(ស្វាយរៀង) ៖ កាលពីព្រឹកថ្ងៃអាទិត្យ ១៥រោច ខែភទ្របទ ឆ្នាំខាលចត្វាស័ក ព.ស.២៥៦៦ ត្រូវនឹងថ្ងៃទី២៥ ខែកញ្ញា ឆ្នាំ២០២២ព្រះគ្រូយសសេរីមនីទេព គង់ សំប៊ុនឈឿន ព្រះវិន័យធរអនុគណស្រុកស្វាយជ្រំ និងជាចៅអធិការវត្តតាសួស បានផ្តួចផ្តើមឲ្យមានការរៀបចំព្រឹត្តិការណ៍ប្រកួតបាល់ទះដណ្តើមពានរង្វាន់មិត្តភាពវត្តតាសួសឆ្នាំ២០២២នៅវត្តតាសួស ស្ថិតក្នុងភូមិស្វាយក្អែ ឃុំតាសួស ស្រុកស្វាយជ្រំ ខេត្តស្វាយរៀង។
នៅក្នុងពិធីនោះដែរក៏មានការអញ្ជើញចូលរួមពីលោកស្រី ពៅ បណ្តាំ មេតាសួស លោកនាយប៉ុស្តិ៍រដ្ឋបាលឃុំតាសួស លោកលោកស្រី ក្រុមព្រឹក្សាឃុំ លោកមេភូមិគណៈកម្មការរៀបចំការប្រកួត លោក សោម ផាតយុទ្ធ អាជ្ញាកណ្តាល លោក សូ សែម អ្នកដឹកនាំក្រុមកីឡាករមកស្នងការនគរបាលខេត្តស្វាយរៀង និងបងប្អូនដែលស្រលាញ់គាំទ្រលើវិស័យកីឡាបាលទះយ៉ាងច្រើនផងដែរ។
គណៈកម្មការរៀបចំការប្រកួតបានប្រាប់ថា ព្រឹត្តិការណ៍ប្រកួតបាល់ទះដណ្តើមពានរង្វាន់មិត្តភាពវត្តតាសួសជាលើកទី២នេះដំណើរការណ៍ទៅបាន គឺដោយសារមានការផ្តួចផ្តើមពីព្រះគ្រូយសសិរីមុនីទេព គង់ សំប៊ុនឈឿន ព្រះវិន័យធរអនុគណស្រុកស្វាយជ្រំ និងជាចៅអធិការវត្តតាសួស ហើយក្រុមដែលមកចូលរួមប្រកួតមានចំនួន០៨ក្រុម ក្រុមទាំង០៨នោះរួមមាន ៖ ទី១ ក្រុមកីឡាបាល់ទះ《តំណាងស្នងការដ្ឋាននគរបាលខេត្តស្វាយរៀង》《 ទី២ ក្រុមកីឡាបាលទះវត្តតាសួស》《 ទី៣ ក្រុមបាលទះភូមិអង្គាសដី》《 ទី៤ក្រុមកីឡាបាល់ទះភូមិតាប៉》《 ទី៥ ក្រុមកីឡាបាលទះភូមិត្របែកប្រហោង》《 ទី៦ក្រុមបាល់ទះភូមិបឹងអណ្តែង》《 ទី៧ ក្រុមកីឡាបាលទះស្វាយជ្រំ》 និង《ទី៨ ក្រុមកីឡាបាល់ទះភូមិស្វាយក្អែព្រៃស្ពឺ》។
ក្រោយការប្រកួតអស់រយៈពេលបីថ្ងៃយ៉ាងស្វិតស្វាញឃើញថាក្រុមកីឡាបាល់ទះនៃស្នងការដ្ឋាននគរបាលខេត្តស្វាយរៀងដឹកនាំក្រុមដោយ លោកគ្រូ សូ សែម ទទួលបានជើងឯកលេខ០១ ; ក្រុមកីឡាបាល់ទះវត្តតាសួសទទួលបានលេខ២ ;ក្រុមកីឡាបាល់ទះភូមិបឹងអណ្តែងបានលេខ៣ និងក្រុមកីឡាបាល់ទះស្វាយជ្រំបានលេខ៤ ។ សម្រាប់ក្រុមទទួលបានជើងឯកលេខ១ទទួលបានប្រាក់ឧបត្ថម្ភ១លានរៀល និងពាន់មួយ លេខ២ទទួលបានប្រាក់ឧបត្ថម្ភ ៦០មុឺនរៀលនិង ទង់អនុស្សាវរីយ៍មួយ លេខ៣ទទួលបានប្រាក់ឧបត្ថម្ភ ៤០មុឺនរៀលនិងទង់អនុស្សាវរីយ៍មួយ និងលេខ៤ក៏ទទួលបានប្រាក់ឧបត្ថម្ភចំនួន ២០មុឺនរៀលនិងទង់អនុស្សាវរីយ៍មួយផងដែរ។
លោកស្រី ពៅ បណ្តាំ មេឃុំតាសួសបានមានមតិសំណេះសំណាលជាមួយបងប្អូនក្រុមកីឡាករនិងប្រគល់ពាន់រង្វាន់ដល់ក្រុមដែលទទួលបានជ័យលាភីពីលេខ១ដល់លេខ៤ លោកស្រីក៏សូមអរគុណដល់គណៈកម្មការ អាជ្ញាកណ្តាល លោកគ្រូដឹកនាំក្រុមកីឡាករគ្រប់ៗក្រុមដែលបានមកចូលរួមប្រកួតនិងធ្វើឲ្យការប្រកួតនេះប្រព្រឹត្តិទៅដោយរលួន ។
ឆ្លៀតនៅក្នុងនោះលោកស្រីមេឃុំក៏សូមថ្លែងអំណរគុណយ៉ាងជ្រាលជ្រៅចំពោះទឹកប្រទ័យរបស់ព្រះគ្រូយសសិរីមុនីទេព គង់ សំប៊ុនឈឿន ព្រះវិន័យធរអនុគណស្រុកស្វាយជ្រំនិងជាចៅអធិការវត្តតាសួសដែលបានរៀបចំព្រឹត្តិការណ៍ប្រកួតបាល់ទះដណ្តើមពាន់រង្វាន់មិត្តភាពវត្តតាសួសនេះឡើងដើម្បីលើកស្ទួយវិស័យកីឡាក៏ដូនជាធ្វើឲ្យយុវជនទាំងនាំគ្នាចូលរួមលេងកីឡាព្រោះកីឡានាំមកនូវសុខភាពល្អ មិត្តភាពល្អ ទំនាក់ទំនងល្អ និងធ្វើឲ្យយុវជនចាកឆ្ងាយពីអំពើអបាយមុខៗផងដែរ៕
