ខេត្ដស្វាយរៀង ៖ លោក ប៊ី វុទ្ធី ក្រុមការងារថ្នាក់ខេត្តចុះជួយឃុំស្វាយធំ បាននាំយក បច្ច័យ លោកជំទាវកិតិសង្គហបណ្ឌិត ម៉ែន សំអន និងបច្ច័យ ឯកឧត្តម ខាត់ សុផល ប្រធានក្រុមការងារថ្នាក់កណ្តាលចុះជួយឃុំស្វាយធំរួមទាំងនូវទេយ្យទានទៅវេប្រគេនព្រះសង្ឃដែលគង់ចាំព្រះវស្សាតាមទំនាមព្រះពុទ្ធសាសនា ចំនួន ៥វត្ដ នៅឃុំស្វាយធំ ស្រុកស្វយជ្រំ ខេត្តស្វាយរៀង កាលពីថ្ងៃអាទិត្យ ៨រោច ខែភទ្របទ ឆ្នាំខាល ចត្វាស័កព.ស.២៥៦៦ត្រូវនឹងថ្ងៃទី១៨ ខែកញ្ញា ឆ្នាំ២០២២។
នៅក្នុងឪកាសនោះក៏មានការអញ្ចើញចូលពីក្រុមការងារលោក ប៊ី វុទ្ធី លោកស្រី ជេត សារីមេឃុំស្វាយធំ ក្រុមប្រឹក្សាឃុំ មេភូមិ ក្រុមយុវជនគាំទ្រឃុំ កម្លាំងប្រជាការពារ ព្រមទាំងប្រជាពុទ្ធបរិស័ទជិតឆ្ងាយយ៉ាងច្រើនផងដែរ។ បច្ច័យ និងទេយ្យទានដែលយកទៅវត្តចំនួន៥រួមមាន ៖ វត្តសំរោងពេជ្រ, វត្តស្វាយធំ, វត្តដក់ពរ, វត្តទួលសាមគ្គីឧត្តម និង វត្ដអង្គឬស្សី)ដោយក្នុវមួយវត្តៗទទួលបច្ច័យ ១លានរៀលពីលោកជំទាវលោកជំទាវកិតិសង្គហបណ្ឌិត ម៉ែន សំអន និង ២០០$ ពីឯកឧត្តម ខាត់ សុផល ព្រមទាំងទេយ្យទានមួយចំនួនទៀតផង។ លោក ប៊ី វុទ្ធី ក្រុមការងារថ្នាក់ខេត្តចុះជួយឃុំស្វាយធំ បានឧបត្ថម្ភបន្ថែមនូវក្រមា១៥០ក្រមា និងថវិកា ៧៥មុឺនរៀលសម្រាប់យាយជី តាជី សរុបចំនួន១៥០ នាក់ផងដែរ។
លោក ប៊ិ វុទ្ធី បានលើកឡើងថា ថ្ងៃនេះជាថ្ងៃ៨រោច និងជាថ្ងៃកាន់បិណ្ឌវេនទី៨ បើតាមទំនាមទំលាប់ ដែលប្រជាពុទ្ធបរិស័ទខ្មែរយើងបានប្រារពធ្វើជារៀងរាល់ឆ្នាំ តាមបែបគន្លងព្រះពុទ្ធសាសនា ដើម្បីនាំយកនូវចង្ហាន់បិណ្ឌបាត្រ ទេយ្យទាន និងបច្ច័យផងនោះ ទៅប្រគេនព្រះសង្ឃដែលគង់ចាំព្រះវស្សានៅក្នុងទីអារាមនីមួយៗ ដើម្បីឧទ្ទិសមហាកុសល ផលបុណ្យជូនទៅបុព្វការីជនមាន មាតា បិតា ជីដូន ជីតា គ្រូអាចារ្យ វរៈជនស្នេហាជាតិ និងក្រុមញ្ញាតិ ដែលបានចែកឋានទៅ ព្រមទាំងសន្សំបុណ្យកុសល ដើម្បីខ្លួនឯង កូនចៅ និងប្រទេសជាតិ ឱ្យបានជួបនូវសេចក្តីសុខសប្បាយជារៀងដរាបទៅ ។
ឆ្លៀតក្នុងឪកាសនោះលោក ប៊ី វុទ្ធី បានបញ្ជាក់ថាកាលដែលបងប្អូនប្រជាពុទ្ធបរិស័ទទាំងអស់គ្នាអាចមកធ្វើបុណ្យជួបជុំគ្នាបានគឺដោយសារប្រទេសជាតិយើងមានសុខសន្តិភាពពេញលេញក្រោមការដឹកនាំប្រកបដោយកិតិបណ្ឌិតរបស់សម្តេចតេជោ ហ៊ុន សែន ។ 《អរគុណសន្តិភាព》។
សូមជម្រាបជូនថា ភ្ជុំបិណ្ឌ គឺជាពិធីបុណ្យ ដែលប្រជាពលរដ្ឋខ្មែរ ចាត់ទុកជាបុណ្យធំជាងគេ ក្នុងចំណោមពិធីបុណ្យប្រពៃណីទាំងអស់របស់ខ្មែរ ព្រោះពិធីនេះ មានរយៈ១៥ថ្ងៃ គិតចាប់ពីថ្ងៃ០១រោច ដល់ថ្ងៃ១៥ រោចខែភទ្របទ្រ។ ពីថ្ងៃ០១រោច ដល់ថ្ងៃ១៤រោច គេហៅថា ថ្ងៃដាក់បិណ្ឌ ឬថ្ងៃកាន់បិណ្ឌ ថ្ងៃ១៥រោច គេហៅថា ថ្ងៃភ្ជុំបិណ្ឌឬ ភ្ជុំធំ ដែលមានន័យថា ថ្ងៃជួបជុំគ្នាចុងក្រោយ នៃពីធីបុណ្យកាន់បិណ្ឌ។
ប្រជាពលរដ្ឋខ្មែរ តែងតែប្រារព្ធពិធីបុណ្យភ្ជុំបិណ្ឌនេះជាប្រចាំរៀងរាល់ឆ្នាំ មិនដែលខកខាន តាំងពីបុរាណកាលមក ពិធីបុណ្យនេះ ក៏ដូចជាពិធីបុណ្យដទៃទៀតដែរ ៕
