ខេត្ដស្វាយរៀង ៖ ក្រុមប្រឹក្សាឃុំអណ្តូងពោធិ៍ប្រតិកម្មករណីក្រុមហ៊ុន «ភារម្យ» ទទួលការដាក់លូរ បង្ហូរទឹក១ខ្សែមានប្រវែង១២៣ម៉ែត្រ ដាក់ខុសស្តង់ដាបច្ចេកទេសនៃកិច្ចសន្យា ដោយឲ្យក្រុមហ៊ុនរុះរើឡើងវិញ រៀបចំដាក់លូសារជាថ្មី តាមស្តង់ដានៃកិច្ចសន្យាដែលបានធ្វើ។
ការប្រតិកម្មនេះស្ថិតនៅក្នុងភូមិត្រពាំងត្បាល់ ឃុំអណ្តូងពោធិ៍ ស្រុករមាសហែក។ បើយោងតាមក្រុមប្រឹក្សាឃុំអណ្តូងពោធិ៍បានប្រាប់ឲ្យដឹងថា ឃុំបានទទួលគម្រោង ដាក់លូ រំដោះទឹក១ខ្សែ មានប្រវែង១២៣ម៉ែត្រ ទទឹងមុខកាត់លូ ១ម៉ែត្រឬហៅថា «១០០» នៅអមផ្លូវជាតិលេខ១៣ ដែលដាក់ដេញថ្លៃ បានទៅលើក្រុមហ៊ុន «ភារម្យ» ជាអ្នកទទួលម៉ៅការធ្វើក្នុងតម្លៃ ៤២លានរៀល (សែសិបពីរលានរៀល) ដោយចាប់ផ្តើមអនុវត្តគម្រោងចាប់ពីថ្ងៃ០៦ធ្នូ២០២២ មក។
ប្រភពបានបន្តថា ក្រុមបច្ចេកទេសឃុំបានពិនិត្យដំណើរការអនុវត្តគម្រោង របស់ក្រុមហ៊ុន ភារម្យ នេះឃើញថា បានរៀបចំដាក់លូ ខុសស្តង់ដាបច្ចេកទេសនៃកិច្ចសន្យា ។ ក្នុងកិច្ចសន្យា គឺដាក់លូរំដោះទឹកប្រវែង១២៣ម៉ែត្រ មុខកាត់លូ១០០ ក្នុងតម្លៃដេញថ្លៃបាន៤២លានរៀល ។ ស្តារប្រឡាយចាស់ (ដែលមានទំហំ ទទឹង០៤ម៉ែត្រ ជម្រៅ២,៥០ម៉ែត្រ) បូមទឹក កាយល្បាប់ចេញ ចាក់ដី បង្ហាប់ ដាក់ខ្សាច់ ថ្ម ឡប់ឡែ ក្រាលបាត ដាក់លូ ។
តែជាក់ស្តែងក្រុមហ៊ុនបានបូមទឹកប្រឡាយចេញរួច កាយដីទំនប់ប្រឡាយទម្លាក់ក្នុងប្រឡាយ ហើយដាក់លូតែម្តង គឺខុសបច្ចេកទេសនៃកិច្ចសន្យាទទួលម៉ៅការ ទើបក្រុមប្រឹក្សាឃុំចុះទៅពិនិត្យឃើញថា ក្រុមហ៊ុនមិនអនុវត្តតាមកិច្ចសន្យា ទើបប្រតិកម្ម ឲ្យក្រុមហ៊ុនរុះរើ ដាក់លូសាជាថ្មីតាមស្តង់ដាបច្ចេកទេសនៃកិច្ចសន្យាឲ្យបានត្រឹមត្រូវ។
ករណីនេះដែរ លោក ព្រាប ប៊ុនថុល មេឃុំ អណ្តូងពោធិ៍បានប្រាប់ អង្គភាពព័ត៌មានយើងថា ក្រោយពី ក្រុមប្រឹក្សាឃុំចុះពិនិត្យ ហើយសុំឲ្យក្រុមហ៊ុនកែតម្រូវ ដោយប្រឡាយ មានទំហំធំ ៤ម៉ែត្រ ជម្រៅ២ម៉ែត្រកន្លះ។ ដោយឃើញធ្វើខុសកិច្ចក្រុមប្រឹក្សាឃុំក៏បានរាយការណ៍ជូនលោកអភិបាលស្រុករមាសហែក សុំឲ្យមន្ត្រីជំនាញបច្ចេកទេសចុះសិក្សា ហើយក៏បានសម្រេច ឲ្យក្រុមហ៊ុនកាយដី មាត់ប្រឡាយតាមបណ្តោយទំនប់ប្រឡាយ ជម្រៅស្មើ មាត់លូ កាត់ផ្លូវជាតិលេខ១៣ ដាក់លូ តាមស្តង់ដាបច្ចេកទេស និងតម្រូវឲ្យក្រុមហ៊ុនរកដីមកលប់ប្រឡាយ និងទំនប់ឡើងវិញឲ្យស្មើទំនប់ចាស់ ទើបក្រុមប្រឹក្សាឃុំនិងប្រជាពលរដ្ឋទទួលយក។
ម្ចាស់ក្រុមហ៊ុន《ភារម្យ 》បានប្រាបអ្នកសារព័ត៌មានយើងយ៉ាងខ្លីថា ខាងលោកធ្វើតាមអាជ្ញាធរភូមិ ឃុំទេ បើខាងព័ត៌មានចង់ផ្សាយអីក៏ផ្សាយទៅលោកមិនខ្វល់ទេ ។
ពាក់ព័ន្ធករណីនេះដែរក្រុមការងារអង្គភាពសារព័ត៌មានយើងបានទំនាក់ទំនងទៅលោក ស៊ូ ម៉ុល អភិបាលស្រុករមាសហែក លោកបានមានប្រសាសន៍ថា បើតាមការចុះពិនិត្យរបស់ក្រុមបច្ចេកទេស គឺការសម្រេចដាក់លូលើមាត់ប្រឡាយ លោកអាចទទួលយកបាន ដោយតម្រូវឲ្យក្រុមហ៊ុនកាយដី វាស់នីវ៉ូ ឲ្យស្មើមាត់លូ ដាក់កាត់ថ្នល់ផ្លូវជាតិលេខ១៣ ក្រាលខ្សាច់ថ្មឡប់ឡែរួចដាក់លូ និងរៀបឥដ្ឋធ្វើរបាំងការពារដីច្រោះ គឺអាចទទួលយកបានហើយ។ លោកបានលើកឡើងបន្ថែមថា តាមពិតនៅទីតាំងដាក់លូនេះគឺដោយសារ កន្លងមកក្រុមប្រឹក្សាឃុំអណ្តូងពោធិ៍ បានលើកគម្រោងជីកប្រឡាយ ១ខ្សែដើម្បីយកទឹកស្តុកទុកនូវរដូវប្រាំង ហើយការជីកប្រឡាយទឹកនោះមានទំហំ៤ម៉ែត្រ ជម្រៅ២ម៉ែត្រកន្លះ អែបកៀកជិតផ្លូវជាតិលេខ១៣ ។
ក្នុងនោះដែរលោកអភិបាលស្រុកបានបញ្ជាក់អំពីគំរោងដាក់លូនេះថា ដោយលោកប្រធានមន្ទីរសាធារណៈការនិងដឹកជញ្ជូនខេត្តលោកខ្លាចទឹកហូបាក់ច្រោះដីដល់ផ្លូវជាតិលេខ១៣ ទើបឲ្យក្រុមប្រឹក្សាឃុំលើគម្រោងដាក់លូនេះបញ្ជៀសទឹក និងការពារការបាក់ដីដល់ផ្លូវជាតិ ហើយជាគម្រោងឆ្នាំ២០២១ ក៏ប៉ុន្តែដោយមានទឹកច្រើនមិនអាចធ្វើបានទើបលើកមកធ្វើនៅឆ្នាំ២០២២នេះ ។ ហើយនៅឆ្នាំ២០២១ គឺមានគម្រោង២គឺគម្រោងផ្លូវលំមួយខ្សែប្រវែង២,៥០០ម៉ែត្រ ក្រាលថ្មបំបែក ដែលមានតម្លៃទឹកប្រាក់១២០លានរៀលដែលក្រុមហ៊ុន «ភារម្យ»ដេញថ្លៃបានសាងសង់រួចហើយក្នុងឆ្នាំ២០២១ នៅសល់គម្រោងដាក់លូ ១២៣ម៉ែត្រនេះទើបតែដំណើរការអនុវត្តគម្រោងតម្លៃទឹកប្រាក់៤២លានរៀល ។ រដ្ឋបាលស្រុកសហការជាមួយមន្ត្រីលទ្ធកម្មខេត្តនិងក្រុមប្រឹក្សាឃុំ ចុះពិនិត្យស្តង់ដាបច្ចេកទេស លុះត្រាតែត្រឹមត្រូវតាមកិច្ចសន្យាទើបទទួលយក៕
