ខេត្ដបន្ទាយមានជ័យ៖ នាយប៉ុស្តិ៍នគរបាលអន្តោរប្រវេសន៍ច្រកទ្វារព្រំដែនអន្តរជាតិប៉ោយប៉ែតស្នើសុំភាគីថៃដើម្បីឲ្យប្រជាពលរដ្ឋប្រើប្រាស់កាតចូលព្រឹកវិលល្ងាច ទៅរកស៊ីនៅផ្សាររ៉ុងក្លឿដើម្បីជួយសម្រួលដល់ជីវភាពពួកគាត់។
កិច្ចពិភាក្សារវាងលោកនាយប៉ុស្តិ៍ច្រកទ្វារព្រំដែនអន្តរជាតិប៉ោយប៉ែត និងលោកនាយប៉ុស្តិ៍ច្រកទ្វារព្រំដែនខ្លងលឹក ធ្វើឡើងកាលពីថ្ងៃទី២៥ ខែសីហា ឆ្នាំ ២០២២ នៅស្នាក់ការប៉ុស្តិ៍នគរបាលអន្តោរប្រវេសន៍ភាគីថៃ ខេត្តស្រះកែវ។
លោកឧត្តមសេនីយ៍ត្រី អ៊ី ចំរើន នាយប៉ុស្តិ៍នគរបាលអន្តោរប្រវេសន៍ច្រកទ្វារព្រំដែនអន្តរជាតិប៉ោយប៉ែត បានឲ្យដឹងថា៖ កិច្ចពិភាក្សារវាងលោកនាយប៉ុស្តិ៍ច្រកទ្វារព្រំដែនអន្តរជាតិប៉ោយប៉ែត និងលោកនាយប៉ុស្តិ៍ច្រកទ្វារព្រំដែនខ្លងលឹក ធ្វើឡើងដើម្បីពង្រឹងនូវកិច្ចសហប្រតិបត្តិការល្អរវាងភាគីទាំងពីរដើម្បីជួយសម្រួលដល់ភ្ញៀវជាតិ អន្តរជាតិ រួមទាំងបងប្អូនប្រជាពលរដ្ឋ និងអាជីវករ ឲ្យបានឆាប់រហ័ស ផ្តល់ភាពងាយស្រួលដល់ការចេញចូលដល់ពួកគាត់ និងកុំឲ្យមានការកកស្ទះ។
លោកនាយប៉ុស្តិ៍បានបញ្ជាក់ថា៖ នៅកិច្ចពិភាក្សានេះ លោកក៏បានស្នើសុំឲ្យមានការដំណើរការ ការធ្វើកាត(IMMIGRATION CARD)ជូនប្រជាពលរដ្ឋខ្មែរក្នុងក្រុងប៉ោយប៉ែតសារឡើងវិញ ដើម្បីជួយសម្រួលដល់ជីវភាពរបស់បងប្អូនប្រជាពលរដ្ឋ និងអាជីវករនៅក្នុងផ្សាររ៉ុងក្លឿ ហើយការស្នើសុំនេះ គឺជាលើកទី៤ហើយផងដែរ។ លោកបញ្ជាក់បន្ថែមចំពោះសំណើរនេះ ខាងភាគីថៃ នឹងរាយការណ៍ជូនថ្នាក់ដឹកនាំរបស់គេបន្តទៀត សម្រេចយ៉ាងណានោះ ខាងថៃនិងជម្រាបជូនដំណឹងនៅពេលក្រោយ៕
