នាព្រឹកថ្ងៃទី ០៥ ខែ កក្កដា ឆ្នាំ ២០២២នេះ លោក ឌី រ័ត្នខេមរុណ អភិបាលរង ខណ្ឌមានជ័យ បានអញ្ជើញចូលរួម ក្នុងពិធីប្រកាសសុពលភាពក្រុមប្រឹក្សាសង្កាត់បឹងទំពន់ទី១ អាណត្តិទី៥ ខណ្ឌមានជ័យ រាជធានីភ្នំពេញ ។
ក្នុងពិធីនេះមានការអញ្ជើញចូលរួម៖
១. លោក លោកស្រីប្រធាន សមាជិក សមាជិកា ក្រុមប្រឹក្សាសង្កាត់ ។
២. លោក លោកស្រី មេភូមិទាំង១១
៣. ប្រជាពលរដ្ឋប្រមាណជា ៥០នាក់
៤. តំណាងលោកគ្រូ អ្នកគ្រូ ១០នាក់
ក្នុងនោះដែរ លោក សួស សារិន ដែលបានជាប់ជាប្រធានក្រុមប្រឹក្សាសង្កាត់បឹងទំពន់ទី១ នៃអាណត្តិទី៥ បានប្តេជ្ញាចិត្តយ៉ាងមុតមាំដូចខាងក្រោម ៖
១. ប្តេជ្ញាខិតខំអនុវត្តអោយបានម៉ឺងម៉ាត់នូវរដ្ឋធម្មនុញ្ញ ច្បាប់ លិខិតបទដ្ឋានគតិយុត្តិជាធរមាន និងគោលការណ៍ណែនាំនានារបស់ថ្នាក់ដឹកនាំ។
២. ពង្រឹងថែរក្សាសាមគ្គីភាព ឯកភាពផ្ទៃក្នុង ក្នុងជួរក្រុមប្រឹក្សា មន្ត្រីសង្កាត់ មន្ត្រីភូមិ និងអ្នកពាក់ព័ន្ធផ្សេងៗ
ទៀត។
៣. ជំរុញការអនុវត្តគោលនយោបាយ ភូមិ-សង្កាត់មានសុវត្ថិភាព អោយកាន់តែ មានប្រសិទ្ធភាព ដើម្បីរក្សាសន្តិសុខ សុវត្ថិភាព និងសុខដុមនីកម្ម ជូនប្រជាពលរដ្ឋ អោយកាន់តែល្អប្រសើរថែមទៀត ។
៤. ខិតខំប្រើប្រាស់ថវិកាវិភាជរបស់រាជដ្ឋាភិបាល និងគៀងគរថវិកាបន្ថែមពីសប្បុរសជននានា ប្រកបដោយតម្លាភាព និងប្រសិទ្ធភាព ដើម្បីចូលរួមអភិវឌ្ឍន៏មូលដ្ឋានអោយកាន់តែរីកចម្រើនថែមទៀត។
៥. ជំរុញការផ្តល់សេវាសាធារណៈ ទាំងសេវាតំរូវការ និងសេវាសំណូមពរ អោយកាន់តែកៀកិតនិងប្រជាពលរដ្ឋ ដើម្បី ចូលរួមចំណែកលើកកម្ពស់ ជីវភាពរស់នៅ និងសុខាមាលភាព របស់ប្រជាពលរដ្ឋ។
៦. ខិតខំពង្រឹងយន្តការ ដោះស្រាយវិវាទក្រៅប្រព័ន្ធតុលាការដើម្បីទទួលបានជំនឿទុកចិត្តពីប្រជាពលរដ្ឋ។
៧. ត្រៀមកម្លាំងអន្តរាគមន៍សម្រាប់ការដោះស្រាយគ្រោះមហន្តរាយ និងបញ្ហាផ្សេងៗ ដែលអាចកើតមានឡើង ជាយថាហេតុនៅក្នុងមូលដ្ឋាន ។
បន្ទាប់មក លោក ឌី រ័ត្នខេមរុណ អភិបាលរង ខណ្ឌមានជ័យ បានលើកឡើងដែរថា សូមអោយ លោកលោកស្រី ប្រធាន សមាជិក សមាជិកា ក្រុមប្រឹក្សាសង្កាត់ទាំងអស់ដែលទើបតែជាប់ឆ្នោត ក្នុងអាណត្តិទី៥ នេះ ត្រូវយកចិត្តទុកដាក់បម្រើប្រជាពលរដ្ឋអោយបានទូលំទូលាយនិងរហ័សជាងមុន គឺ
– ត្រូវបំពេញតម្រូវការសេវាសាធារណៈជូនប្រជាពលរដ្ឋដែលគាត់មកស្នើសុំ ដូចជា ធ្វើសំបុត្រកំណើត សំបុត្រអាពាហ៍ពិពាហ៍ សំបុត្រមរណភាព និងសេវាផ្សេងទៀត ។
– ការងារសន្តិសុខក្នុងមូលដ្ឋាន ភូមិ ឃុំ មានសុវត្ថភាព ត្រូវចុះល្បាត ពូនស្ទាក់ ឬ ច្បាមយកនូវបទល្មើស ដូចជា ចោរគាស់ផ្ទះ លួច ឆក់ និងត្រូវសហការជាមួយប៉ុស្តិ៍មូលដ្ឋានលប់បំបាត់ក្មេងទំនើង និងបញ្ហាគ្រឿងញៀនក្នុងមូលដ្ឋានសង្កាត់។
– ត្រូវចុះដល់ខ្នងផ្ទះ របស់បងប្អូនប្រជាពលរដ្ឋ ដែលជួបនូវជីវភាពខ្វះខាត គឺត្រូវផ្តល់នូវអំណោយមនុស្សធម៌ ដល់គាត់ ជាពិសេសយើងនឹងអាចយល់ពីការកង្វល់ ឬទុកលំបាករបស់គាត់ផងដែរ
-ត្រូវសាមគ្គីភាពផ្ទៃក្នុង ក្នុងការបម្រើការងារជូនប្រជាពលរដ្ឋ មិនត្រូវរើសអើងបក្សខាងណានោះទេ ត្រូវខិតខំផ្តល់សេវាក្នុងយន្តការតែមួយដើម្បីប្រជាពលរដ្ឋក្នុងមូលដ្ឋាន។
– ត្រូវរៀបចំរចនាសម្ព័ន្ធការងារ ឬបែងចែកភារកិច្ចការងារដល់សមាជិក សមាជិកា នៃក្រុមប្រឹក្សាសង្កាត់អាណត្តិទី៥ នេះ ។
– ត្រូវអនុវត្តការងារតាមថ្នាក់លើដាក់ជូន
និង ត្រូវអនុវត្តនូវគោលការណ៍រាយការណ៍ ជូនមកថ្នាក់លើដែលមានបញ្ហាកើតឡើង និងមិនអាចដោះស្រាយបាន ។
ក្រោយបញ្ចប់ពិធីប្រកាសការប្រជុំលើកដំបូងរបស់ក្រុមប្រឹក្សាសង្កាត់អាណ្ណត្តិថ្មីរួចមក លោក ឌី រ័ត្នខេមរុណ អភិបាលរងខណ្ឌមានជ័យ រួមទាំងសមាជិក សមាជិកា ក្រុមប្រឹក្សា បងប្អូនប្រជាពលរដ្ឋ លោកគ្រូ អ្នកគ្រូ មន្រ្តីសង្កាត់ជួបជុំគ្នាបន្ត ហូបនំបញ្ចុក ជាមួយក្រុមការងារក្រោមបរិយាកាសស្និតស្នាល និងរីករាយយ៉ាងក្រៃលែងក្រោមដំបូលសន្តិភាព ។
