ខេត្ដស្វាយរៀង៖ឯកឧត្តម ឌី វិជ្ជា ប្រធានគណៈកម្មាធិការ សសយក ខេត្តស្វាយរៀង នៅព្រឹកថ្ងៃទី២១ ខែសីហា ឆ្នាំ២០២២ នៅក្នុងកិច្ចប្រជុំបូកសរុបលទ្ធផលការងារសង្កេតការណ៍បោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ បានដាក់ទិសដៅនិងផែនការបន្តចំពោះមុខ ឲ្យក្រុង ស្រុក ទាំង៨ត្រូវអនុវត្តឱ្យបានជោគជ័យបន្ថែមទៀត។
ឯកឧត្តម ឌី វិជ្ជា បានដាក់ទិសដៅនិងផែនការឲ្យសសយក ក្រុង ស្រុក ទាំង៥ត្រូវអនុវត្តន៍រួមមា
១. ត្រៀមយុវជនជាអ្នកសង្កេតការណ៍សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២
២. ការតៀមយុវជនប្រឡងចូលជាមន្រ្តីកិច្ចសន្យា គ.ជ.ប នៅថ្នាក់ខេត្ត និង ក្រុមចុះឈ្មោះបោះឆ្នោត ( ក.ច.ប)
៣. ការត្រៀមជនបង្គោល លើការងារបោះឆ្នោត តាមក្រុង ស្រុក ដើម្បីបើកវគ្គបណ្ដុះបណ្ដាលបន្តតាមក្រុង ស្រុក
៤. ត្រៀមកម្លាំងយុវជនដែលមានស្រាប់ ចូលរួមក្នុងការបោះឆ្នោតជ្រើសតាំងតំណាងរាស្រ្ត នីតិកាលទី៧
៥. ជួយផ្សព្វផ្សាយជម្រុញដល់បងប្អូន គ្រួសារ សូមទៅទទួលការចាក់វ៉ាក់សាំង ដូស ជំរុញ ជាបន្តបន្ទាប់ ដើម្បីបង្កើតភាពសុំាក្នុងខ្លួន ក៏ដូចជាក្នុងសង្គមគ្មានជំងឺកូវីដ ១៩។
ជាមួយគ្នានេះ ឯកឧត្តម ឌី វិជ្ជា បានថ្លែងនូវការផ្ដាំផ្ញើរសួរសុខទុក្ខពីសំណាក់ ឯកឧត្តមហ៊ុន ម៉ានី ប្រធានសហភាពសហព័ន្ធយុវជនកម្ពុជា ដែលតែងតែលើកសរសើរពីយុវជនខេត្តស្វាយរៀងយើង ដែលធ្វើសកម្មភាព ផុសផុល គ្រប់សកម្មភាព និងគ្រប់វិស័យ ទោះបីក្នុងដំណាក់កាលកូវីដក្ដី ក៏យុវជនយើងតែងតែចូលរួមគ្រប់រូបភាព ជាពិសេសការសម្របសម្រួលក្នុងយុទ្ធនាការចាក់វ៉ាក់សាំងជូនប្រជាពលរដ្ឋដោយឥតគិតថ្លៃដែលជាយុទ្ធាសាស្រ្តផ្ការីក របស់ សម្ដេចតេជោ ហ៊ុន សែន ដាក់ចេញ ដើម្បីធានាដល់អាយុជីវិតរបស់ប្រជាពលរដ្ឋ ដោយគ្មានការខ្លាចរអា។
ឯកឧត្តមបានគូសបញ្ជាក់ថា កិច្ចការងារអ្នកសង្កេតការណ៍ជាតិនេះ ជាការងារស្នូលមួយក្នុងសសរម្ដំរបស់ សសយក យើង ដែលស្ថិតក្នុង យុទ្ធនាការពលរដ្ឋល្អ ដែលសកម្មភាពនេះ ចូលរួមក្នុងការសង្កេតមើលនូវដំណើរការ ជាសាក្សីដ៏សំខាន់ក្នុងការឃ្លាំមើល និងធានាបាននៅការបោះឆ្នោតប្រព្រឹត្តទៅដោយអហឹង្សា សេរី ត្រឹមត្រូវ យុត្តិធម៌ និងតម្លាភាព ព្រមទាំងឆ្លុះបញ្ជាំងបាននូវសមត្ថភាពមន្រ្តី គ.ជ.ប មានសមត្ថភាពគ្រប់គ្រាន់ក្នុងការរៀបចំ នូវប្រព័ន្ធបោះឆ្នោតបានដោយខ្លួនឯង ដោយមិនពឹងពាក់លើជនបរទេសក្នុងការរៀបចំការបោះឆ្នោតនៅក្នុងប្រទេសកម្ពុជាយើង។
ឯកឧត្តម បានបន្តថា ភាពជោគជ័យរបស់ សសយក មិនមែនកើតចេញពីថ្នាក់ដឹកនាំខេត្តនៅទីនេះទេ គឺកើតចេញពីយុវជនអ្នកសង្កេតការណ៍នៅតាមការិយាល័យបោះឆ្នោតផ្ទាល់អ្វីដែលអ្នកសង្កេតការណ៍យើងសង្កេតឃើញ កត់ត្រាចូលក្នុងរបាយការណ៍ បង្ហាញពីការយកចិត្តទុកដាក់ និងទំនួសខុសត្រូវខ្ពស់របស់យុវជនយើង។
កិច្ចប្រជុំនេះមានការចូលរួមពីឯកឧត្តម តូច ប៉ូលីវ៉ា អនុប្រធាន សសយក ខេត្ត និងជាប្រធានក្រុមការងារអ្នកសង្កេតការណ៍ជាតិ សសយក ខេត្តស្វាយរៀង ព្រមទាំងលោក លោកស្រីដែលជាថ្នាក់ដឹកនាំនិងសមាជិកសសយកខេត្តស្វាយរៀងជាច្រើនរូបផងដែរ ៕
