នាថ្ងៃសៅរ៍ ១២ កើត ខែកត្តិក ឆ្នាំខាលចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី៥ ខែវិច្ឆិកា ឆ្នាំ២០២២ ឧត្តមសេនីយន៍ទោ ច័ន្ទ រដ្ឋា មេបញ្ជាការរងយោធភូមិភាគទី៥ បានអញ្ជើញជាអធិបតី ក្នុងពិធីបិទវគ្គហ្វឹកហ្វឺន បំប៉នពង្រឹងអង្គភាព វរសេនាតូចលេខ១ តំបន់ប្រតិបត្តិការសឹករងពោធិ៍សាត់ ដែលមានការអញ្ជើញចូលរួមពីនាយសេនាធិការរង នាយររងការិយាល័យចំណុះយោធភូមិភាគទី៥។
ឧត្តមសេនីយ៍ទោ ច័ន្ទ រដ្ឋា បានថ្លែងថា ការហ្វឹកហ្វឺនរៀនសូត្ររបស់កងទ័ពគឺជាការងារស្នូលបន្ទាប់ពីការងារការពារជាតិហើយការហ្វឹកហ្វឺនគឺធ្វើឡើងដើម្បីពង្រឹងសមត្ថភាពរបស់កងទ័ពកម្ពុជាទាំងស្មារតី ទាំងកាយសម្បទា និងយុទ្ធវិធី។ ឧត្តមសេនីយ៍ទោ បន្តទៀតថា ក្រៅពីការងារហ្វឹកហ្វឺន ការងារការពារជាតិ កងទ័ពទិសយោធភូមិភាគទី៥ ក៏បានចូលរួមយ៉ាងសកម្មក្នុងកិច្ចការអន្តរាគមន៍ ចុះរុករកនិងជួយសង្គ្រោះប្រជាពលរដ្ឋដែលរងគ្រោះដោយជំនន់ទឹកភ្លៀងនាពេលកន្លងទៅ ដែលសកម្មភាពទាំងនេះបានឆ្លុះបញ្ចាំងឲ្យឃើញពីសមត្ថភាពរបស់កងទ័ពកម្ពុជាហើយក៏បានទទួលការកោតសរសើរពីថ្នាក់ដឹកនាំជាន់ខ្ពស់ព្រមទាំងមានការគាំទ្រយ៉ាងពេញទំហឹងពីប្រជាពលរដ្ឋនូវស្នាដៃរបស់កងទ័ពយើងទាំងមូល។
ក្នុងឱកាសបិទវគ្គហ្វឹកហ្វឺន លោកឧត្តមសេនីយ៍ទោ បានធ្វើការផ្ដាំផ្ញើឲ្យសិក្ខាកាមដែលបានបិទវគ្គត្រូវយកចំណេះដឹងទៅបម្រើអង្គភាពរបស់ខ្លួនឲ្យមានប្រសិទ្ធភាពខ្ពស់ ចៀសឲ្យឆ្ងាយពីគ្រឿងញៀន បើសិក្ខាកាមណាម្នាក់ត្រូវរកឃើញពាក់ព័ន្ធនិងគ្រឿងញៀន នឹងត្រូវបណ្ដេញចេញពីជួរកងទ័ព។
ជាទីបញ្ចប់ លោកឧត្តមសេនីយ៍ទោ ច័ន្ទ រដ្ឋា ក៏បានប្រកាសបិទវគ្គហ្វឹកហ្វឺនចាប់ពីថ្ងៃនេះតទៅ និងបានឧបត្ថម្ភថវិកា ឯកឧត្តមមេបញ្ជាការរងកងទ័ពជើងគោក មេបញ្ជាការយោធភូមិភាគទី៥ ចំនួន ១.០០០.០០០ រៀល ដល់មេបញ្ជាការ វរសេនាតូចលេខ១ តំបន់ប្រតិបត្តិការសឹករងពោធិ៍សាត់ ក្នុងវគ្គហ្វឹកហ្វឺន។ ដោយឡែក លោកឧត្តមសេនីយ៍ទោ ច័ន្ទ រដ្ឋា បានឧបត្ថម្ភថវិកាផ្ទាល់ខ្លួនបន្ថែមជូនដល់សិក្ខាកាម ចំនួន ១០០នាក់ ក្នុងម្នាក់ ចំនួន ២០.០០០ រៀល សរុបថវិកាចំនួន ២.០០០.០០០ រៀលផងដែរ៕
