ខេត្ដព្រះវិហារ៖ មានសេចក្ដីរាយការណ៍មកថា មានឈ្មួញធំៗ កំពុងកាប់បំផ្លិចបំផ្លាញព្រៃឈើនៅព្រៃអភិរក្សតំបន់ព្រៃឡង់ សារជាថ្មីទៀតហេីយ ក្រោយពីស្ងាត់មួយរយៈ បច្ចុប្បន្ននេះ ឈ្មួញសម្រុកកាប់ដឹកជញ្ជូនយកទៅលក់ តាមបណ្តាលខេត្តនានា ទាំងយប់ទាំងថ្ងៃ ដោយមិនញញើតអាជ្ញាធរសមត្ថកិច្ចពាក់ព័ន្ធនោះឡើយ។
ប្រភពបានឱ្យដឹងថា ការគៀងគរឲ្យពលរដ្ឋឱ្យចូលទៅកាប់ឈើគឺដើម្បីយកទៅលក់ឲ្យក្រុមហ៊ុនPNT (ហៅ97)ហើយក្រុមហ៊ុននេះបានចែកចាយឈើយកទៅលក់តាមដេប៉ូផ្សេងៗនៅតាមបណ្ដាខេត្តនានាបន្តទៀត។
ពលរដ្ឋបានលើកឡើងថា បច្ចុប្បន្នពួកឈ្មួញកាប់បំផ្លាញព្រៃសហគមន៏ព្រៃឡង់ ជិតរលាយសាបសូន្យអស់ហេីយបើនៅតែបន្ដបណ្ដោយឲ្យក្រុមឈ្មួញបន្តកាប់បែបនេះ ម្យ៉ាងវិញទៀតអាជ្ញាធរពាក់ព័ន្ធបានរក្សាភាពមានស្ងាត់បានល្អណាស់ ឬមួយអាជ្ញាធរនិងសមត្ថកិច្ចពាក់ព័ន្ធត្រូវរូវគ្នាអស់ហើយទេដឹងបានជាបណ្ដែតបណ្ដោយឲ្យធ្វើសកម្មភាពកាប់បំផ្លាញព្រៃឈើបានយ៉ាងរលូនបែបនេះ។
ប្រភពបន្ដឲ្យដឹងថា សកម្មភាព ក្រុមឈ្មួញដែលមកសុីស្នួលឲ្យក្រុមហ៊ុន PNT ចូលកាប់ឈើ នាពេលថ្មីៗនេះ ប្រមូលឈើដឹកជញ្ជានតាមគោយន្តកន្ត្រៃយ៍ ជាច្រើនគ្រឿងរួចហើយ បន្តលើកដាក់ក្នុងរថយន្តវ៉េអង ចេញតាមក្រុមហ៊ុនចំការកៅស៊ូ ជាប់ខេត្តព្រះវិហារ ឆ្លងកាត់ទៅខេត្តកំពង់ធំ បានយ៉ាងរលូនជារៀងរាល់ថ្ងៃដោយមិនទាក់ក្រសែភ្នែកអាជ្ញាធរនិងសមត្ថកិច្ចពាក់ព័ន្ធនឹងឡើយ។
ពលរដ្ឋសំណូមពរដល់អាជ្ញាធរពាក់ព័ន្ធមេត្តាចុះត្រួតពិនិត្យនិងទប់ស្កាត់រាល់បទល្មើសព្រៃឈើដែលក្រុមឈ្មួញកំពុងតែធ្វើសកម្មភាពនេះផង បើនៅតែបណ្ដែតបណ្ដោយឲ្យក្រុមឈ្មួញបំភ្លេចបំផ្លាញព្រៃធម្មជាតិបែបនេះតទៅទៀតព្រៃឈើនេះនឹងត្រូវបាត់បង់ជាមិនខាន ។
ជុំវិញករណីខាងលើនេះដែរអង្គភាពសារព័ត៌មានយើងមិនអាចសុំការបំភ្លឺពីអាជ្ញាធរនិងសមត្ថកិច្ចពាក់ព័ន្ធណាមួយបាននៅឡើយទេ។
អង្គភាពសារព័ត៌មានយើងនិងរង់ចាំធ្វើការផ្សាយជាបន្តបន្ទាប់ប្រសិនបើមានការពន្យល់បកស្រាយពីអាជ្ញាធរនិងសមត្ថកិច្ចពាក់ព័ន្ធ រៀងរាល់ម៉ោងធ្វើការ៕
