ស្វាយរៀង ៖ នាព្រឹកថ្ងៃសុក្រ ២រោច ខែចេត្រ ឆ្នាំខាល ចត្វាស័ក ព.ស. ២៥៦៦ ត្រូវនឹង ថ្ងៃទី៧ ខែមេសា ឆ្នាំ២០២៣នេះនៅមន្ទីរសុខាភិបាល នៃរដ្ឋបាលខេត្តស្វាយរៀង មានរៀបចំពិធីបើក « សន្និបាតបូកសរុបលទ្ធផលការងារប្រចាំឆ្នាំ២០២២ និងលើកទិសដៅការងារឆ្នាំ២០២៣ របស់មន្ទីរសុខាភិបាល នៃរដ្ឋបាលខេត្តស្វាយរៀង » ក្រោមអធិបតីភាព ឯកឧត្តម ម៉ែន អេង អភិបាលរង តំណាងឯកឧត្តម ម៉ែន វិបុល អភិបាល នៃគណៈអភិបាលខេត្តស្វាយរៀង។
នៅក្នុងកិច្ចប្រជុំនេះមានការអញ្ជើញចូលរួមពី លោកវេជ្ជបណ្ឌិត គុជ ស៊ីថា ប្រធានមន្ទីរសុខាភិបាល នៃរដ្ឋបាលខេត្ត លោកនាយករងរដ្ឋបាលសាលាខេត្ត លោក-លោកស្រី ប្រធាន មន្ទីរពាក់ព័ន្ធនានា លោក-លោកស្រី អភិបាលក្រុង/ស្រុកទាំង ៨ លោក លោកស្រី ប្រធាន អនុប្រធាន អង្គភាពក្រោមឱវាទរបស់មន្ទីរសុខាភិបាលខេត្ត លោក លោកស្រី ប្រធាន និងតំណាងអង្គការដៃគូ និងសមាជិក សមាជិការ។
មានប្រសាសន៍ទៅកាន់ពិធីនេះឯកឧត្តមបានថ្លែងថា សមិទ្ធផលសុខាភិបាលសង្ខេបឆ្នាំ២០២២ របស់លោកប្រធានមន្ទីរ បានបង្ហាញឲ្យយើងឃើញពីសមិទ្ធផលយ៉ាងច្រើនដែលមន្ទីរសុខាភិបាលសម្រេចបាន ក្នុងការលើកកម្ពស់គុណភាព វិស័យសុខាភិបាលក្នុងខេត្ត ស្របតាមប្រសាសន៍ដ៏ថ្លៃថ្លារបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី បានបញ្ជាក់ថា “ រាជរដ្ឋាភិបាលកម្ពុជា បានតម្កល់ទុកសុខភាពប្រជាពលរដ្ឋ គឺជាកត្តាចម្បង សម្រាប់ការអភិវឌ្ឍន៍ធនធានមនុស្ស វឌ្ឍនភាពសង្គម និង សេដ្ឋកិច្ចប្រកបដោយនិរន្តរភាព ” ។
ជាចុងបញ្ចប់ នៃពិធីបើកសន្និបាតនៅព្រឹកនេះ ឯកឧត្តមអភិបាលរងខេត្ត បានអញ្ជើញប្រគល់នូវ ប័ណ្ណសរសើរ ជូនដល់ថ្នាក់ដឹកនាំ និងអង្គភាពក្រោមឱវាទរបស់មន្ទីរសុខាភិបាល។
