ស្វាយរៀង ៖ កាលពីថ្ងៃសៅរ៍ ១៥កើតខែភទ្របទ ឆ្នាំខាលចត្វាស័ក ព.ស.២៥៦៦ ត្រូវនឹងថ្ងៃទី១០ ខែកញ្ញា ឆ្នាំ២០២២ នៅឃុំតាសួសបានរៀបចំព្រឹត្តិការណ៍ប្រកួតបាល់ទាត់ដណ្តើមពានរង្វន់ក្រុមការងារចុះជួយឃុំតាសួស ក្រោមការផ្តួចផ្តើមពីឯកឧត្តម សុន គឹមស៊ន ប្រធានក្រុមការងារថ្នាក់កណ្តាលចុះជួយឃុំតាសួស លោក សុខ សារ៉ូត ក្រុមការថ្នាក់ស្រុក លោកស្រី ពៅ បណ្តាំ មេឃុំតាសួស និងក្រុមការងារ ព្រឹត្តិការណ៍នេះប្រព្រិត្តិទៅស្ថិតនៅភូមិតាប៉ ឃុំតាសួស ស្រុកស្វាយជ្រំ ខេត្តស្វាយរៀង ។
លោក សុខ សារ៉ូត ក្រុមការងារថ្នាក់ស្រុកចុះជួយឃុំតាសួស និងជានាយករដ្ឋបាលស្រុកស្វាយជ្រំតំណាងឯកឧត្តមប្រធានក្រុមការងារបានអញ្ជើញជាអធិបតីក្នុងពិធីជួបសំណេះណាលជាមួយក្រុមកីឡាករដើម្បីបើកការប្រកួតជាផ្លូវការ នៃព្រឹត្តិការណ៍ប្រកួតបាល់ទាត់ដណ្តើមពានរង្វន់ក្រុមការងារចុះជួយឃុំតាសួស ។ ក្នុងពិធីនោះក៏មានការអញ្ជើញចូលរួមពីលោកស្រី ពៅ បណ្តាំ មេឃុំតាសួ លោកមេភូមិ និងក្រុមការងារយុវជនគាំទ្រឃុំតាសួស ព្រមទាំងលោកសលោកស្រីដែលជាអ្នកឧបត្ថម្ភជាច្រើនអ្នកផងដែរ។
លោកស្រី ពៅ បណ្តាំ មេឃុំតាសួសបានបញ្ជាក់ប្រាប់ថា ព្រឹត្តិការណ៍នេះប្រព្រឹត្តិទៅបានគឺដោយសារមានការផ្តួចផ្តើមពីឯកឧត្តម សុន គឹមស៊ន ប្រធានក្រុមការងារថ្នាក់កណ្តាលចុះជួយឃុំតាសួស ក្រុមការងារថ្នាក់ខេត្ត ថ្នាក់ស្រុក លោកភូមិ យុជវជនគាំទ្រឃុំតាសួស និងសប្បុរសជនជាច្រើនអ្នកទៀតដែលស្រលាញ់លើវិស័យកីឡាបាល់ទាត់ហើយបានចូលរួមឧបត្ថម្ភគាំទ្រ។ លោកស្រីបានបញ្ជាក់បន្ថែមថាការប្រកួតនេះមានយុវជនចំនួន១៦ក្រុមមកដាក់ពាក្យដើម្បីចូលរួមប្រកួតប្រជែញដណ្តើមយកជើងឯកលេខ១ផងដែរ ។
លោក សុខ សារ៉ូត ក្រុមការងារថ្នាក់ចុះជួយឃុំតាសួស និងជានាយករដ្ឋបាលស្រុកស្វាយជ្រំបានមានមតិសំណេះសំណាលសាកសួរសុខទុក្ខ និងពាំនាំពាក្យផ្តាំផ្ញើរពីសំណាក់ថ្នាក់ដឹកនាំដល់ក្រុមកីឡាករទាំងអស់ដែលមកចូលរួមប្រកួតក្នុងព្រឹត្តិការណ៍នេះ។ លោកបានបន្តទៀតថាព្រឹត្តិការណ៍នេះប្រព្រឹត្តិទៅបានដោយសារប្រទេសយើងមានសុខសន្តិភាពពេញលេញក្រោយការដឹងនាំប្រកបដោយកិតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លោកសូម 《អរគុណ សន្តិភាព》និងសូមឲ្យយុវជនទាំងអស់ចូលរួមការពារសន្តិភាពទាំងអស់គ្នា។
ឆ្លៀតក្នុងនោះដែរ លោក សុខ សារ៉ូត ក៏បានផ្តាំផ្ញើរដល់កីឡាករគ្រប់ក្រុមទាំងអស់សូមលេងកីឡាដើម្បី សុខភាពល្អ ទំនាក់ទំនងល្អ មិត្តភាពល្អ នៅក្នុងទីលានគឺជាគូរប្រកួត ខាងក្រៅគឺជា បងប្អូនល្អ មិត្តភ័ក្រដ៏ល្អ និងសូមបងប្អូនប្រកាន់ភ្ជាប់ក្រមសីលធម៌ជាកីឡាករទាំងអស់គ្នា ដើម្បីធ្វើជាគំរូយុវជនល្អនៅក្នុងមូលដ្ឋាននិងសង្គម ៕
