ខេត្តសៀមរាប៖ បុរសម្នាក់បានស្លាប់ពេលបញ្ជូនទៅកាន់មន្ទីរពេទ្យ បន្ទាប់ពីខ្លួនសើម ហើយយកទូរស័ព្ទទៅសាកថ្មមិនប្រយ័ត្នបណ្ដាលឆ្លងចរន្តអគ្គីសនី ដែលហេតុការណ៍នេះកើតឡើងនៅវេលាម៉ោង ១៧ នឹង១៥នាទីថ្ងៃទី០៧ ខែសីហា ឆ្នាំ២០២២ នៅចំណុចការដ្ឋានមួយកន្លែងក្នុងភូមិទក្សិណត្បូង សង្កាត់គោកចក ក្រុងសៀមរាប។
សមត្ថកិច្ចបានឲ្យដឹងថា បុរសដែលបានស្លាប់មានឈ្មោះ ណេប់ ភាណិត ភេទប្រុស អាយុ ២៣ឆ្នាំ មុខរបរកម្មករសំណង់ មានទីលំនៅក្នុងភូមិគោកឫស្សី ឃុំកែវពណ៌ ស្រុកពួក ខេត្តសៀមរាប។
បើតាមកម្មករដែលធ្វើការជាមួយបុរសរងគ្រោះបានឲ្យដឹងថា មុនពេលកើតហេតុ វេលាម៉ោង១៦ និង០០នាទី ពួកគាត់កំពុងធ្វើការងារធម្មតា ភា្លមនោះមេឃចាប់ផ្តើមធ្លាក់ភ្លៀងក៏នាំគ្នាសម្រាកនៅក្នុងការរដ្ឋាន ក៏ស្រាប់តែជនរងគ្រោះ បានយកទូរសព្ទរបស់គាត់ទៅសាកថ្ម នៅចំនុចជាប់នឹងជញ្ជាំងរបងផ្ទះ ក្នុងការដ្ឋានដោយដោតសាកថ្មទុកចោលនៅទីនោះរួចគាត់ទៅធ្វើការងាររបស់គាត់វិញ។
លុះមួយសន្ទុះក្រោយមកជនរងគ្រោះបានដើរទៅយកទូរសព្ទគាត់វិញ ហើយដោយខ្លួនរបស់គាត់សើម និងពុំមានពាក់ស្បែកជើង ក៏ស្រាប់តែឆក់ជាប់ភ្លាមៗ។
ភ្លាមនោះក្រុមជាងបានរត់ទៅទាញបិទកុងតាក់អគ្គីសនី ហើយនាំគ្នាជួយសង្គ្រោះបឋម និងទាក់ទងទៅរថយន្តសង្គ្រោះបន្ទាន់ យកទៅសង្គោះនៅមន្ទីរពេទ្យមួយកន្លែងតាមបណ្តោយផ្លូវ ៣០ម៉ែត្រ តែជនរងគ្រោះបានស្លាប់ពេលបញ្ជូនដល់មន្ទីរពេទ្យបាត់ទៅហើយ។
ក្រោយកើតហេតុសមត្ថកិច្ចជំនាញបានពិនិត្យទៅលើជនរងគ្រោះគ្រប់ផ្នែកទាំងអស់ពុំមានស្លាកស្នាមអ្វីឡើយ ដោយជនរងគ្រោះពិតជាស្លាប់ ដោយសារឆក់ខ្សែភ្លើងដោយខ្លួនឯងពិតប្រាកដមែន៕
