ខេត្ដកំពង់ចាម៖ នៅព្រឹកថ្ងៃអាទិត្យ ទី២១ ខែសីហា ឆ្នាំ២០២២ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងជាប្រធានកាកបាទក្រហមកម្ពុជាខេត្ត អញ្ជើញចែកអំណោយមនុស្សធម៌កាកបាទក្រហមកម្ពុជាខេត្តកំពង់ចាម ជូនដល់ប្រជាពលរដ្ឋក្រីក្រចំនួន ៥៣គ្រួសារ មកពីឃុំចំនួន ៥ ក្នុងស្រុកកងមាស រួមមាន៖ ឃុំ ព្រែកកុយចំនួន ១២គ្រួសារ ឃុំបារាយណ៍ចំនួន ១១គ្រួសារ ឃុំសូរគងចំនួន១០ គ្រួសារ ឃុំអង្គរបាន ១០គ្រួសារ និងឃុំពាមជីកង ១០គ្រួសារ។
មានប្រសាសន៍សំណេះសំណាលនាឱកាសនោះ ឯកឧត្តម អ៊ុន ចាន់ដា ប្រធានគណៈកម្មាធិការសាខា បានពាំនាំប្រសាសន៍ សាកសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះបងប្អូនប្រជាពលរដ្ឋក្នុងស្រុកកងមាសទាំងមូល និយាយរួមនិងនិយាយដោយឡែក បងប្អូនប្រជាពលរដ្ឋក្រីក្រចំនួន៥៣ គ្រួសារនេះផ្ទាល់តែម្តង ដែលសម្តេច បានយកចិត្តទុកដាក់ចំពោះសុខទុក្ខ និងការរស់នៅរបស់ពួកគាត់ ក្នុងអំឡុងពេលប្រទេសរបស់យើងកំពុងប្រឈមនឹងជំងឺកូវីដ-19 ដែលធ្វើអោយបងប្អូនយើងជួបការលំបាកក្នុងការចេញប្រកបរបបចិញ្ចឹមជីវិត។ ឯកឧត្តមបានបន្តទៀតថា ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានទប់ស្កាត់ការរីករាលដាលនៃជំងឺកូវីដ-19 បានដោយជោគជ័យ ដោយអនុវត្តការចាក់វ៉ាក់សាំងជូនដល់ប្រជាពលរដ្ឋទូទាំងប្រទេស ទាំងកុមារ រហូតដល់មនុស្សចាស់ ដែលជាភាពសមួយសម្រាប់មូលដ្ឋាន ក្នុងការទប់ស្កាត់ការឆ្លងរាលនៃជំងឺកូវីដ-១៩។
ឯកឧត្តមបន្តថា សូមបងប្អូនប្រជាពលរដ្ឋយើងទាំងអស់ត្រូវ រួមគ្នាទៅទទួលវាក់សាំង កូវីឌ-19ដូសជំរុញ អោយបានគ្រប់ៗគ្នា ជាពិសេសត្រូវអនុវត្តតាមការនែនាំរបស់រាជរដ្ឋាភិបាល ក្រសួងសុខាភិបាល និងរដ្ឋបាលខេត្តដើម្បីទប់ស្កាត់ការវិលត្រឡប់មកវិញនៃជំងឺនេះម្តងមកទៀត និងចូលរួមអនុវត្តគោលនយោបាយភូមិ ឃុំសង្កាត់មានសុវត្ថិភាព ដើម្បីរក្សាបាននូវសុខសន្តិភាព និងការអភិវឌ្ឍ ក្រោមការដឹកនាំប្រកបដោយកិត្តិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា៕
