ នៅក្រៅប្រទេសបាន ដោយស្របច្បាប់ និងការធានាសុវត្ថិភាព ។
បើតាម លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម ក្នុងឆ្នាំ២០២១ និងឆមាសទី១ ឆ្នាំ២០២២ នេះ នៅខេត្តកំពង់ចាម យើងពុំមានការផលិតចំរ៉ាញ់កែច្នៃ និងដាំដុះរុក្ខជាតិញៀន (កព្ឆា) ឡើយ ។ ប៉ុន្តែ ការចរាចរណ៍ជួញដូរ ចែកចាយគ្រឿងញៀនខុសច្បាប់ នៅតែជាបញ្ហាប្រឈម ។ លោកឧត្តមសេនីយ៍ទោ បន្តថា សកម្មភាព គួរឲ្យកត់សម្គាល់
គឺការលួចលាក់ រក្សាទុកដឹកជញ្ជូនឆ្លងកាត់ និងជួញដូរនូវសារធាតុញៀនខុសច្បាប់ សម្រាប់ចែកចាយពង្រីកទីផ្សារប្រើប្រាស់ នៅតាមមូលដ្ឋាន ធ្វើឱ្យការប្រើប្រាស់គ្រឿងញៀន នៅក្នុងស្រទាប់យុវវ័យ នាបច្ចុប្បន្ននេះ មានការរាលដាល ពីទីក្រុង ទីប្រជុំជន រហូតដល់ជនបទមួយចំនួន ។ ផ្អែកតាមតួលេខ នៃការធ្វើបច្ចុប្បន្នភាព មុខសញ្ញាប្រើប្រាស់គ្រឿងញៀន ក្នុងត្រីមាសទី១ ឆ្នាំ២០២២ របស់កម្លាំងនគរបាលកងរាជអាវុធហត្ថខេត្ត បានបង្ហាញថា ចំនួនអ្នកញៀនគ្រឿងញៀន មានចំនួន ៩៩១នាក់ ក្នុងនោះ មានស្រី ០៤នាក់ ដែលចំនួននេះ បានឆ្លុះបញ្ចាំងអំពីកំណើន នៃការប្រើប្រាស់គ្រឿងញៀន ហើយភាគច្រើនក្នុងស្រទាប់យុវវ័យ ៕
